Adrián Barbón, presidente del Gobiernu d'Asturies
Adrián Barbón, nel Plenu de la Xunta Xeneral. / FSA

El presidente del Gobiernu asturianu, Adrián Barbón, convidó esti martes a tolos grupos parlamentarios a xunir esfuerzos para superar la crisis provocada pol coronavirus. “Antepongamos Asturies a cualesquier otra cosa y demostremos que los políticos somos quien a entender que tamos viviendo una situación escepcional”, afirmó. Barbón adelantró que’l so Executivu va proponer que los conceyos de Los Oscos y de los Valles del Osu puedan avanzar más rápidu na desescalada.

El presidente aprovechó la so comparecencia na Xunta Xeneral pa repitir la so ufierta de diálogu y unidá. “La ciudadanía nun nos culpa pola llegada del coronavirus, pero sí nos va a xulgar sobre cómo xestionemos esta situación, con qué altor de mires trabayemos y, sobremanera, si antepunximos Asturies a los alderiques de partíu”.

“Nun podemos reactivar la movilidá con otres comunidaes en distinta situación epidemiolóxica. Sería un suicidiu”

Barbón llamó al diálogu coles mires puestes na futura negociación de los alcuerdos de reconstrucción autonómica –los nomaos Pactos de Fruela- y en cuestiones más inmediates, como la repartida del fondu de 16.000 millones dispuestu pol Gobiernu d’España. El Principáu, que consiguió que la distribución nun dependa n’esclusiva del númberu d’habitantes, va defender que tamién se tomen en cuenta’l porcentaxe de pruebes PCR por cada 100.000 habitantes y l’esfuerzu en gastu sanitariu de cada comunidá. En dambos indicadores, Asturies asítiase bien percima de la media. Barbón anunció que va proponer estes meyores na próxima conferencia de presidentes y pidió a los grupos de la oposición qu’utilicen la so capacidá d’influencia a favor de los intereses de la comunidá. Según esplicó, l’Executivu lleva gastaos cien millones pola crisis sanitaria, mientres que la recaldación menguó en 150.

Tamién informó a los grupos parlamentarios de delles de les propuestes que va plantegar pa la desescalada. Ente elles, que los conceyos d’Os Ozcos y de los Valles del Osu apuerten antes a la segunda etapa. Barbón argumenta que l’andanciu tuvo nesta zona una mínima o nula incidencia. Asina, magar toa Asturies va entrar na primer fase’l llunes, el Principáu considera que les dos zones citaes tán en condiciones d’empecipiar directamente la segunda.

«Pa encarar con ésitu la desescalada ye imprescindible la responsabilidá», sorrayó Barbón. Nesti sentíu, refugó la movilidá ente comunidaes autónomes: “Sería un suicidiu”. “Nun podemos reactivar la movilidá con otres comunidaes autónomes que tán en distinta situación epidemiolóxica porque tolo consiguío perderíase. Y eso piénsenlo tamién los votantes del PP”, afirmó n’alusión a la oposición de los populares a sofitar l’allongamientu del estáu d’alarma.

Barbón afirmó que nun se plantega, «de nenguna manera», baxar el sueldu a los emplegaos públicos. Tamién manifestó la so indignación pola situación de la factoría de l’antigua Alcoa y pidió máximu rigor al Ministeriu d’Industria.