La evolución de les cifres de desempléu n’Asturies encadena un mes más de descensu interañal y asítiase de nuevu ente les cinco comunidaes con un mayor amenorgamientu del paru. D’esta miente, zarró’l mes de marzu con 57.559 persones desemplegaes, la cifra más baxa pa esti mes de los postreros 16 años, según los datos publicaos güei pol Ministeriu de Trabayu y Economía Social.
L’amenorgamientu del paru’l pasáu mes foi xeneralizada: benefició a dambos sexos, a toles cohortes d’edá y tolos sectores económicos. Asina, con al respective de febreru, contabilizáronse 1.276 paraos menos, lo que supon un amenorgamientu del 2,17%, frente a un descensu nacional del 1,21%. Por sectores, los servicios concentraron el 85% del amenorgamientu, impulsada pol tirón de la Selmana Santa.
Nel analís interañal, el Principáu encadena yá 36 meses de baxaes consecutives. Si se comparen les cifres coles del mesmu mes de 2023, hai 4.137 paraos menos, lo que supon un descensu del 6,71%. Destaca, de nuevu, la bona evolución de los servicios que concentra’l 70% del amenorgamientu del desempléu. Coles mesmes, en términos relativos, los sectores que meyor evolucionen son la industria, con un amenorgamientu del 9,61% en términos interañales, siguida del sector primariu con un amenorgamientu del 9,53%.
La directora xerente del Serviciu Públicu d’Empléu, Begoña López, valoró bien positivamente los datos. N’especial el bon comportamientu del sector servicios bien venceyáu a l campaña de Selmana Santa y el del sector industrial, “que cayó un 3% respectu al mes pasáu y del 9,61% en términos internauales. Nos próximos meses esperamos siguir nesta sienda de descensu del paru registado”, resaltó.
Pela so parte, l’afiliación a la Seguridá Social aumentó en 3.286 persones, hasta algamar los 379.685 cotizantes, la cifra más elevada dende 2010 pa un mes de marzu. En comparanza col mesmu períodu de 2023, hai 7.120 afiliaos más, lo que reflexa una medría del 1,91%.
