El conseyeru d’Ordenación de Territoriu, Urbanismu, Vivienda y Derechos Ciudadanos, Ovidio Zapico, caltuvo una xunta col director xeneral de Memoria Democrática del Ministeriu de Presidencia, Relaciones coles Cortes y Memoria Democrática, Diego Blázquez, p’asitiar les pautes de collaboración rellacionaes cola memoria democrática que van dexar definir esti trabayu conxuntu mientres la presente llexislatura.
Tres la xunta, les autoridaes treslladáronse hasta Payares (L.lena) acompañaos de la viceconseyera de Xusticia, Encarnación Vicente, pa visitar la segunda fuesa de Parasimón, que los sos trabayos d’escavación y posterior exhumación empezaron el llunes y van rematar previsiblemente mañana. Los llabores tán nun monte d’abetos, unos 300 metros más arriba del primer xacimientu, nun llugar cerca del altu de Payares, y cuerren al cargu de la Sociedá de Ciencies Aranzadi, so la dirección arqueolóxica de Antxoka Martínez y con Lourdes Herrasti al mandu de los trabayos antropolóxicos.
Precisamente, Herrasti indicó que los llabores d’escavación, yá remataes, dexaron topar nueve cuerpos pertenecientes a presos del franquismu. Estes nueve víctimes súmense asina a les otres 12 que yá se desenterraren fai alredor de cinco años na primer fuesa común de Parasimón, que los sos trabayos arqueolóxicos desenvolvieron en xunu de 2018.
Toos yeren presos del bandu republicanu que, en payares de 1937, viaxaben nun camión procedente d’una prisión improvisada de Morea (Ayer) y que’l so teóricu destín yera la cárcel llionesa de San Marcos. La Sociedá de Ciencies Aranzadi calcula que nel vehículu atopábense 22 o 23 persones. Un testigu, Celestino García, qu’entós daquella tenía 16 años, pudo guardar los sos fusilamientos dende un escondite nuna corte d’una zona de camperes denominada Parasimón. Al paecer, los presos fueron partíos en dos grupos pa ser asesinaos. Celestino García tamién pudo reparar cómo los falanxistes estrozaben les cares de les víctimes pa torgar la so identificación.
Ente los fusilaos, que fueron soterraos nes dos fueses, Celestino García reconoció namás a Luis Cienfuegos, un vecín de Parana (L.lena). En conociendo’l relatu d’esti testigu, los descendientes de Luis Cienfuegos crearon l’Asociación d’Amigos y Familiares Fuesa de Parasimón y punxeron en marcha una busca p’atopar tanto’l so cuerpu como’l del restu de los presos asesinaos.
Hasta agora, Luis Cienfuegos ye la única víctima reconocida d’estos fusilamientos, polo que la Sociedá de Ciencies Aranzadi fixo un llamamientu a la ciudadanía p’apurrir pistes que puedan ayudar a identificar los cuerpos apaecíos nes dos fueses, que podríen pertenecer a vecinos d’Ayer o L.lena.
Tres la visita d’esta tarde a la segunda fuesa, el conseyeru Ovidio Zapico y el restu d’autoridaes asistieron a un emotivu actu d’homenaxe pa recordar a les víctimes entamáu pola Asociación de Familiares y Amigos Fuesa de Parasimón nel Centru Social de Payares.
