Los presidentes Adrián Barbón, Alberto Núñez Feijóo y Miguel Ángel Revilla alcuerden trabayar de manera conxunta pa estudiar y evaluar les posibilidaes técniques, la viabilidá económica y la medría ordenada d’esta tecnoloxía, de manera que seya compatible coles demás actividaes, especialmente la pesca marítima

El presidente del Gobiernu d’Asturies, Adrián Barbón, y los sos homólogos de Galicia y Cantabria -Alberto Núñez Feijóo y Miguel Ángel Revilla, respectivamente- aprovecharon l’alcuentru que tuvieron el vienres en Potes p’afitar l’espíritu de collaboración esistente ente les trés comunidaes y, sobre manera, p’abogar por un trabayu conxuntu que dexe impulsar la enerxía eólico marino al traviés d’un desenvolvimientu ordenáu y respetuosu coles demás actividaes.

En concreto, los trés presidentes coincidieron na importancia d’incorporar, nel marcu de la Estratexa Europea de Medría Azul, les tecnoloxíes nueves rellacionaes colo eólico marino como elementu tresformador y de sostenibilidá del texíu empresarial.

Asina, los gobiernos d’Asturies, Galicia y Cantabria defenden la necesidá de promover esta collaboración pal estudiu y evaluación d’esta enerxía renovable, amás de pa la xestación de proyectos al traviés d’un aprovechamientu razonable y sostenible. Nesti sentíu, l’oxetivu ye evaluar a comuña les posibilidaes técniques de lo eólico marino, la so viabilidá económica y, de manera especial, el caltenimientu y impulsu de tola cadena de valor de lo eólica offshore, no qu’Asturies cunta con empreses líderes y de referencia nacional y internacional.