El Gobiernu d’Asturies defende un plan sectorial específicu pa la ganadería de la cornisa cantábrica nel marcu de la Política Agraria Común nueva (PAC). La Conseyería de Mediu Rural y Cohesión Territorial va proponer al Ministeriu d’Agricultura que recueya esta midida nel Plan Estratéxicu d’España, que s’ellabora na actualidá cola participación de comunidaes autónomes y organizaciones agraries y medioambientalistas, y al que la ciudadanía tamién puede facer llegar suxerencies.
Nesti marcu, el Principáu apuesta por unes condiciones propies que refuercien el modelu d’esplotación familiar sostenible de les rexones del norte de la península, ameyore la so rentabilidá y se consolide como xenerador d’actividá económica. La cornisa cantábrica ufierta unes condiciones qu’encaxen na PAC post-20 y allíniense cola Estratexa Verde Europea, onde la moderación de consumu d’agua y la xeneración d’alimentos de calidá —d’acordies con práctiques agrícoles que favorecen la biodiversidá— van ser la exa principal pa la canalización de fondos.
El conseyeru de Mediu Rural, Alejandro Calvo, anunció, mientres la visita que realizó güei a una ganadería de Colunga, que la convocatoria d’ayudes PAC 2021 va publicase nel Boletín Oficial del Principáu d’Asturies (BOPA) la selmana próxima. Calvo destacó que “va dexar la llegada d’un volume históricu de recursos pa los nuestros llabradores y ganaderos”.
La convocatoria d’anguaño va cuntar con 96 millones, 14 más que nel 2020, p’ayudes agroambientales y a l’agricultura ecolóxica, la indemnización compensatoria de montaña y races en peligru d’estinción.
Debíu al periodu de transición de la PAC, tuviéronse qu’ellaborar unes bases nueves pa la convocatoria actual, afaciéndoles al marcu normativu européu nuevu. Amás, la conseyería solicitó al Ministeriu d’Agricultura, al igual qu’otres comunidaes autónomes, l’ampliación del plazu de presentación de solicitúes hasta’l 31 de mayu, cola mira de facilitar la presentación de les mesmes.
