El Palazzo delle Esposizioni en Roma acoyó esta tarde una presentación entamada pola viceconseyería de Turismu pa promocionar Asturies como destín nel mercáu italianu. L’eventu cuntó cola presencia de más d’un centenar de periodistes y axentes italianos de viaxes y enmárcase dientro del programa que diseñó’l Principáu pa promover el turismu internacional, sofitáu na actual ufierta de vuelos directos coles principales capitales d’Europa. Nel casu de la capital italiana, hai conexón directa ente Asturies y l’aeropuertu de Fuimicino.
La viceconseyera de Turismu, Graciela Blanco, repasó los grandes curiosos del patrimoniu natural y cultural d’Asturies. Destacó la vinculación histórica del Principáu col Camín de Santiago y la so ufierta gastronómica. Blanco punxo especial énfasis en recordar la oportunidá que supon visitar el Paraísu Natural d’España agora que ta a poco más de dos hores de Roma.
Unu de los oxetivos ye impulsar la comercialización de viaxes dende Italia, pa lo cual enfocóse la presentación a los intereses d’esti mercáu, qu’apurre 23.000 turistes al añu al Principáu. Al actu allegaron representantes de más de 40 axencies de viaxes y turoperadores italianos, la metá de los cualos inclúin paquetes a España nos sos catálogos. Amás, siete d’ellos -Menditur ITALIA, Cisalpina tours, Glamour, Guinestravel SRL, Dreamtour, Insiemintour , Y.T.I.R viaxes a la carta- programen anguaño viaxes a Asturies.
Los invitaos pudieron esfrutar d’una esperiencia inmersiva, na que s’asemeyaba’l viaxe a Asturies n’avión, y podíen enfotase nos paisaxes asturianos al traviés de vídeos 3D. El públicu tamién esfrutó d’una degustación gastronómica al cargu de Ricardo Sotres, chef d’El Retiru de Pancar reconocíu con una estrella Michelín y embaxador de Cocina de Paisaxe, y del maestru queseru José Ángel Rodríguez.
Los italianos pueden volar tol añu a Asturies dende los aeropuertos de Fiumicino (Roma) y -a partir del próximu día 28- Milán. Trátase de dos de les dolce ciudaes europees que van conectar anguaño ensin escala col aeropuertu de Santiago del Monte, y nes que’l Gobiernu del Principáu esplegó una campaña de promoción pa captar turistes internacionales. Como amuesa, un tranvía viniláu íntegramente con imaxes d’Asturies percuerre dende esti llunes el centru de Roma, una acción a la que se va sumar nos próximos díes un circuitu de publicidá esterior con un centenar de soportes urbanos, según publicidá dixital en diversos medios y redes sociales.
