El programa de promoción d’Asturies al traviés de la so conectividad aérea va dexar que’l Principáu cunte con diez rutes internacionales directes en 2023, de les cualos ocho yá van tar operatives esta seronda. Asina, col empiezu de la nueva temporada empiecen a operar los vuelos a Ámsterdam, Bruxeles, Düsseldorf, Roma, Dublín y Londres Stansted, que se sumen a los que yá tán en marcha a Londres-Gatwick y París. Les conexones con Milán-Bérgamo y Lisboa van arrincar a finales de marzu.
D’esta miente, consolídase la mayor ufierta de vuelos internacionales na hestoria del aeropuertu asturianu, con ocho destinos a siete países, 19 salíes selmanales y casi 32.000 places mensuales. Amás, el Principáu va tener en primavera diez rutes ensin escales a ocho países europeos, con 28 salíes selmanales y una ufierta global de 47.000 asientos al mes.
Vueling yá ufiertaba rutes a Londres Gatwick y París Orly, a les que se suma nesta temporada una nueva conexón con Ámsterdam. Pela so parte, Ryanair ufierta agora vuelos a los aeropuertos de Bruxeles, Düsseldorf-Weeze, Roma Fiumicino, Dublín y Londres Stansted.
Amás, Volotea abrió esti mes la vienta de billetes a Milán-Bérgamo y Lisboa. La primer salida escontra la ciudá italiana ta afitada pal 30 de marzu de 2023, mientres que’l primer avión escontra la capital portuguesa va partir un día dempués, el 31. Dambos destinos van tener una frecuencia de trés salíes selmanales pel branu y dos pel iviernu.
Les conexones internacionales para esta seronda son les siguientes:
París-Orly. Llunes y vienres.
Londres-Gatwick. Llunes, miércoles, vienres y domingos.
Ámsterdam. Dende’l 30 d’ochobre, xueves y domingos.
Londres-Stansted. Dende’l 1 de payares, llunes, martes y sábados.
Dublín. Dende’l 2 de payares, miércoles y domingos.
Düsseldorf. Dende’l 3 de payares, xueves y domingos.
Roma. Dende’l 4 de payares, llunes y vienres.
Bruxeles. Dende’l 4 de payares, llunes y vienres.
