Asturies va crear una mesa de trabayu con tolos colectivos arreyaos na defensa de los derechos y llibertaes de les persones lesbianes, gais, transexuales, bisexuales ya intersexuales pa ellaborar el borrador de la futura llei LGTBI autonómica, que’l so nome va depender tamién de les decisiones que s’adopten nesi marcu.
La directora xeneral de Participación Ciudadana, Tresparencia, Diversidá Sexual y LGTBI, Nuria Rodríguez, qu’anunció güei esta iniciativa, aportunó na necesidá de “resolver l’anomalía esistente n’Asturies al respective d’otres comunidaes”, una y bones Asturies ye, xuntu con Castiella y Llión, la única autonomía qu’entá escarez d’una normativa específica nesti campu. Rodríguez fixo estes declaraciones tres la ronda de contactos que caltuvo colos distintos colectivos afectaos desque asumió’l so cargu.
Nesti contestu, ayeri axuntóse con representantes de l’asociación Llar Trans, formada por persones trans, menores y adultes, mesmo que colos sos familiares y persones de la so redolada. “Fixeron aportaciones bien interesantes y fundamentales pal colectivu LGTBI que tenemos de resolver, yá que nun podemos siguir siendo una de les dos comunidaes ensin llei LGTBI propia”, indicó Rodríguez.
“Esta va ser la llexislatura na que se faiga realidá esa llei LGTBI”, afirmó. “Pretendemos qu’esta llei, y toes y cada una de les actuaciones que faigamos, nazan col mayor consensu posible, col mayor nivel d’aportación y, sobremanera, coles mires d’avanzar en derechos p’ameyorar la vida del colectivu LGTBI”, precisó.
Per otru llau, Nuria Rodríguez sorrayó la importancia de “trabayar viviegamente” na creación de protocolos d’intervención concretos que protexan los derechos y llibertaes del colectivu naquellos ámbitos nos que seya más urxente la so conocencia per parte de los profesionales implicaos, especialmente n’educación y sanidá.
Con independencia de lo que marque la futura llei, la directora xeneral recordó que yá esisten esti tipu de protocolos n’otres comunidaes. “Asturies precisa una mayor implicación y conocencia per parte de los profesionales d’estos ámbitos pa saber cómo proceder en situaciones concretes qu’esperimenten estes persones”, añedió.
