Xixón al día

Autor: xixonaldia

  • Barbón apuesta por defender la estensión de la gratuidá de la matrícula universitaria a tolos cursos a partir del próximu añu

    Barbón apuesta por defender la estensión de la gratuidá de la matrícula universitaria a tolos cursos a partir del próximu añu

    El presidente asturianu, Adrián Barbón, anunció la so intención d’estender la gratuidá de la matrícula universitaria a tolos cursos y en tolos graos de la Universidá d’Uviéu, siempres que s’algame un rendimientu académicu determináu en primer cursu. Esta midida va incluyise na negociación de los presupuestos de 2026, asinia que podría aplicase yá en septiembre d’esi añu, al entamu del próximu añu académicu.

    Na segunda xornada del alderique d’orientación política xeneral, el xefe del Executivu apostó por configurar un “auténticu sistema educativu públicu y gratuitu dende Les escuelines hasta rematar la formación universitaria”. Esti foi unu de los catorce nuevos compromisos asumíos por Barbón, tres los 52 qu’enunció na xornada d’apertura del alderique parlamentariu.

    Otru de los principales anuncios ta venceyáu a la vía fiscal asturiana, una ferramienta cola que’l Gobiernu d’Asturies espera algamar un aforru de 70 millones pa les clases medies y trabayadores nes declaraciones de la renta correspondientes a 2024. P’afondar nesta llinia, van aumentase les deducciones nel IRPF por fíu a cargu, que se van asitiar en 600 euros pol primer descendiente –na actualidá son 500- y en 2.200 pol segundu, frente a los 2.100 vixentes. La llende de renta p’aportar a estes ventayes afítase en 35.000 euros, en declaración individual, y en 45.000 en declaración conxunta.

    En relación col turismu, Barbón informó de que’l gobiernu va afaer la finca de Les Llanes, en Cuadonga, pa crear un aparcamientu disuasoriu cercanu a la basílica y una vía d’accesu piatonal.

    Igualmente, destacó qu’a partir del próximu cursu va aplicase la xornada de 23 hores selmanales pal cuerpu de maestros y que se va crear una unidá d’ictus nel Hospital San Agustín, colo que toles árees sanitaries van disponer yá d’esti serviciu. Dambes iniciatives empobínense al refuerzu del estáu del bienestar, a diferencia d’otres comunidaes “nes que va retrocediendo día ente día”, según llamentó’l presidente.

  • El nuevu Parque Comercial Ronda Roces va abrir les sos puertes al públicu’l sábadu 4 d’ochobre

    El nuevu Parque Comercial Ronda Roces va abrir les sos puertes al públicu’l sábadu 4 d’ochobre

    El nuevu Parque Comercial Ronda Roces, desenvueltu y xestionáu por Nhood, va abrir les sos puertes al públicu’l sábadu 4 d’ochobre. Allugáu na Avenida d’Uviéu, xunto al Alcampo, va poder esfrutase elli d’una xornada festiva pensada pa esfrutar en familia. Dende les 13:00 hasta les 19:30 hores, el parque va convertise nun espaciu d’alcuentru pa vecinos y visitantes, con actividaes gratuites pa toles edaes. L’aforu ye llimitáu según orde de llegada.

    L’apertura al públicu marca l’entamu d’una nueva etapa pa la contorna de Roces, consolidando un parque comercial que non solo va ampliar la ufierta comercial, sinón que tamién refuerza’l nuesu compromisu cola sostenibilidá, l’accesibilidá y la integración urbana.

    El proyectu, nel que Nhood lleva trabayando dende 2017, foi concebíu como un espaciu pensáu pa les persones y la redolada, y cuenta con reconocencies como la certificación BREEAM en diseñu y la preevaluación d’accesibilidá AIS. El parque yá acueye marques como McDonald’s, con zona infantil y serviciu McAuto; Kiwoko, especializada nel cuidu animal; Action cola so ufierta de decoración pa les cases y MediaMarkt. Estes apertures antemanen una ufierta comercial diversa y dinámica que se va dir completando nes próximes selmanes.

    Ye un proyectu que va suponer una meyora pa la vida cotidiana de la ciudadanía xixonesa, integrando comerciu, ociu y servicios nuna redolada urbana refecha, accesible y respetuosa col mediu ambiente. Nhood lideró’l desenvolvimientu, el branding y la estratexa comercial d’esti nuevu parque, asegurando’l so allugamientu y ésitu nel mercáu.

