Asturies va recibir 21.685.029 euros del Plan de Recuperación, Tresformación y Resiliencia pa fomentar la movilidá sostenible, segura y conectada en contornes urbanes. La Comisión Nacional de Tresporte, aconceyada güei de forma telemática, alcordó’l repartu d’estos fondos estatales que, nel casu del Principáu, van dir destinaos a siete programes.
Dalgunes de les actuaciones escoyíes van consistir na execución de proyectos de carriles bus, prioridá semafórica y intercambiadores urbanos n’Uviéu y Xixón, amás de nes comarques d’Avilés, Nalón y Caudal. Anque les actuaciones previstes pol Ministeriu de Tresportes, Movilidá y Axenda Urbana taben destinaes a conceyos de más 50.000 habitantes, foi posible incorporar a más conceyos, polos qu’estes iniciatives van repercutir nes zones urbanes con mayores problemes de conxestión y contaminación.
Otru de los proyectos con impactu na meyora de la movilidá y el tresporte públicu va centrase na adecuación de la contorna del Hospital Universitariu Central d’Asturies (HUCA).
Amás, ta prevista la construcción d’una pasarela peatonal que va conectar les estaciones de ferrocarril y autobuses n’Uviéu, amás d’actuaciones qu’impulsen la intermodalidá y el tresporte públicu en Xixón y la movilidá peatonal y ciclista, en Siero.
L’alcuerdu tamién incorpora un programa pa dixitalizar los servicios de tresporte públicu, que va dexar al Consorciu de Tresportes d’Asturies avanzar nel procesu de modernización nel que ta metíu.
Toos estos proyectos van diseñase y desenvolvese en collaboración colos conceyos.
