El Gobiernu d’Asturies garantiza’l so compromisu firme y estable cola ayuda humanitaria destinada a la población palestina al traviés de l’Axencia Asturiana de Cooperación al Desenvolvimientu, dependiente de la Conseyería de Derechos Sociales y Bienestar. L’axencia va destinar 118.900 euros a les necesidaes básiques de la población palestina, ayuda d’emerxencia cola qu’Asturies súmase a la posición yá espresada pol Ministru d’Asuntos Esteriores y l’Unión Europea.
El Gobiernu tresllada los sos condolencies pol personal humanitariu asesináu nesti conflictu y la so esmolición pola seguridá de quien siguen sobre’l terrén. Nesti marcu, estima y sorraya el llabor de l’axencia de la ONU pa la población palestina refuxada (UNRWA, poles sos sigles n’inglés), del Comité de Solidaridá cola Causa Árabe y de l’Asamblea de Cooperación pola Paz, mesmo que la de toles organizaciones locales nos proyectos qu’anguaño se sofiten dende l’Axencia Asturiana de Cooperación.
La población palestina, sometida a una crisis de llarga duración, ye una de les prioridaes de l’axencia dende va años. Esti organismu desenvuelve dos llinies de collaboración cola población palestina yá consolidaes. Per un sitiu, con UNRWA; por otru, col Comité de Solidaridá cola Causa Árabe. Amás, intervien en proyectos con otres oenegés; por casu, el que se llevó a cabu dende 2021 cola Asamblea de Cooperación pola Paz. En total, destinó 900.000 euros a esti fin nel periodu 2019-2022.