     

  • La marca ‘Alimentos del Paraísu Natural’ va promocionar na 39º edición d’Agropec con un mercáu y un espaciu gastronómicu

    La marca ‘Alimentos del Paraísu Natural’ va promocionar na 39º edición d’Agropec con un mercáu y un espaciu gastronómicu

    La marca de calidá Alimentos del Paraísu Natural va promocionar na 39ª edición de la Feria del Campu y de les Industries Agrícoles, Ganaderes, Forestales y Pesqueres (Agropec), en Xixón, con un mercáu con 22 productores y un espaciu gastronómicu, que se va desenvolver del 26 al 28 de setiembre nel Recintu Ferial d’Asturies Luis Adaro.

    La directora xeneral d’Agricultura, Agroindustria y Desenvolvimientu Rural, Begoña López, participó ayeri na presentación d’esti eventu, onde esplicó que la feria va cuntar cola participación de 22 profesionales que mientres la fin de selmana van poner a la venta productos como quesos, arándanos, cogordes, xelaos ellaboraos con lleche, conserves, ternera asturiana, miel, marañueles, embutíos, fabes y productos ecolóxicos.

    La feria preséntase como un puntu d’alcuentru ente profesionales, productores, instituciones, families y públicu xeneral, destacando la fusión d’innovación tecnolóxica y los valores de la sostenibilidá y la producción local.

    Con una amplia ufierta d’actividaes, esposiciones y esperiencies pa tolos públicos, Agropec 2025 perfílase como una de les feries más relevantes del país. Ente les actividaes más destacaes d’esta edición, los asistentes van poder esfrutar d’una esposición de güertes tanto profesionales como familiares, talleres y actividaes educatives sobre l’apicultura, un espaciu dedicáu a l’alimentación de proximidá con productos asturianos de calidá amparaos baxo la marca Alimentos del Paraísu Natural, y una amplia variedá d’exhibiciones de maquinaria agrícola y ganadera. Amás, la reciella va poder esfrutar d’una zona infantil con actividaes lúdiques y educatives, mientres que los adultos van poder asistir a los concursos y esposiciones de races autóctones d’Asturies.

    Amás, la feria va axuntar a exemplares de races autóctones como l’Asturiana de los Valles, Asturiana del Monte, Frisona, Xalda, cabra Bermella, Gochu Asturcelta, Pita Pinta Asturiana y Asturcón, ente otres, convirtiéndose nun escaparate únicu pa la promoción de la xenética y el caltenimientu de les races asturianes.

    Los concursos oficiales de ganáu, unu de los momentos más tradicionales d’Agropec, tamién van tar presentes nesta edición, con certames tan destacaos como’l 45º Concursu Nacional de la Raza Frisona Conafe 2025, el 35º Concursu Nacional de la Raza Parda y el VII Concursu Puya Nacional de Poni Asturcón. Estos concursos un solo busquen premiar a los meyores exemplares, sinón tamién resaltar la calidá xenética de los animales y el llabor de los ganaderos asturianos na preservación de les races autóctones.

    Agropec 2025 diferénciase pola so capacidá pa combinar la tradición cola innovación, promoviendo práctiques agrícoles respetuoses col mediu ambiente y fomentando la sostenibilidá del mediu rural. La feria conviértese nun puntu d’alcuentru pa los profesionales del sector y una cita d’ociu y formación pa les families y el públicu polo xeneral, que va poder esfrutar d’actividaes úniques y educatives al rodiu del mundu rural.

  • Barcelona acueye una conferencia sobre l’asturianu pa celebrar el Día Européu de les Llingües

    Barcelona acueye una conferencia sobre l’asturianu pa celebrar el Día Européu de les Llingües

    Esti vienres 26 celébrase’l Día Européu de les Llingües y el Centru Asturianu de Barcelona va acoyer una conferencia del escritor, periodista y miembru de l’Academia de la Llingua Asturiana, Inaciu Galán sobre la hestoria de la llingua asturiana. Titulada «La hestoria de la llingua asturiana en 60 minutos», la conferencia fai un repás pelos más de mil años d’hestoria del idioma, parándose en momentos d’importancia pa la la lliteratura, l’estudiu del propiu idioma o los momentos más complicaos pola represión llingüística exercida sobre los falantes en distintos momentos de la hestoria. 
     
