El Principáu va empecipiar una axenda de trabayu conxunta colos gobiernos de Galicia y Cantabria pa dar mayor impulsu a les empreses altamente electrointensives y demandar a l’Alministración Xeneral del Estáu midíes adicionales de compensación pa esta industria, estratéxica pa la economía española.

Esti ye unu de los principales alcuerdos adoptaos nel alcuentru telemáticu celebráu esta tarde, nel que participaron los titulares de los departamentos con competencies n’Industria y Enerxía de les trés comunidaes: Enrique Fernández, conseyeru d’Industria, Empléu y Promoción Económica d’Asturies; Francisco Conde, vicepresidente económicu y conselleiro d’Economía, Empresa y Innovación de la Xunta de Galicia, y Javier López Marcano, responsable d’Industria, Turismu, Innovación, Tresporte y Comerciu de Cantabria.

Asturies Galicia y Cantabria ponen en valor el diálogu y la collaboración ente alministraciones nel actual contestu de reactivación económica y col marcu de los fondos europeos Next Generation. Nesi sentíu, la xunta foi una oportunidá pa poner de mancomún los retos de la transición ecolóxica y enerxética pa les comunidaes del norte d’España, onde la industria electrointensiva tien un pesu relevante.

Al respectu, los conseyeros alcordaron siguir defendiendo una postura común énte’l Gobiernu d’España como midida de sofitu al sector. D’esta miente, dan continuidá al alcuerdu que les trés comunidaes establecieron mientres el procesu de redacción del Estatutu del Consumidor Electrointensivu, al considerar que’l testu aprobáu nun da respuesta a toles necesidaes.

Siguiendo la llinia que plantegaben nes allegaciones que presentaron conxuntamente al estatutu, güei punxéronse sobre la mesa distintos puntos de mancomún pa treslladar al Executivu central. De primeres, que se compensen los costos de CO2 al máximu, con un horizonte temporal estable y ensin que tea condicionáu a los Presupuestos Xenerales del Estáu. Tamién s’alcordó pidir que se concrete un mecanismu de capacidá efectivu pa la industria electrointensiva y que’l Gobiernu faiga una propuesta de fondos pa sofitar proyectos singulares.

Estes reivindicaciones van en llinia coles plantegaes por Asturies na Alianza pola Industria, en que’l so marcu consensuóse un gran alcuerdu políticu, social y económicu en defensa de la industria altamente electrointensiva que foi unviáu a los ministerios d’Industria, Comerciu y Turismu y de Transición Ecolóxica y Retu Demográficu.

Nesa mesma dirección, Galicia, Asturies y Cantabria tamién soliciten que se sofiten planes específicos d’inversión pa esti sector nel marcu de los fondos europeos Next Generation.

Les trés comunidaes consideren qu’estos fondos constituyen una oportunidá escepcional pa impulsar una transición enerxética xusta y ordenada. Y, con esi oxetivu, na xunta encararon tamién les posibilidaes de consensuar proyectos comunes n’ámbitu de la movilidá sostenible y de la eólica marina (offshore).

L’alcuentru celebráu güei supón un primer pasu col que los gobiernos d’Asturies, Galicia y Cantabria pretenden establecer una axenda de contactos pa siguir texendo aliances estratéxiques que dean protagonismu al Noroeste nel Plan de Recuperación, Tresformamientu y Resiliencia del Gobiernu d’España.