El director xeneral d’Inclusión Educativa y Ordenación, David Artime, calificó como “una solución bien razonable” la propuesta del Ministeriu d’Educación y Formación Profesional de realizar pa esti cursu unos cambeos mínimos na Evaluación del Bachilleratu pal Accesu a la Universidá (EBAU) coles mires d’adaptala a la nueva llei educativa (LOMLOE) a valir.
Artime –quien participó güei nuna xunta informativa del secretariu d’Estáu d’Educación, José Manuel Chigre, coles comunidaes autónomes- xustifica esa propuesta «teniendo en cuenta que tamos énte un gobiernu en funciones que tien qu’ordenar el desenvolvimientu de la EBAU cola implantación de la nueva norma». Y añedió que «ye una solución qu’introduz los mínimos cambeos indispensables y que pon el focu nel alumnáu”.
El director celebró tamién l’adelantu de la tramitación de la prueba, que’l ministeriu preve tener aprobada mientres payares, lo que supón una anticipación de más de dos meses al respective d’otros años. “Estimamos esta dilixencia y creemos que ye un pasu adelantre habida cuenta de les implicaciones de la norma y l’ansiedá que xenera nos centros y l’alumnáu”, afirmó.
Los dos principales cambeos de la próxima EBAU van ser que los estudiantes van poder escoyer ente esaminase d’Hestoria d’España o Hestoria de la Filosofía al recuperar esta última materia la condición d’obligatoria pa tol alumnáu de 2º de Bachilleratu. Amás, incorpórase una nueva prueba de Ciencies pa los estudiantes del Bachilleratu Xeneral.
La EBAU va caltener un mínimu de cuatro pruebes obligatories y, pa xubir nota, otru mínimu de dos asignatures pertenecientes a la modalidá escoyida de Bachilleratu. Les materies obligatories van ser Llingua castellana y lliteratura; Llingua estranxera; Hestoria d’España o Hestoria de la filosofía y otra asignatura en función de la caña estudiada. La duración de caúna de les pruebes caltiense tamién en 90 minutos.
Al respective de los criterios d’evaluación, van aplicase los del nuevu Real Decretu 243 de la LOMLOE, yá qu’anguaño remataron la implantación d’esta llei educativa. Tocantes a les feches, la convocatoria ordinaria de la EBAU va tener como fecha llende’l 14 de xunu. Y la estraordinaria, el 12 de xunetu o’l 19 de setiembre, dependiendo del mes que decida cada comunidá autónoma.
