Asturies va recibir 26,6 millones de fondos europeos para esplegar el so plan territorial turísticu en 32 conceyos. Esta partida global distribuyirá en trés llinies estremaes: 14,6 millones pa seis nuevos proyectos de sostenibilidá turística nuna ventena de conceyos, 10,1 p’acciones de cohesión territorial n’otros nueve de pequeñu tamañu y 1,8 pa potenciar la enogastronomía en trés más.

La conseyera de Cultura, Política Llingüística y Turismu, Berta Piñán, participó na xunta del plenu estraordinariu de la Conferencia Sectorial de Turismu, que dio lluz verde al financiamientu de seis nuevos planes de sostenibilidá turística, por importe global de 14,6 millones, para la Comarca Cinco Villes (Baxu Nalón), Cabrales, Gozón, el Parque Históricu del Navia, Valdés y el valle del Nalón. Estos proyectos van executar de 2023 a 2025 nuna ventena de conceyos nos que mora un terciu de la población asturiana.

Amás, los fondos europeos Next Generation procedentes de la convocatoria estraordinaria del Plan de Recuperación, Tresformamientu y Resiliencia, van dexar que’l Principáu destine 10,1 millones a acciones de cohesión territorial empobinaes a la recuperación d’elementos de valor natural y patrimonial, según a ameyorar la xestión de los fluxos turísticos en conceyos pequenos, con dificultaes sociodemográficas y escasa capacidá alministrativa pa xestionar un plan de sostenibilidá turística pola so cuenta. Asina, el Gobiernu d’Asturies va encarar directamente actuaciones d’eficiencia enerxética, dixitalización y desenvolvimientu de productos turísticos clave en San Martín d’Ozcos, Ayande, Degaña, Ibias, Amieva, Ponga, Ribedeva, Peñamellera Alta y Peñamellera Baxa.

Pela so parte, la enogastronomía, establecida como prioridá estratéxica para 2022 pola Conferencia Sectorial de Turismu, va cuntar con 1,8 millones pa impulsar la dixitalización, la eficiencia enerxética, la transición verde y la competitividá en Cuideiru, Candamo y Les Regueres.

D’últimes, les acciones del plan territorial 2022 van suponer inversiones en 32 conceyos pa impulsar la modernización del sector turísticu dende un puntu de vista sostenible.

Les principales característiques de los seis nuevos planes de sostenibilidá turística detállense de siguío:

Comarca Cinco Villes Baxu Nalón (1.860.134 euros)

El plan Baxu Nalón, un destín mui cerca de ti, que se va desenvolver en Muros de Nalón, Pravia y Sotu’l Barcu, recueye 20 actuaciones qu’inclúin l’acondicionamientu de dos tales naturales y del Camín de Santiago, según meyores d’eficiencia enerxética na sablera del Aguilar y el puertu de L’Arena, la renovación espositiva de los museos del Prerrománicu y del Salmón y la creación d’una oficina de turismu intelixente en Pravia.

Cabrales (1.996.506 euros)

El proyectu presentáu pol conceyu apuesta por buscar recursos naturales y culturales complementarios a la área de los Picos d’Europa, que sufre una mayor saturación de visitantes. Asina, va promover, ente otres actuaciones, la creación d’una petrina verde de rutes y un estudiu de movilidá qu’ameyore los fluxos de tráficu y l’aparcamientu.

Gozón (1.800.000 euros)

La iniciativa Con vistes al norte del norte plantega la puesta en valor del corredor ecolóxicu de Lluanco/Lluanco al cabu Peñes – faru de San Xuan, cola creación d’una gran sienda costera de 13,6 kilómetros.

Parque Históricu del Navia (3.998.750 euros)

El proyectu contempla 32 actuaciones en Bual, Cuaña, El Franco, Grandas de Salime, Eilao, Navia, Pezós, Tapia de Casariego y Villayón, empuestes a la recuperación ambiental de recursos turísticos, la meyora de la eficiencia enerxética y la digitalización del sector.

Valdés (1.348.200 euros)

El proyectu del conceyu inclúi, ente otres, actuaciones nes sableres del conceyu pa combatir los efectos del cambéu climáticu, propuestes pa llograr una xestión más sostenible del Xardín de la Fonte Baixa, la meyora de la eficiencia enerxética de los albergues públicos y un plan de movilidá sostenible pa la villa de L.luarca.

Valle del Nalón (3.677.700 euros)

El proyectu presentáu pola contorna qu’integren Casu, Llangréu, Llaviana, Samartín del Rei Aurelio y Sobrescobiu escuerre poner en valor el patrimoniu industrial que define la identidá del valle y xenerar espacios de turismu activu. Nel ámbitu de la dixitalización, plantega la creación de ferramientes que dexen recreaciones virtuales de la baxada a un pozu mineru o l’ascensu a un visu de más de 2.000 metros d’altor.

Los planes territoriales integraos nel Programa Estraordinariu de Planes de Sostenibilidá Turística en Destinos 2021-2023 configúrense como mecanismos d’actuación cooperada ente’l Gobiernu d’España, les comunidaes autónomes, les entidaes locales y el sector priváu, coles mires d’avanzar nel tresformamientu de los destinos turísticos dende un modelu participáu de gobernanza multinivel.