El Gobiernu d’Asturies alzó a la fase 2 l’alerta del Plan Territorial por Contaminación Marina Accidental (Placampa) por cuenta de la llegada de microplásticos a la mariña. Nes postreres 24 hores amontóse de manera significativa la franxa de mariña afectada, al algamar la zona oriental de la mariña asturiana, y tamién aumentó’l númberu de focos identificaos. La decisión va dexar ampliar los medios humanos y técnicos p’actuar con rapidez y eficacia la detección y llimpieza de los restos nes sableres y ríes, qu’en munchos casos son redolaes que cunten con dalgún grau de protección ambiental.
L’activación de la fase 2 del Placampa dexa la incorporación de medios del Ministeriu pa la Transición Ecolóxica y el Retu Demográficu al dispositivu de retirada y xestión de les borrafes que’l Principáu punxo en marcha en coordinación colos conceyos, al traviés de la Federación Asturiana de Conceyos (FACC). Les brigaes van siguir colos trabayos de retirada de les borrafes plástiques que puedan apaecer mientres esti episodiu pa evitar la so dispersión nel mediu natural o la so entrada na cadena trófica.
El presidente del Principáu, Adrián Barbón, refirióse a l’activación del Placampa nuna entrevista radiofónica nel programa La Ventana, de la Cadena Ser, na qu’apostó por trabayar «toos a una» pa protexer la mariña asturiana, «el meyor caltenida d’España. «Hai un problema de contaminación que tenemos d’intentar erradicar de planu por que nun s’estienda más. Cuanto antes actuemos, meyor», afirmó, de la que destacó la coordinación col ministeriu.
