La Estratexa de Conectividad Aérea del Principáu aspira a algamar los 38 destinos directos n’avión y los 2,5 millones de pasaxeros añales nel aeropuertu de Santiagu’l Monte en 2033. Tamién busca que’l tráficu internacional suponga’l 40% del total nesi añu. Pa llograr estos oxetivos, el Gobiernu d’Asturies esplora yá oportunidaes en siete mercaos internacionales, dientro de los cualos valora opciones ente casi una ventena d’escales.
“El Principáu ta yá y va tar entá meyor preparáu pa encarar la internacionalización del sector turísticu col fortalecimientu de la conectividad aérea”, destacó güei en Fitur la viceconseyera de Turismu, Lara Martínez, mientres la presentación de la fueya de ruta de la estratexa de conectividad.
El Principáu busca oportunidaes en mercaos como Escandinavia, nel qu’analiza opciones de destinos como Oslo o Copenhague. Tamién Centroeuropa figura ente les árees d’interés pa establecer nueves rutes internacionales con ciudaes como Viena, Praga o Varsovia. La conexón con Suiza ye otra de les que s’evalúen, col fin d’incorporar a la ufierta asturiana vuelos a Xinebra o Zúrich.
P’afitar la so posición nos mercaos colos que yá esiste conexón agora, el Gobiernu d’Asturies esamina posibilidaes en más d’una decena d’aeropuertos europeos: Nantes, Toulouse, Lyon y Marsella (Francia), Berlín o Hamburgo (Alemaña), Edimburgo (Escocia), Manchester (Inglaterra), Dublín (Irlanda) y Florencia, Bolonia y Nápoles (Italia).
