La vicepresidenta y conseyera de Presidencia, Retu Demográficu, Igualdá y Turismu, Gimena Llamedo, asitió güei la llucha contra la despoblación como unu de los principales oxetivos de llexislatura y ufiertó diálogu, consensu y unidá pa encetar “un asuntu d’Estáu p’Asturies”. Nesti sentíu, anunció que’l Gobiernu d’Asturies va aprobar n’ochobre’l proyectu de Llei d’Impulsu Demográficu, tres paralizar esti trámite va unes selmanes pa recibir aportaciones de los grupos parlamentarios. Tamién destacó qu’en 2024 va poner en marcha’l Plan Retorna col fin de facilitar el regresu de persones emigrantes. El caltenimientu de la fiscalidá estremada pal mediu rural, l’amenorgamientu a cero de los impuestos nesta zona y l’afitamientu de les ayudes directes a les families formen parte del catálogu de midíes pa facer frente a esti desafíu.
Llamedo compareció esta mañana a pidimientu propiu nel Parlamentu xuntu con tol so equipu y el de la Viceconseyería de Cultura y Deporte –área que depende directamente del presidente- pa esponer les prioridaes de la so conseyería pa esti mandatu, que resumió a les traces n’otros trés apartaos, amás del impulsu demográficu: ganar la guerra contra la burocracia, consolidar un turismu sostenible y calidable y avanzar n’igualdá.
Según esplicó, pa encarar el retu demográficu “con ambición y constancia desenvolveránse polítiques tresversales y interinstitucionales y van tomase en considerancia les aportaciones de la ciudadanía, los grupos parlamentarios, los conceyos, les empreses y los espertos. “La primer batalla tien que dase na nuesa mentalidá, porque nin la resignación nin el pesimismu resuelven problemes”, alvirtió.
La mirada a la emigración va marcar una llinia d’actuación dientro del marcu de trabayu p’atraer población. Anguaño, 138.000 asturianes y asturianos viven fuera de les llendes d’Asturies. Col fin de conocer en fondura les sos circunstancies, va constituyise l’Observatoriu de la Emigración Asturiana, de la mano de l’asociación Compromiso Asturies XXI, y va ellaborase la Estratexa Retorno Asturies, col propósitu d’ufiertar acompañamientu integral (social, llaboral, económicu, alministrativu, etcétera) a quienes deseyen volver a la so tierra d’orixe, tomando exemplu de les esperiencies que se realizaron con ésitu n’otres comunidaes. La futura Oficina de la Torna va controlar estes actuaciones. Per otra parte, dende’l Gobiernu fomentaráse la incorporación de les persones que tornen a los sectores de l’agricultura, la ganadería y la pesca. Paralelamente, van llevar a cabo campañes empobinaes a facilitar inversiones na comunidá per parte d’asturianos nel esterior.
