La conseyera de Presidencia, Rita Camblor, esplicó delles midíes que va poner en marcha’l so departamentu pa impulsar les polítiques de mocedá. Ente otres iniciatives, el Gobiernu d’Asturies va conceder subvenciones pal llogru del permisu de conducir y va anovar el carné mozu, que va incluyir más prestaciones. Amás, va amontar la cuantía de les beques empobinaes al asociacionismu y a la espresión artística.
Camblor, que visitó l’amuesa ODA del artista Adrián Prada en la sala Borrón, informó que les cuentes d’Asturies p’anguaño destinen 100.000 euros a sovencionar parte de los gastos que supon el llogru del permisu de conducir. L’oxetivu, destacó, ye “ameyorar la empleabilidá de la mocedá”. La posesión del carné ye un requisitu frecuente nes ufiertes llaborales.
Nesta mesma llinia, la conseyera avanzó que la convocatoria d’ayudes destinada a entidaes xuveniles va incluyir 20.000 euros p’ameyorar equipamientos.
Pel so llau, el carné mozu va anovar tanto la so imaxe como les sos prestaciones, D’equí p’arriba, va llograse con una tramitación más senciella y de forma gratuita. “Tamién tamos trabayando pa que esti documentu dexe l’accesu gratuitu o en condiciones bien ventaxoses a servicios culturales, deportivos, d’ociu o de movilidá”, manifestó la conseyera.
