El Gobiernu d’Asturies va diseñar nesta llexislatura una nueva llei de facienda que modernice la xestión económica y afonde na llucha contra la burocracia. Este ye unu de los principales compromisos adquiríos pol conseyeru de Facienda y Fondos Europeos, Guillermo Peláez.
La puesta al día de la normativa tien de partir, a xuiciu de Peláez, de la ellaboración y aprobación d’una nueva llei que sustituya al testu refundíu del Réxime Económico y Presupuestario del Principáu, que data de 1998 y quedóse obsoleto. “La normativa actual tien más de 25 años y taba pensada pa una Alministración relativamente pequeña qu’esperimentó notables cambeos dende entós”, esplicó.
Esti cambéu lexislativu enmárcase na simplificación alministrativa y l’amenorgamientu de trámites burocráticos entamada pol Executivu na pasada llexislatura pa dar respuesta a les necesidaes de la ciudadanía y les empreses. Por esta razón, el titular de Facienda pidió sofitu a los grupos parlamentarios pa sacar alantre la iniciativa: “Apelo a la so collaboración pa llograr una mayoría parlamentaria que sofite esta necesaria reforma en beneficiu de los asturianos y les asturianes”.
De la mesma, solicitó’l respaldu de les distintes formaciones polítiques nel procesu de confección y negociación del proyectu de llei de presupuestos xenerales para 2024, el retu más inmediatu que tien d’encarar el so departamentu. Nesti sentíu, valoró les oportunidaes que s’abren cola aprobación de les cuentes. “Tener presupuestos significa, simple y llanamente, qu’Asturies pueda utilizar tolos recursos disponibles”, resumió.
