El PDR va cuntar con 28 millones adicionales procedentes del Fondo de Recuperación Next Generation UE.
El Principáu va cuntar anguaño con 122.740.329 euros para la execución de programes agrícoles, ganaderos y de desenvolvimientu rural. D’esta cifra, la mayor cuantía (122.108.463 euros) correspuende a les partíes nacionales para cofinanciar l’aportación del Fondu Européu Agrariu de Desenvolvimientu Rural (Feader) a los programes de desenvolvimientu rural (PDR) nel periodu de transición 2021-2022.
El conseyeru de Mediu Rural y Cohesión Territorial, Alejandro Calvo, participó güei na xunta telemática de la Conferencia Sectorial d’Agricultura y Desenvolvimientu Rural, presidida pol ministru d’Agricultura, Pesca y Alimentación, Luis Planas, na que s’alcordó la repartida.
Ente les novedaes, per primer vegada incorpórase nel PDR una partida del fondu de recuperación Next Generation EU, en concreto, daqué más de 28 millones adicionales que vienen de ún de los preseos d’esti fondu, el Mecanismu pa la Recuperación y la Resiliencia (MRR), que la so finalidá ye sofitar la inversión y les reformes pa favorecer la recuperación, de la que promueve les prioridaes ecolóxiques y dixitales marcaes pola Unión Europea.
Nel alcuentru, tamién s’aprobó la repartida de partíes del programa pa la meyora ganadera. Asturies va cuntar con 194.134 euros, de los que 104.607 son pal control oficial del rendimientu llecheru. Esta cantidá va permitir consolidar esti preséu, fundamental nel desenvolvimientu de los esquemes de selección del ganáu de lleche. Los otros 89.527 euros van dir destinaos al caltenimientu de la biodiversidá de races autóctones, pa sofitar a les asociaciones de races como l’asturiana de monte, la cabra bermeya o la oveya xalda.
Otra llinia importante en materia ganadero ye’l Programa Estatal de Erradicación d’Enfermedaes Animales. Los 380.755 euros asignaos al Principáu van permitir siguir la llucha contra la tuberculosis bovina, la brucelosis bovina o les encefalopatías esponxiformes transmisibles.
Amás, el Gobiernu d’España destina 36.977 euros a la sanidá agraria pa combatir les plagues y enfermedaes de los vexetales, como por casu la polilla guatemalteca (Tecia solanivora) o’l nematodo del pinu (Bursaphelenchus xylophilus).
Les ayudes pal fomentu de l’apicultura, que suponen 20.000 euros, permiten al sector ameyorar la situación de los truébanos.
El Gobiernu d’España aceleró la repartida de los fondos de la Unión Europea ente les comunidaes y comprometióse a entainar les tresferencies pa que les autonomíes puedan facer llegar los pagos a los beneficiarios lo primero posible.