    Aprovechando que la conferencia va facese en Barcelona l’académicu fadrá tamién dalgunes menciones a la rellación ente la llingua catalana y l’asturiana, nel ámbitu lliterariu, na traducción y nos llazos llingüísticos ente estes dos llingües romániques que vivieron momentos asemeyaos a lo llargo de la so hestoria, como llingües que carecieron procesos de minorización y discriminación. 
     
    La conferencia va celebrase esti vienres 26 de setiembre a les 19:30 hores nel Centru Asturianu de Barcelona, nel carrer Rafols 17, al que pue llegase nel bus B3=V7-H2- Y o nel FGC, Riena Elisenda salida Duquessa d’Orleans. 
     

    Inaciu Galán (Xixón, 1986) Periodista, escritor, profesor y xestor cultural, ye miembru de númberu de l’Academia de la Llingua Asturiana. Como activista foi fundador y presidente d’Iniciativa pol Asturianu, entidá que trabaya polos derechos llingüísticos y la normalización del asturianu. Pol so llabor a favor del asturianu foi reconocíu col Premiu Urogallo. 

    Doctor cum laude pola Universidá d’Uviéu cola investigación «La llingua asturiana nel Franquismu», el so llabor nel campu de la investigación y la divulgación lleváronlu a dirixir dellos documentales, ente los que destaquen «No se dice «ye», se dice «es». Represión llingüística na Asturies franquista», «Elles, muyeres na lliteratura asturiana» o «Pruebes d’autor. Les siete vides de Nel Amaro». Como escritor tien más d’una docena de llibros editaos, ente poesía, narrativa, lexicografía o ensayu, gallardonaos con, ente otros, el Premiu Fernán-Coronas de poesía y el María Josefa Canellada de lliteratura infantil.

    El so llabor nel ámbitu lliterariu llevólu a fundar y dirixir a la revista Formientu, y más recién, la Residencia Lliteraria Xixón. En 2018 fundó Cuatro Gotes Producciones, dende la que lleva alantre proyectos como la plataforma de creadores de contenníos n’asturianu PlayPresta, premiu Gava a la meyor anovación tecnolóxica nel campu audiovisual, o’l programa Mundu Sidreru (TPA), que presentó. Como periodista radiofónicu trabayó na SER y na RPA, onde dirixó’l programa d’entrevistes documentales «Asturies 81:21, la hora de l’autonomía», y nestos momentos presenta’l magacín «Sentir Asturies». Recibió’l Premiu Enriqueta González Rubín de periodismu.

  • Reconocimientu mundial pal técnicu xixonés Luis Enrique

    Reconocimientu mundial pal técnicu xixonés Luis Enrique

    El técnicu xixonés Luis Enrique foi reconocíu esti llunes col Trophée Johann Cruyff al meyor entrenador de la temporada 2024-2025. El premiu entregóse na gala del Ballon d’Or, entamada por France Football y la UEFA, onde se destacó la trayeCtoria y los llogros del entrenador asturianu.

    La celebración tuvo tamién otros nomes propios: el futbolista Dembélé, pupilu de Luis Enrique, recibió un reconocimientu especial, la catalana Aitana Bonmatí que volvió ser protagonista al alzase col Balón d’Oro.

    Pa la ciudá de Xixón, esti galardón tien un significáu especial, al poner de nuevu nel focu internacional a un de los sos referentes más conocíos del fútbol modernu.

  • David Uclés afonda na so obra na Residencia Lliteraria Xixón

    David Uclés afonda na so obra na Residencia Lliteraria Xixón

    La Residencia Lliteraria Xixón acueye nestes selmanes a un invitáu mui especial: l’escritor, dibuxante y músicu úbetense David Uclés. L’autor ta desendolcando un nuevu proyectu creativu nel marcu d’esta estancia, que s’estenderá hasta la fin d’ochobre.

    El direCtor de la Residencia, Inaciu Galán, señaló que la llegada d’Uclés supón «una oportunidá pa reforzar los venceyos ente Asturies y una de les voces más destacaes de la narrativa actual».

    Nacíu n’Úbeda en 1990, Uclés algamó gran ésitu con La península de las casas vacías, novela que superó los 200.000 exemplares vendíos y que lo consagró como referente d’una xeneración. Amás de la so reconocencia lliteraria, la so trayeutoria inclúi premios importantes y un públicu fiel que sigue cada pasu del escritor.

