Asturies peslló mayu con menos de 59.000 persones desemplegaes, la cifra más amenorgada de los postreros 15 años pa esti mes. Amás, la comunidá nun baxaba de los 60.000 paraos dende xunetu de 2022.
L’empléu repica con fuerza na comunidá xusto antes del entamu de la temporada de branu, que ye’l períodu nel que tradicionalmente se rexistren los niveles de paru más baxos del añu. El mes pasáu’l desempléu amenorgóse en 1.860 persones (3,08%), bien percima de la media nacional, del 1,77%.
El descensu producióse en dambos sexos, más ente les muyeres qu’ente los homes; en tolos tramos d’edá y en tolos sectores d’actividá, especialmente na industria y la construcción, con amenorgamientos bien percima de la media autonómica.
En términos interañales, la evolución tamién ye favorable. Asturies rexistra nestos momentos 3.935 persones en paru menos que va un añu, lo qu’implica un amenorgamientu del 6,30%. Amás, la comunidá encadena 26 meses de cayida interañal del desempléu.
El paru baxa de la que crez de manera significativa l’empléu, según los datos oficiales de la Seguridá Social. En mayu, el númberu de persones afiliaes aumentó en 2.178 (0,58%), hasta les 377.992. Na comparanza interañal, nestos momentos trabayen n’Asturies 4.743 persones más que va un añu.
Destaca especialmente l’aumentu del 9,09% nos contratos indefiníos, hasta un total de 6.962. Dende xineru, suscribiéronse 32.287 contratos indefiníos, lo que supon qu’unu de cada trés puestos de trabayu que se crean n’Asturies tien calter estable.
