Los establecimientos turísticos asturianos agospiaron ente xineru y payares del pasáu añu a un total de 2.310.342 persones que xeneraron 5.891.772 estancies, según los datos publicaos güei pol Institutu Nacional d’Estadística (INE). Estes cifres representen una crecedera interañal del 30,6% en turistes y del 23,4% en pernoctaciones, y ameyoren los máximos de la serie histórica pa dambos parámetros, rexistraos nel añu 2019. Les crecederes sobre l’acumuláu a payares de 2019 son del 3% en turistes y del 6,5% en pernoctaciones.

Pela so parte, a falta de los datos d’avientu, el turismu internacional rexistró nuevos máximos en 2022, con 446.580 turistes y 960.205 pernoctaciones. La crecedera en turistes ye del 129% al respective de 2021 y del 10,9% en relación col máximu rexistráu en 2019. En pernoctaciones, les medríes algamen el 126% sobre 2021 y el 14,5% respectu al añu 2019.

La viceconseyera de Turismu, Graciela Blanco, destacó que “Asturies pieslla 2022 con cifres de récord en turistes y pernoctaciones como antemanábamos a primeros d’añu” y amosóse convencida de que “les nueves conexones aérees y la llegada del AVE van dexar un nuevu impulsu al nuesu sector turísticu”. Blanco tamién señaló qu’en xineru van ponese en marcha acciones promocionales pa xenerar espectación al respective de estos finxos, como la campaña esterior qu’anima a visitar Asturies y que va poder vese dende mañana na estación d’Atocha en Madrid.