Asturies peslló abril con 12.007 persones menos en paru y 11.378 más afiliaes a la Seguridá Social que va cuatro años, según los datos publicaos güei pol Ministeriu de Trabayu y Economía Social. El Principáu encadena asina 25 meses de cayíes interañales consecutives.
El cálculu resulta de comparar abril de 2023 con abril de 2019, el mes previu a la celebración de les últimes elecciones autonómiques. La evolución del paru varia a lo llargo del añu, polo que resulta más fiable tomar como referencia meses homoxéneos.
Los rexistros espublizaos esta mañana constaten la bona evolución del mercáu llaboral, confirmada tamién pola última entrega de la Encuesta de Población Activa (EPA), conocida va unos díes. Colos datos de güei, el númberu de demandantes d’empléu -60.349- ye’l más baxu de los postreros 15 años pa un mes d’abril. Pela so parte, les afiliaciones a la Seguridá Social -375.814- algamen el máximu llistón dende 2010.
Otru fechu positivu ye que l’amenorgamientu del desempléu foi xeneralizada: dar en dambos sexos, en toles edaes y en tolos sectores d’actividá. En concretu, na industria, que se consolida como unu de los sectores tractores de la economía, rexistra una cayida del 3,05%.
La comparanza de les cifres del mes pasáu coles d’abril de 2022 tamién refundia un balance positivu: el paru rexistráu baxa en 3.637 persones (5,68%). En términos interañales, el paru cai en tolos ámbitos económicos, anque en términos relativos sobresal l’amenorgamientu nel sector primariu (14,94%), na industria (11,37%) y na construcción (10,80%), mientres que nel campu de los servicios mengua un 5,03%.
