Unu de los principales oxetivos ye desaniciar la discriminación por edá, amás d’incluyir a los mayores nel diseñu de polítiques y servicios

La Conseyería de Drechos Sociales y Bientar sumóse al manifiestu européu p’amenorgar la soledá ensin desear de les persones mayores, una iniciativa que promueve’l proyectu EIT Health, la comunidá de conocencia ya innovación del Institutu Européu d’Anovación y Tecnoloxía.

Asturies va compartir col restu de países firmantes la so esperiencia al traviés del proyectu Sienda, que pilota dende finales de 2019 el departamentu que lidera Melania Álvarez pa combatir l’aisllamientu social.

L’adhesión a esta iniciativa da continuidá al trabayu desenvueltu en materia d’avieyamientu activu n’Asturies y allíniase cola Estratexa Asturiana d’Avieyamientu Activu (2018-2021), col trabayu realizáu na rede European Social Network (na que participen trenta países en favor de les polítiques sociales) y col Reference Site Asturies, una reconocencia qu’otorga la Comisión Europea y que señaló a Asturies cola máxima puntuación, cuatro estrelles, como llugar ideal p’avieyar viviegamente.

El manifiestu recueye dellos oxetivos, por casu, la eliminación de la discriminación por edá y la inclusión de los mayores nel diseñu de polítiques y servicios. Tamién promueve la escucha activa pa entender meyor les causes ya impactos de la soledá, crea programes d’emprendimientu interxeneracional ya impulsa l’empoderamientu de los mayores.

Tres la firma del manifiestu va crease un grupu de trabayu p’aldericar y promover llinies d’acción, onde Asturies va esponer les sos esperiencies nesti ámbitu.