Asturies va cuntar con 33 millones del Plan de Barrios que van dexar rehabilitar 936 viviendes en siete conceyos: Uviéu, Xixón, Avilés, Ribeseya, Valdés, Samartín del Rei Aurelio y Llangréu. Estes actuaciones van ser cofinanciaes con fondos del Mecanismu de Recuperación y Resiliencia, integraos nel programa Next Generation de la Unión Europea.
El Gobiernu del Principáu presentó dellos proyectos al Ministeriu de Tresportes, Movilidá y Axenda Urbana (MITMA) pa beneficiase del Plan de Rehabilitación de Barrios. A la fin, fueron escoyíos 10. La inversión total supera los 33,3 millones. L’aportación de fondos va xubir a cerca de 25 millones.
La conseyera de Derechos Sociales y Bienestar, Melania Álvarez, manifestó’l so prestu “pol ésitu d’esta convocatoria, yá que l’Executivu autonómicu “siéntese dafechu identificáu” colos sos oxetivos. Tanto ye asina, que la conseyería va pidir más fondos pa llanzar una nueva “y poder llegar a más actuaciones qu’ameyoren non solo l’aspectu de los nuesos barrios, sinón tamién qu’apuesten firmemente pola rehabilitación y rexeneración urbana en tol nuesu territoriu”.
Una vegada aprobaos los proyectos, el Gobiernu d’Asturies va unviar agora al ministeriu la propuesta de firma de conveniu. A partir de la mesma, cada conceyu va poder llevar a cabu la execución de les obres, que’l so plazu máximu de finalización va ser el 30 de xunu de 2026.