    Como parte de la so estancia en Xixón, Uclés participará nesta selmana en dos cites abiertes al públicu: la primera, esti domingu a les 17 hores en La Revoltosa, y la segunda a les 18:30 en Toma3. Nelles, l’autor compartirá reflexones sobre la so obra y l’andamiaxe del so nuevu proyectu, con conteníos sorpresa pa los asistentes.

    La so presencia na Residencia Lliteraria conviértese asina nun eventu cultural destacáu pa la ciudá, que reafita’l so papel como espaciu de creación y diálogu coles artes contemporánees.

  • Xixón glaya contra’l xenocidiu en Gaza

    Xixón glaya contra’l xenocidiu en Gaza

    La cai tornóse esti domingu en altavoz de la solidaridá. Coincidiendo col Día Internacional de la Paz, alredor de 2.000 persones xuniéronse en Xixón pa denunciar la ofensiva israelina sobre Gaza y pidir una salida xusta y pacífica pal conflictu.

    Baxo’l paragües, ente’l vientu y con banderes palestines que destacaben sobre’l gris del cielu, la marcha salió del paséu de Begoña y percorrió’l Muru hasta’l Puertu Deportivu. El movimientu Asturies pola Paz, que agrupa a decenes d’entidaes sociales, foi’l convocante d’esta movilización que convirtió la ciudá nun espaciu de denuncia y de memoria.

    Nun ambiente d’indignación pero tamién d’esperanza, repitíense consignes como «Palestina vencerá» o «Nun más negocios cola guerra». Pa munches de les persones asistentes, la movilización sirvió pa dar visibilidá a un conflictu que sienten borráu o tergiversáu nos medios oficiales.

    La diputada Covadonga Tomé, presente na marcha, destacó la necesidá de «poner la vida nel centru» y acusó a Israel de tar llevando a cabu un xenocidiu: «Tán destruyíos hospitales, escueles y privándose a tol pueblu palestín de los sos recursos básicos».

    L’afluencia y el tonu unánime de la protesta amuesen que, en Xixón, la solidaridá con Palestina sigue mui viva y nun se calla nin con fríu nin con agua.

  • El MUXA recupera los restos fósiles d’un gran dinosauriu saurópodu nos cantiles de Ribeseya

    El MUXA recupera los restos fósiles d’un gran dinosauriu saurópodu nos cantiles de Ribeseya

    La conseyera de Cultura, Política Llingüística y Deporte, Vanessa Gutiérrez, asistió ayeri a la recuperación de nuevos restos fósiles d’un gran dinosauriu saurópodu nos cantiles de Ribeseya. Esta intervención forma parte de la segunda campaña d’escavación que lleva a cabu l’equipu científicu del Muséu del Xurásicu d’Asturies (MUXA), en collaboración colos investigadores Pablo Puerta, del Muséu de Trelew (Arxentina), y Oliver Rauhut, paleontólogu especializáu en dinosaurios.

    Nesta ocasión treslladóse un bloque de gran tamañu cola escápula. Por cuenta de la dificultá d’accesu al yacimientu, el pesu de los bloques y el valor escepcional del material recuperáu, foi necesariu usar l’helicópteru del Serviciu d’Emerxencies del Principáu (SEPA) pa treslladalos dende’l cantil hasta la sablera de Vega. Dende ellí, el Conceyu de Colunga va encargase del so tresporte hasta’l MUXA. Amás, nes fases previes de la escavación, la Guardia Civil collaboró nel treslláu de ferramientes y materiales al llugar.

    L’equipu científicu del MUXA, formáu por José Carlos García-Ramos y Laura Piñuela, trabaya xunto con Puerta y Rauhut nesta segunda campaña, que da continuidá a la realizada en xunetu. Naquella primer fase yá se recuperaron delles vértebres caudales, un pubis, un isquion, una costiella completa, cuatro chevrones y un bloque con vértebres de la cola.

    Los trabayos nesti yacimientu van siguir el próximu añu. Valórase que van ser necesaries a lo menos dos o trés campañes más pa estrayer tolos restos fósiles d’esti dinosauriu saurópodu, un animal cuadrúpedu, herbívoru, de pescuezu y cola llargos, que’l so tamañu calcúlase nunos 20 metros de llargor, mayor de lo previsto primeramente.

