Asturies sigue en nivel altu d’alerta por covid, según los criterios de la nueva estratexa de vixilancia y control qu’entró en vigor el 28 de marzu. La evolución del andanciu nel Principáu puede consultase nel siguiente enllaz:

https://www.sanidad.gob.es/profesionales/saludPublica/ccayes/alertasActual/nCov/documentos/Actualizacion_615_COVID-19.pdf

Los indicadores rellacionaos col usu de los servicios asistenciales son los que determinen el nivel de riesgu, anque l’actual sistema de siguimientu ufierta tamién información adicional sobre la tresmisión del virus ente la población de 60 y más años.

Per otra parte, del 7 al 10 de xunetu finaron n’Asturies por coronavirus 14 persones con edaes entendíes ente los 59 y los 99 años. Amás, el domingu pasáu permanecíen hospitalizaos con confirmación de covid 406 pacientes: 391 en planta y 15 en UCI.

Nel actual contestu d’alerta alto que vive’l Principáu, les pruebes diagnóstiques d’infección activa realicense según el criteriu del profesional sanitariu qu’atienda a una persona con clínica compatible, con independencia de la edá o d’otros factores de vulnerabilidá.

Salú aconseya que les persones con síntomes, tengan o non confirmación por aciu prueba diagnóstica, cumplan coles midíes de protección yá conocíes: llaváu de manos, distancia social, usu del mázcaru y restricción al máximu de les sos interacciones sociales.

Na población xeneral, los casos confirmaos leves y asintomáticos nun van tener que realizar aislamientos y tendrán de siguir los encamientos preventivos enantes comentaes.

Nos ámbitos vulnerables –centros sanitarios o sociosanitarios-, si’l positivu ye un residente o usuariu, va realizase un aislamientu de 5 díes dende l’entamu de los síntomes o dende’l diagnósticu nos casos asintomáticos. L’aislamientu va terminar siempres que trescurrieren 24 hores tres el fin de los síntomes.

Si’l positivu ye un trabayador nun tien d’allegar al so centru de trabayu mientres los primeres 5 díes dende l’entamu de los síntomes o de la fecha de diagnósticu en casu de ser asintomáticu. Pa la so reincorporación tendrán de trescurrir 24 hores dende la desapaición de los síntomes y tener un test de antíxenos negativu.

Amás, nos centros residenciales pueden aplicase midíes d’intervención y control específiques énte la detección d’un solu casu en residentes o de trés casos en trabayadores.

Campaña de vacunación

Les autoridaes sanitaries insisten na importancia de vacunase, especialmente quien inda nun lo fixeron o tean pendientes de completar la pauta o dosis d’alcordanza. Nesti sentíu, faen especial fincapié en persones menores de 40 años, nes que la cobertoria ye menor.

Según los últimos datos, el 91,03% de la población asturiana (927.352 persones) recibió yá dos dosis de la vacuna contra’l coronavirus, ente que el 92,20% (939.333 persones) tien polo menos la primera. Tomando como referencia la población diana (de 5 años o más), el porcentaxe con doble dosis algama’l 93,81%. En total, dende l’entamu de la campaña tienense inoculado 2.501.308 dosis.

Tocante a la profilaxis de refuerzu, hasta agora alministráronse 734.875, lo que representa una cobertoria del 85,35% de les persones mayores de 30 años.