El Gobiernu d’Asturies presentó nueve proyectos, con una inversión de 4,4 millones, a la convocatoria estraordinaria de los programes de Sostenibilidá Turística en Destín impulsaos pol Gobiernu d’España dientro del Plan de Competitividá y Modernización del Sector Turísticu 2021-2023. Estes iniciatives tán concebíes p’harmonizar y cohesionar les actuaciones impulsaes poles entidaes d’ámbitu local.
La viceconseyera de Turismu, Graciela Blanco, esplicó que les propuestes presentaes pol so departamentu “busquen dar cumplimientu a los oxetivos definíos na Estratexa Turística 2020-2030 del Principáu d’Asturies” y la so aprobación diba representar “un reblagu pa consolidar la reactivación del nuestru turismu como un impulsor sostenible de la economía y la sociedá”.
Estes iniciatives céntrense n’ámbitos como la dixitalización, la xestión de la información turística, el desenvolvimientu d’acciones d’impulsu del productu turísticu, l’afitamientu de sistemes de calidá y la puesta en marcha d’acciones de formación destinaes al sector.
A estes actuaciones súmase’l referíu al Xacobéu 21-22, consideráu como una prioridá estratéxica pal plan estatal. Consta de seis acciones de cohesión en destín sobre’l Camín de Santiago que busquen ameyorar l’accesibilidá y sostenibilidá d’estes rutes, modernizar la xestión de les sos infraestructures y recursos, y aumentar la calidá de la esperiencia turística nel camín. Estes seis acciones tán destinaes a reforzar l’allugamientu d’Asturies y de los caminos del norte dientro de los itinerarios del Camín de Santiago y cunten con una dotación que supera los cinco millones.
Planes de Sostenibilidá d’entidaes locales
Pela so parte, les entidaes locales del Principáu presentaron tamién once iniciatives, que representen una inversión global de 26.233.541 euros y que les sos cuantíes muévense ente’l millón y los trés millones y mediu por cada acción. Estos proyectos tán empobinaos a inversiones tresformadores nel ámbitu de la transición verde, a la eficiencia enerxética, a la transición dixital y a la competitividá del destín.
La convocatoria d’esti programa estraordinariu, que va ser resuelta primero que remate l’añu, va dexar afitar el conxuntu de programes y acciones que van conformar el primer Plan Territorial Turísticu del Principáu d’Asturies de los trés previstos que van ser financiaos al cargu de fondos europeos.
