Asturies llogró amenorgar el desempléu y crear 1.152 nuevos puestos de trabayu en marzu magar del contestu económicu y la fuelga del tresporte. El númberu de persones paraes rexistraes nes oficines del Serviciu Públicu d’Empléu del Principáu (Sepepa) baxó en 152 al respective de febreru (0,23%) y asítiase en 66.037, la menor cifra para un mes de marzu dende 2008.

 

Magar del aumentu xeneralizáu de los precios y del impactu de la invasión rusa d’Ucrania, agraváu n’Asturies pola fuelga del tresporte de mercancíes, el mes pasáu non solo amenorgóse’l desempléu, sinón que tamién aumentó la contratación, concretamente un 0,31%.

 

Al respective de marzu de 2021, producióse una baxada del paru del 22,05%. Asina, anguaño hai 18.680 paraos menos que va un añu, lo que supon el segundu mayor descensu interañal de tola serie hestórica. N’España, l’amenorgamientu foi del 21,29%. Asturies atropa yá 12 meses de descensu interañal siguíu.

 

Por sectores, destaca’l retrocesu interañal del desempléu na industria (23,40%) y la construcción (22,20%). Pela so parte, nel colectivu ensin empléu anterior producióse un amenorgamientu del 28,85%, mientres qu’ente los menores de 25 años algamó’l 37,28%.

 

La contratación caltien el bon enclín de los últimos meses sobremanera, la de calter indefiníu, pol efectu positivu de la reforma llaboral. Asina, en marzu suscribiéronse 23.817 contratos, lo que supon un aumentu del 12,68% al respective de febreru. Del total, 6.238 fueron indefiníos (26,19%), lo qu’implica una medría del 58,04% sobre’l mes anterior. La contratación indefinida creció nel últimu añu un 125,28%.

 

Gracies a esta nueva crecedera de los contratos, l’afiliación a la Seguridá Social asitiase en 368.780 persones n’Asturies.

 

Tocantes a la evolución de los espedientes de regulación temporal d’empléu (ERTE), el númberu de trabayadores amparaos por esta ferramienta baxó en 335 persones, hasta un total de 2.024, la cifra más baxa dende l’entamu del andanciu. En concretu, 629 emplegaos tienen activu nestos momentos dalgún procedimientu de flexibilidá.

 

La directora xerente del Serviciu Públicu d’Empléu (Sepepa), Pilar Varela, valoró güei los rexistros de marzu: “Estos datos reafítennos na importancia de xestionar tolos recursos recoyíos nel presupuestu y los alcuerdos de concertación con axentes económicos y sociales. Nel Sepepa, vamos tramitar 139 millones en polítiques actives d’empléu por que toos los actores implicaos collaboremos nel oxetivu de la incorporación llaboral de les persones paraes”.