Asturies volverá ser protagonista na próxima edición de La Vuelta a España con dos llegaes n’altu a Cuitu Negru (L.lena) y los llagos de Cuadonga (Cangues d’Onís) los díes 1 y 3 de setiembre, y el pasu per Degaña y Cangas del Narcea el 31 d’agostu. La viceconseyera de Turismu, Lara Martínez, y la directora xeneral d’Actividá Física y Deporte, Manuela Fernández, representaron esta tarde a Asturies na presentación del programa de la ronda ciclista pa 2024.
La Vuelta va llegar a Asturies el 31 d’agostu, cuando nel intre de la etapa 14 con salida en Villafranca del Bierzo y llegada a Vil.lablinu, los corredores entren nos conceyos de Degaña y Cangas del Narcea con dos ascensos a los puertos de Zarréu, de tercer categoría, y L.leitariegos, de primera.
La siguiente xornada, el 1 de setiembre, la ronda va partir de L’Infiestu y va percorrer 142 kilómetros hasta terminar cola ascensión de categoría especial al Cuitu Negru, el techu de la estación d’esquí Valgrande-Payares, a 1.842 metros d’altitú. Antes, el pelotón tendrá de superar en dos veces l’altu de la Colladiella, de primera categoría, y el de San Emiliano, de tercera.
Tres un día de descansu en tierres asturianes, la tercer etapa que va ser pela comunidá va partir el día 3 de setiembre de Lluanco, que tamién debuta como puntu de partida na ronda. Los ciclistes tendrán d’encarar nesta segunda etapa asturiana 181 kilómetros, incluyíes les ascensiones al Fitu y Collada Llomena, de primera categoría, pa concluyir nos llagos de Cuadonga, unu de los puertos más emblemáticos del ciclismu, de categoría especial.
Lara Martínez resaltó’l calter turísticu del percorríu, “que volverá aprovechar l’escaparate de La Vuelta p’amosa-y al públicu los nuesos paisaxes de mar y monte, y les posibilidaes qu’esta orografía de contrastes ufierta a ciclistes y aficionaos al ciclismu”. Unes condiciones que marquen tamién la esixencia deportiva de les etapes asturianes y van convertir una vegada más en trés de les más esperaes polos telespectadores, como asocede edición tres edición.
