El Gobiernu d’Asturies refuerza la promoción turística n’Alemaña pa rentabilizar les conexones aérees directes con Düsseldorf, Frankfurt y Múnich. Nesti contestu, la viceconseyera de Turismu, Graciela Blanco, y el viceconseyeru d’Infraestructures, Movilidá y Territoriu, Jorge García, presentaron ayeri la ufierta natural y cultural d’Asturies énte un centenar de periodistes y operadores de la capital bávara col fin de captar viaxeros internacionales nel mercáu xermanu.
L’actu consistió nuna esperiencia inmersiva qu’asemeyaba un viaxe a Asturies n’avión, de cuenta que los asistentes pudieron enfusase nel paisaxe asturiano al traviés de vídeos en trés dimensiones. Tamién pudieron averase a la gastronomía asturiana de la mano de Jaime Uz, embaxador de Cocina de Paisaxe y chef del restorán Arbidel.
Esta presentación forma parte de los eventos de promoción internacional empobinaos a reforzar la posición d’Asturies como destín turísticu nes principales ciudaes europees coles que la comunidá tien conexón aérea directa: Londres, Dublín, París, Ámsterdam, Lisboa, Milán, Roma, Bruxeles, Düsseldorf, Frankfurt y Múnich.
Alemaña apurre añalmente a Asturies más de 50.000 turistes, un 12% del total de visitantes internacionales que s’agospien na comunidá, polo que representa unu de los principales mercaos. Por esta razón, el Gobiernu d’Asturies va invertir anguaño 600.000 euros na promoción nesti país, lo qu’inclúi la participación en feries como ITB, la organización de viaxes pa operadores y medios de comunicación, una presentación en Frankfurt y la campaña publicitaria que se desenvuelve nestos momentos na estación central de ferrocarril de Múnich y nos autobuses urbanos de la capital bávara.
Dende Asturies puede volar directamente nestos momentos a Múnich y Frankfurt, cola compañía Lufthansa, y tamién a Düsseldorf, con Ryanair.
