La conseyera de Derechos Sociales y Bienestar, Melania Álvarez, apurrió esta tarde’l XV Premiu José Lorca a la Promoción y Defensa de los Derechos de la Infancia a l’Asociación Asturiana para l’Atención y el Cuidu a la Infancia (ASACI) pol so programa de promoción del bon tratu y prevención ya intervención énte la violencia contra neños, neñes y adolescentes. Esti programa formó a 6.662 menores y 3.219 profesionales en nueve años y atendió 244 demandes d’orientación y asesoramientu.

El xuráu valoró tamién l’esfuerzu desenvueltu pola asociación, desque empecipió la so actividá fai 25 años, para averar a Asturies les esperiencies más innovadores d’otres comunidaes na prevención ya intervención contra’l maltratu infantil, cuantimás, el rellacionáu col abusu y la violencia sexual. Tamién destacó l’arrogancia d’ASACI a la hora de compartir información y de crear redes de trabayu coles instituciones y pola formación permanente de los sos profesionales.

ASACI representa a Asturies na Federación nacional d’Asociaciones para la Prevención del Maltratu Infantil, la FAOMI y ye pionera na promoción de la salú mental y bienestar emocional de los adolescentes por aciu la so incorporación na REDE PROEM.

El Premiu José Lorca, creáu en 2007 en memoria del fiscal de menores del Tribunal Cimeru de Xusticia d’Asturies y dotáu con 6.000 euros, reconoz públicamente’l llabor de persones que destaquen de forma especial pola so contribución na prevención, promoción, atención, defensa y espardimientu de los derechos de la infancia.