Asturies yá recicla mediu millón de mázcares sanitaries al día

Las fábriques de Therman y Olmar, en Xixón, producen esti material nun proyectu qu'aspira a surtir a otres comunidaes

0
760
Asturies yá recicla mediu millón de mázcares sanitaries al día

Asturies yá recicla de manera masiva mázcares pa usu sanitariu. Más d’una docena d’empreses, lideraes por Bioquochem, Therman y Olmar, permiten superar les mires iniciales y fabricar más de mediu millón d’unidaes al día. Col sofitu de la Conseyería de Ciencia, Innovación y Universidá, l’alianza empresarial pretende distribuyir de forma gratuita esti material, fundamental pa la protección contra’l COVID-19, a centros de toa España.

El proyectu Spain (Sistema Presurizáu Antiséptico Industrial y Neutru), como lu bautizaron los sos promotores, tien el so orixe na firma Bioquochem. La empresa encargóse de diseñar primeramente’l procesu de hixenización y esterilización. A esta iniciativa sumáronse de forma altruista dos compañíes de Xixón: Therman, que punxo a disposición los sos conocimientos, la so fábrica y el so personal pa la esterilización de les mázcares y empaquetáu, y Olmar, que realiza la fase final d’esterilización.

La producción supera’l mediu millón diariu de mázcares, pero podría aumentar hasta’l millón d’unidaes al día. El proyectu cunta coles mázcares recoyíes pol Serviciu de Salú del Principáu (Sespa) pal so reciclax, pero los promotores animen a tolos hospitales y personal sanitariu a facé-yosles llegar. Amás, soliciten la collaboración de los usuarios, yá que ye bien importante que les mázcares nun se ruempan al retirales de la cara. Tamién contactaron con otres comunidaes pa que puedan unviar estos dispositivos usaos y reciclalos.

L’oxetivu ye dotar de mázcares a los centros que lo precisen en toa España. La iniciativa precisa, amás, de personal voluntariu pa poder proceder al empaquetáu y distribución. Por ello, va habilitase la páxina web www.proyectospain.com , onde van poder inscribise les persones que deseyen collaborar. El proyectu cunta cola collaboración de manera altruista de firmes como Normagrup, Inoxnalón, Tecnoenvases Álvarez, Asturiquimia, Proquiman, Inmicrosa, Ibersa, Grupu Ulma Packaging y Bartusol. Amás, contribúin l’Asociación d’Investigación d’Industries Cárnicas del Principáu ( Asincar) y Idonial y l’Universidá d’Uviéu, según la Delegación del Gobiernu n’Asturies, l’Exércitu y la Guardia Civil.