Asturies va participar del 1 al 3 d’ochobre na Feria Internacional de Productos del Mar Conxelaos (Conxemar), una de les más importantes del mundu pa esti sector. El Principáu va cuntar con un estand institucional de 120 metros cuadraos onde siete empreses asturianes van amosar les sos ellaboraciones. Más de 35.000 compradores y profesionales de l’acuicultura, la comercialización y la tresformación de productos pesqueros procedentes de 106 países asistieron a la edición pasada de la feria, que cuntó con 748 espositores.
Les empreses que participen como coespositores en Conxemar xunto al Gobiernu d’Asturies son estes:
– Vivapesca Import-Export. Especializada na conxelación de pexes peláxicos procedentes del norte d’España pa la so esportación. Trátase del mayor esportador asturianu de productos pesqueros fuera de la Unión Europea (UE).
– Cetárea Tazones. Desenvuelve como actividá principal la importación de mariscu vivo. Cunta nes sos instalaciones con viveros industriales y una fábrica de tresformación de mariscu especializada en productos gourmet que comercializa cola marca Delibrab.
– Asturpesca. Dedicada a la manipulación, tresformación y venta de pexe y mariscu fresco, ellaborao y conxelao, amás d’al filetiáu.
– Conservas Agromar. Especializada en productos d’alta calidá gourmet con unos sabores que son una referencia nel mercáu.
– Fresgea. Céntrase na ellaboración y distribución de pescáu y derivaos y tien delegaciones en siete comunidaes autónomes incluyida Asturies.
– Piscifactoría del Alba. Ye una empresa pionera na acuicultura española y dedicada a la producción de trucha arcoíris. Foi la primera del país en criar ‘truches sostenibles’ al traviés de la certificación Aquaculture Stewardaship Council.
– Asociación de Mayoristes de Pescáu del Principáu d’Asturies. Cunta ente los sos miembros con asociaos de frescu, conxelaos, esportadores, distribuidores, fabricantes de conserves y cola Asociación Asturiana de Piscicultores.
L’estand del Principáu va tener una zona específica pa la esposición de productos de conserves de pescáu y un espaciu informativu con semeyes aérees de los puertos pesqueros asturianos. Tamién va haber un área dedicada a la marca Alimentos del paraísu.
