Asturies tien en marcha 26 proyectos nel ámbitu del hidróxenu anovable que van movilizar inversiones por valor de más de 10.400 millones. El conseyeru d’Industria, Empléu y Promoción Económica, Enrique Fernandez, espublizó güei esti datu na clausura de la xornada Asturies verde y sostenible, entamada por EDP n’Uviéu.
Fernández destacó les múltiples oportunidaes pa la promoción de nueves actividaes económiques que surden na comunidá gracies al procesu de transición enerxética y que van contribuyir a la reindustrialización y la xeneración de nuevos puestos de trabayu. Ente elles, señaló les rellacionaes col desenvolvimientu del hidróxenu verde, xunto cola so cadena de valor, con proyectos como HyDeal España, qu’arrexunta a ArcelorMittal, Enagás y Fertibería, y el proyectu-rexón ReCoDe (acrónimu de reactivación, competitividá y descarbonización).
HyDeal España va movilizar más de 8.000 millones nun proyectu que combina la producción, vienta, consumu y almacenamientu de H2 anovable y que va dexar encarar el procesu de descarbonización en sectores como la siderurxa y l’industria química, ente otros. ReCoDE, pela so parte, ye una iniciativa coordinada pol Gobiernu d’Asturies qu’arrexunta 25 proyectos que van movilizar 2.400 millones pa producir 170.000 tonelaes d’hidróxenu en 2030.
D’estes iniciatives, ocho atópense en fase más avanzada y tán lideraos por empreses como EDP o consorcios cola participación de compañíes como Hunosa, Nortegás, Duro Felguera, Renfe o Alsa. Estos proyectos preven la so puesta en marcha en 2024, con una inversión de 512 millones pa la instalación de 180 megavatios (MW) de electrolizadores y la producción de 20.000 tonelaes añales de hidrogeno verde.
El conseyeru destacó especialmente’l proyectu de EDP na central d’Aboño, que xunto con otros desenvolvimientos na térmica de Sotu de Ribera y otros allugamientos, constitúi “un actor clave nel sistema enerxéticu asturianu” y una empresa exemplar nel cumplimientu de los sos compromisos cola comunidá nel procesu de transición enerxética.
“Los proyectos pa les térmiques d’Aboño y de Sotu de Ribera, la xeneración d’enerxía colos denominaos hidrotornillos de Arquímedes nel ríu Nalón o les nueves tecnoloxíes d’almacenamientu cierren el círculu virtuosu del procesu de transición enerxética xusta, porque dan continuidá a la presencia de la compañía n’Asturies, yá centenaria, y a impulsar les cadenes de valor industrial acomuñaes a les enerxíes anovables”, aseguró Fernández.
