El Principáu caltién contactos regulares coles compañíes pa consolidar y desestacionalizar los destinos domésticos y diseñar la ufierta internacional.
El Gobiernu d’Asturies caltién contactos regulares con distintes compañíes aérees pa reforciar y consolidar una ufierta de vuelos qu’esta temporada conecta Asturies con 14 destinos estatales con más d’una trentena de rutes directes operaes por 7 aerollinies.
Vueling, Air Nostrum, Iberia, Iberia Express, Air Europa, Volotea y Binter yá dexen acutar vuelos dende l’aeropuertu de Santiagu’l Monte con destín a siete rexones peninsulares: Madrid, Barcelona, Valencia, Málaga, Alacant, Sevilla y Murcia y coles islles de Mallorca, Menorca y Eivissa, en Baleares, y de Tenerife Norte, Tenerife Sur, Gran Canaria y Lanzarote, nel archipiélagu canariu, pelo menos hasta la seronda próxima.
Asina, Asturies va recuperar na temporada de branu hasta 120 salíes a la selmana con 40.000 places ufiertaes. D’esta miente, selmanalmente va cuntar con hasta 26 salíes a Canaries, 24 a Baleares, 21 a Madrid, 20 a Barcelona y 29 al restu de destinos peninsulares. Amás, va poder conectase con otros internacionales al traviés de los aeropuertos de Madrid y Barcelona, onde Iberia y Vueling tienen los sos centros de conexones (hubs).
Pela so parte, Binter Canarias dexa llegar a toles isles del archipiélagu con escales breves en Tenerife Norte y Gran Canaria.
El viceconseyeru d’Infraestructures, Movilidá y Territoriu, Jorge García, sorraya la importancia de consolidar y desestacionalizar los destinos nacionales pa llograr una conectividá áxil y directa colos principales mercaos. Amás, y a pesar de que la pandemia perxudicó al sector aereu, lo que se traduz nuna acusada cayida de la demanda, l’Executivu autonómicu trabaya en diseñar la conectividá internacional d’Asturies de cara a los años vinientes.
El Principáu axudicó l’añu pasáu a Volotea un contratu valoráu en más de 3,1 millones pa fomentar la promoción turística, cultural y d’Asturies como polu d’actividá económica hasta’l 2024. Esi contratu garantiza les conexones con Sevilla, Málaga, Valencia y Alicante mientres cuatro años, reforciando asina l’apueste pola conectividá nacional nun momentu de fuerte contracción de la demanda y de la ufierta.