  • El PSOE esixe a Foro habilitar un aparcamientu provisional nel solar de l’antigua nave de Flex

    El PSOE esixe a Foro habilitar un aparcamientu provisional nel solar de l’antigua nave de Flex

    El PSOE de Xixón esixe a Foro qu’entame les negociaciones cola propiedá de los terrenos de l’antigua nave de Flex p’habilitar un aparcamientu provisional nel solar una vez concluyida la demolición del edificiu. El edil socialista Tino Vaquero dio esti vienres una rueda de prensa na que desplicó que se trata d’una reivindicación vecinal que daría una solución temporal al problema d’estacionamientu na zona.

    “Jesús Martínez Salvador punxo como escusa que, al tratase d’un terrén priváu, el Conceyu nun tien competencia pa pidir o xestionar nada que tenga que ver con un usu provisional. Pero la realidá ye que’l Conceyu quitó-y un problema a la propiedá al demoler subsidiariamente la nave, pese a que podía facelo ella mesma al ser una entidá solvente. Podía obligase al bancu a reparar l’inmueble y, namás en casu de que los informes acreditaren una ruina física o económica, requerir la so demolición. En definitiva, fízos-y un favor al bancu: va entregar un solar llimpiu y llibre. Depués d’eso, el conceyal d’Urbanismu de Foro tien la obligación moral cola vecindá de negociar col propietariu’l usu provisional como aparcamientu”, señaló Vaquero.

    Los socialistes recuerden lo mesmo que nel Plenu d’abril: mientras nun se desarrolle l’ámbitu de Xixón Fabril, la propiedá va disponer d’un solar llimpiu, ensin usu, que col tiempu xenerará problemes asemeyaos a los que daba l’edificiu (suciedá, insalubridad…). “Cola nave en pie podíase dar un usu, pero una vez derribada y con un solar diáfanu, la propiedá nun va poder facer nada de mou inmediato hasta que se desarrolle l’ámbitu. Suponemos que la entidá propietaria nun tendrá problema en destinalu a aparcamientu provisional, muncho más si ye’l Conceyu quien se encarga d’adecenalu y caltenelu en bon estáu de llimpieza y conservación. Pensar lo contrario nun tendría sentíu”, añadió Vaquero.

    En casu de que la negociación fracase, dende’l PSOE sostienen que’l gobiernu llocal debería valorar la compra del terrén, lo que convertiría al Conceyu en propietariu más del ámbitu, pudiendo entamar los trámites con Sareb –que tien una parte de la parcela– y facer posible la construcción de cuasi 300 viviendes (con reserva pa VPO) y unos 6.000 metros cuadraos de zones verdes. “Plantegámoslo varies vegaes, pero yá sabemos que nin Foro nin PP miren igual a toles zones de Xixón. Pa la fastera oeste miren bien poco. Están dispuestos a espropiaciones na Ería, reclamen terrenes al Puertu… pero equí nun tienen les mesmes ganes d’invertir y cumplir cola vecindá”, zarró Vaquero.

    El Grupu Municipal Socialista avanzó que va elevar estes propuestes al traviés d’un ruegu na próxima Comisión d’Urbanismu, Obres Públiques y Mediu Ambiente, ya que los trabayos de demolición de la nave tarán remataos previsiblemente nel mes de payares.

  • Pintades homófobes y crítiques al Sporting amarguen la xornada en dos bares d’El Bibio

    Pintades homófobes y crítiques al Sporting amarguen la xornada en dos bares d’El Bibio

    Pintades homófobes y crítiques al Sporting amarguen la xornada en dos bares d’El Bibio

    Los establecimientos Luces de Bohemia, conocíu puntu de xuntanza de los aficionaos radicales sportinguistas, y la Taberna Irlandesa amanecieron esti domingu con pintades ofensives contra la comunidá LGTBI y mensaxes contrarios a Xixón y al Sporting.

    Dende la Taberna Irlandesa llamenten que «pagamos xustos por pecadores», y tamién vecinos de la zona amuesen el so cansanciu pola situación. Hosteleros y residentes coinciden en reclamar al conceyu midíes pa frenar “l’ambiente insoportable” que, según denuncien, se crea alredor d’El Bibio cada vegada que xuega’l Sporting en casa.