Asturies recupera tres la pandemia sanitaria’l programa Añoranza, que financia’l treslláu y estancia d’emigrantes asturianos a la comunidá. Cuatro persones que llevaben décades ensin tornar a la so tierra d’orixe visiten estos díes Asturies gracies a esta iniciativa de la Dirección Xeneral d’Emigración y Polítiques de Torna.
Nesta edición, dos homes y dos muyeres, d’ente 75 y 89 años, van poder realcontrara colos sos familiares y los sos raigaños. Lleguen dende Venezuela y Arxentina y son naturales de Cabrales, Morcín y Grandas de Salime. En dellos casos lleven más de seis décades ensin triar Asturies.
Amás del treslláu y l’agospiamientu, el Principáu entama pa esti colectivu un programa d’actividaes culturales y de conocencia de la realidá actual de la comunidá. Asina, van realizar visites a instalaciones y llugares emblemáticos de los conceyos d’Uviéu, Xixón, Avilés, Morcín, Cangues d’Onís, Cabrales, Ribedeva y Grandas de Salime.
“Ye una prestosada poder recuperar el programa Añoranza porque ye unu de los meyor valoraos polos nuesos emigrantes y el más entrañable de los qu’impulsamos”, resaltó la vicepresidenta Gimena Llamedo, que recibió esti martes al grupu na see de la Conseyería de Presidencia, Retu Demográficu, Igualdá y Turismu xunto cola directora xeneral d’Emigración y Polítiques de Torna d’Asturies, Olaya Romano.
Llamedo tamién garantizó’l compromisu del Principáu con esta iniciativa: “Conocer les hestories d’Anita, Llibertá, Francisco y Amado y sentir la emoción que tresmiten al tornar a Asturies dempués de tanto tiempu constaten el valor d’esti programa, un compromisu que reconoz a los nuesos emigrantes, a aquellos que dexaron Asturies va muncho tiempu y qu’asina pueden realcontrase colos sos raigaños, cola so xente y cola so hestoria”.
