La conseyera de Cultura, Política Llingüística y Deporte, Vanessa Gutiérrez, anunció güei en Glasgow que’l Principáu d’Asturies va ser el país convidáu na edición del 2027 del Showcase Scotland, el principal alcuentru profesional de música folk y de raíz que se celebra añalmente na ciudá escocesa dientro del prestixosu festival Celtic Connections, una de les grandes cites internacionales de la música celta.
L’asistencia d’Asturies como país invitáu va suponer una presencia institucional reforciada, con estand propiu, la participación de seis grupos nel Showcase del festival y la presentación de les promotores musicales asturianes na muestra profesional, amás d’una presencia destacada dientro de l’amplia programación que dinamiza la vida cultural escocesa con cientos de conciertos mientres la celebración del alcuentru. La conseyería va proponer les formaciones que van integrar esta delegación artística, correspondiendo la selección final a la dirección del Celtic Connections, acordies colos criterios artísticos y de programación del festival.
Vanessa Gutiérrez recoyó esti mediudía’l testigu de Quebec, la nación convidada na edición actual, nun actu institucional que cuntó cola actuación de los músicos asturianos Rubén Bada y Pepín de Muñalén. Mientres la so intervención, la conseyera sorrayó’l valor de les llingües propies, la creación cultural como espresión de comunidá y la necesidá de protexer el patrimoniu inmaterial y los derechos llingüísticos, en coherencia colos principios qu’inspiren el festival: “Xeneración a xeneración, a lo llargo de los sieglos, fuimos escribiendo la nuestra propia historia, espresándonos nesta vieya llingua milenaria, anguaño minorizada, na que-yos toi falando agora. Con ella, y colos meyores recursos que nos dio la nuestra tierra, los sos habitantes, fuimos texendo comunitariamente una gran cultura d’enorme riqueza”.
Gutiérrez, qu’estos díes tamién tuvo alcuentros con responsables d’instituciones encargaes del espardimientu de llingües minorizadas como’l gaélicu escocés y el galés, punxo l’acentu nes raíces celtes compartíes polos países que participen nel Celtic Connections, un legáu común que s’espresa al traviés de la música, la oralidá, les llingües minorizaes y una concepción abierta y dialogante de la cultura: “Tradición, diversidá y diálogu cultural danse la mano nesti alcuentru, que comparte con nós el raigañu d’una identidá marcada y una vocación d’apertura qu’amplía ensin llímites los nuestros horizontes”.
La conseyera recordó coles mesmes la llarga trayectoria d’artistes asturianos nesti festival, una presencia sostenida mientres décades qu’agora recibe’l respaldu institucional del Gobiernu d’Asturies: “Los y les artistes asturianes lleven munchos años apostando la vida, el bagaxe y el talentu pol espardimientu de la nuestra cultura, compartiendo l’alma del nuestru pueblu con dalgunos de los meyores artistes del mundu”.
La Conseyería de Cultura, Política Llingüística y Deporte avanzó qu’a lo llargo d’esti añu va iguase la propuesta artística y la programación concreta que se va esplegar na edición del 2027, en coordinación cola organización del festival y col sector musical asturianu, coles mires d’ufiertar una muestra representativa de la diversidá, calidá y vitalidá de la creación contemporánea vinculada a la tradición.
Nel marcu d’esta participación, surdida frutu de les rellaciones trabaes na muestra profesional Música en Rede que dende 2024 organiza la Conseyería la Cultura, la marca d’Asturies va apaecer en tol material promocional oficial del Showcase Scotland. La programación como país invitáu fai posible tamién la distribución de material informativo y promocional sobre’l trabayu de los promotores, festivales y artistes asturianos na presentación principal del eventu, un espaciu d’especial relevancia pal espardimientu de proyectos, circuitos y polítiques culturales énte profesionales del sector de tol mundu. Amás de la cultura tradicional, el Principáu va promocionar nesta cita la gastronomía y la cultura sidrera asturiana, declarada patrimoniu cultural inmaterial de la humanidá.
Festival Celtic Connections en Glasgow
El festival celébrase en Glasgow, reconocida pola UNESCO como Ciudá de la Música, un distintivu que respuende al so compromisu cola creación, la diversidá cultural y la protección del patrimoniu musical como elementu central de progresu y dinamismu. El Celtic Connections axunta cada añu a más de 1.000 artistes nuna programación que s’estiende a lo llargo de cientos d’actividaes y qu’atrái de forma sostenida a más de 100.000 espectadores.
La participación institucional del Principáu nel Celtic Connections enmárcase na estratexa d’apoyu a la industria musical asturiana y a la so profesionalización y internacionalización, con especial atención a la música folk y tradicional, y súmase a otres polítiques impulsaes pola conseyería, como les ayudes a empreses culturales, les llinies específiques nueves pa la cultura tradicional y les escueles de música tradicional, el sofitu a festivales y eventos singulares nel mediu rural o la collaboración con grandes cites internacionales como’l Festival Intercélticu de Lorient.
