Asturies sigue batiendo los sos récords turísticos

La comunidá rexistró 2.123.613 visitantes y 5.082.909 pernoctaciones ente xineru y ochobre

0
128

Los agospedamientos turísticos asturianos rexistraron n’ochobre 170.271 visitantes y 352.950 pernoctaciones. Son datos del Institutu Nacional d’Estadística (INE) de xineru a ochobre. Con estes cifres, el cómputu anual asítiase de momentu en 2.123.613 de turistes y 5.285.945 d’estancies, los valores más altos algamaos nos diez primeros meses del añu na serie histórica.

Los datos acumulaos del exerciciu suponen medríes del 1,8 % en turistes y del 3,7 % en pernoctaciones. En comparanza col 2018, estos porcentaxes xuben al 3,1 % y 2,5 % nel casu del turismu internacional.

Al respective del mes d’ochobre, vese una contención previsible nel enclín de medría de los meses precedentes, al cayer el Día de la Hispanidá de sábadu. Asina, nesti periodu hubo una mengua global de turistes del 4,6 % y del 3,4 % n’estancies de turismu nacional, que nun se repitió nel mercáu internacional, onde sí hubo una medría del 1,2 % en turistes y del 13,4 % en pernoctaciones. L’empléu nos agospedamientos turísticos asturianos caltúvose nos niveles d’ochobre del 2018, con una medría del 0,1 % y un total de 5.057 trabayadores.