El Gobiernu del Principáu va solicitar garantíes xurídiques que dexen siguir aplicando en tolos sos términos el plan de xestión del llobu, incluyíos los controles de población. L’Executivu autonómicu, que yá prepara les allegaciones a la inclusión del cánidu nel llistáu d’especies de protección especial, aboga pol diálogu ente’l Ministeriu pa la Transición Ecolóxica y les comunidaes, de cuenta que sía posible llograr una solución de consensu que favoreza la coexistencia del llobu cola ganadería estensiva.
El conseyeru de Mediu Rural y Cohesión Territorial, Alejandro Calvo, axuntó güei en Llión colos sos homólogos de Cantabria, Galicia y Castiella y Llión pa encarar les llinies de trabayu de cara a la renovación de la Estratexa de caltenimientu del Llobu n’España. Nel alcuentru tamién participaron representantes de les organizaciones agraries.
Calvo reivindicó la necesidá de recuperar l’alcuerdu. Al so xuiciu, la estratexa nacional anovada tien d’integrar la esperiencia y información acumulada poles comunidaes que, como Asturies, disponen de planes propios de xestión. El conseyeru tamién defendió que se facilite la transición d’estos planes al marcu que se derive de la renovación de la estratexa nacional. Pa Calvo, el foru pa debatir estes cuestiones ye’l grupu de trabayu nel que participen el ministeriu y los gobiernos autonómicos, al que tamién se sumaron les organizaciones agraries y el Ministeriu d’Agricultura.
El Gobiernu d’Asturies propón que la estratexa avance na meyora de les llinies de sofitu a la prevención, l’harmonización de los baremos de daños y los mecanismos de xestión y mediación colos ganaderos, amás de garantizar seguridá xurídica pa realizar los controles de población. Calvo plantegó que s’habilite un presupuestu específicu pa sofitar la ganadería estensiva nes zones lloberes que dexe la *cofinanciación estructural de toles midíes, incluyíu’l pagu de daños.
La estratexa tien de reconocer tamién el papel fundamental de la ganadería estensiva nel caltenimientu de la biodiversidá al traviés de la promoción de los productos d’esti modelu d’esplotación. El conseyeru destacó que la calidá ambiental y l’acervu cultural asociaos a la ganadería estensiva faen posible la ellaboración de productos singulares o la ufierta de servicios con un distintivu probiodiversidá. Nesti sentíu, Calvo propunxo que s’esplore la vía fiscal al traviés d’incentivos o exenciones venceyaos a los beneficios ambientales.
El Gobiernu d’Asturies trabaya nes allegaciones que va presentar al borrador d’orde ministerial qu’incluye’l llobu nel llistáu d’especies de protección especial (LESPRE). Amás de solicitar seguridá xurídica pa l’aplicación del plan de xestión, tamién propón que, en cualquier casu, haya una ampliación de los plazos pa la so entrada a valir, agora prevista pal 25 de setiembre: una moratoria que dexe completar la renovación de la estratexa nacional y l’adaptación de los planes rexonales al marcu que resulte de la mesma.
