La tercer fola del Estudiu Nacional de Seroprevalencia ENE-COVID revela que namás un 1,9% de la población asturiana adquirió anticuerpos contra’l virus SARs-COV-2. Ye una de les menores tases del país, onde la so media asitióse nel 5%. Esti porcentaxe de prevalencia caltúvose tanto na primer como nesta última investigación, ente que na segunda fola menguara al 1,6%. El coordinador del estudiu n’Asturies, Ignacio Donate, señaló que «estes cifres nun son significatives de manera estadística», pero evidencien la escasa inmunidá de grupu.

La tasa de persones que nun teníen anticuerpos na primer fola y desenvolvióla mientres los dos meses del estudiu tamién ye de les más baxes del país. En concretu, «arimáronse de la Covid-19 entre una y trés persones de cada mil», esplicó.

Donate destacó l’esfuerzu de los 200 profesionales implicaos nesta investigación na comunidá, amás de l’alta participación y adherencia de les families asturianes. De media, 1.680 persones allegaron a los sos centros de salú pa realizar la encuesta epidemiolóxica y les pruebes, lo que supon un 76% de los escoyíos. D’ellos, el 85% asistieron a cada fase del estudiu. Amás, 9 de cada 10 realizaron una venopunción, que sirve pa midir el númberu d’anticuerpos en sueru.