La Conseyería de Salú activó a les 00:00 hores del llunes el nivel d’alerta 1 (riesgu baxo) del Plan Nacional d’actuaciones preventives por baxes temperatures 2022-2023 énte les predicciones de l’Axencia Estatal de Meteoroloxía (Aemet), qu’envaloren que los próximos díes 30 y 31 les temperatures van baxar per debaxo del estragal de los -0,5 graos. En concretu prevense rexistros de -2 graos n’Uviéu, localidá de referencia.
Esti nivel d’alerta por baxes temperatures actívase por segunda vegada nestos díes. Fai una selmana llanzóse’l primer avisu dende la entrada a valir del plan.
Les autoridaes sanitaries aportunen na necesidá de curiar a la población más vulnerable al fríu, esto ye, les persones ensin llar y les que sufren probeza o baxu estatus económicu. Otros grupos de riesgu son les persones mayores de 65 años, les muyeres gestantes, los naciellos y lactantes, la población con movilidá amenorgada, les persones desnutridas con escosamientu físicu, los casos d’intoxicación etílica, les que trabayen al campu y les que practiquen deportes al campu en zones fríes.
Tamién aconseyen a la ciudadanía que tome una alimentación variada, que tome diariamente fruta y beba líquidos, sobre manera agua y bébores calientes, y qu’evite el consumu d’alcohol, yá que mengua la sensación de fríu.
Igualmente, Salú ufierta los siguientes encamientos sobro cómo actuar n’espacios esteriores:
- Alendar pela ñariz y non pela boca, yá que l’aire calez al pasar poles fueses nasales, lo que mengua’l fríu que llega a los pulmones.
- Estremar el precuru en casu de xelu nes cais. Un eleváu porcentaxe de mancadures rellacionaes col fríu tien que ver con cayíes al esnidiar sobre plaques de xelu. Pa ello encamiéntase utilizar el calzáu antideslizante si ye posible.
- Delles capes de ropa fino protexen más que xuna sola gruesa, al formar cámares d’aire aislante ente elles.
Y en los espacios interiores:
- Nel casu d’utilizar braseros o chimenea, aconséyase ventilar la estancia con frecuencia pa evitar l’acumuladura de CO2.
- Tocantes a la casa, encamiéntase ventilar siquier dos vegaes al día, mientres 15 minutos caúna, p’asegurar la renovación del aire. Coles mesmes, suxúrese apagar les estufes eléctriques y de gas mientres la nueche.
