Xixón al día

Autor: xixonaldia

  • Facienda prepara una reforma del impuestu sobre la renta pa beneficiar a la gran mayoría social dende 2026

    Facienda prepara una reforma del impuestu sobre la renta pa beneficiar a la gran mayoría social dende 2026

    La Conseyería de Facienda trabaya dende va meses nuna reforma del impuestu sobre la renta de les persones físiques (IRPF) pensada pa beneficiar a la gran mayoría social d’Asturies: les clases medies y trabayadores. El titular d’esti departamentu y voceru del gobiernu, Guillermo Peláez, esplicó güei qu’esa midida va traer un cambéu de los tramos del tributu pa que les rentes medies y baxes paguen menos nel próximu exerciciu.

    “Bien llueu vamos alzar la propuesta al Conseyu de Gobiernu, porque la revisión de la tarifa del IRPF esixe un gran trabayu técnicu nel qu’agora tamos trabayando. En tou casu, el cambéu enmárcase na vía fiscal asturiana, que siempres busca beneficiar a la gran mayoría social”, precisó Peláez.

    El titular de Facienda recordó que dende qu’Adrián Barbón asumió la presidencia d’Asturies fuéronse introduciendo pasu ente pasu deducciones fiscales que traen beneficios pa les clases mediu y trabayador y que se traducen nun aforru tributariu de 70 millones. “La xusticia fiscal ye la llave de la xusticia social”, repitió’l conseyeru, quien alvirtió que los partíos de la derecha namás piden rebaxes pa les grandes rentes y los patrimonios más elevaos. “Ehí sí que nun nos van atopar”, afirmó.

    Per otru llau, el conseyeru encamentó a toles persones contribuyentes que, de cara al entamu de próxima campaña de la renta, revisen los borradores de la so declaración pa comprobar si pueden beneficiase de delles de les deducciones de la vía fiscal asturiana vixentes.

  • Olaya Suárez llamenta que la «prepotencia” del gobiernu local en movilidá vaya a provocar la perda d’ayudes al tresporte pa les xixoneses

    Olaya Suárez llamenta que la «prepotencia” del gobiernu local en movilidá vaya a provocar la perda d’ayudes al tresporte pa les xixoneses

    La vocera de Podemos nel Conceyu de Xixón, Olaya Suárez, cuestionó esti martes la «prepotencia” y el «negacionismu” del gobiernu municipal nes sos polítiques de movilidá,
    dempués de facese patente que’l planteamientu d’una zona de baxes emisiones (ZBE) ensin aplicar sanciones reales va tener de resultes la perda de les ayudes estatales pa rebaxar el preciu del tresporte públicu.

    Suárez enfeó asina la pretensión del executivu local de que seya’l Ministeriu de Tresportes
    quien modifique la normativa en llugar de cumplila dende Xixón, y tamién calificó de demagoxa barata querer amestar la puesta en marcha de la zona de baxes emisiones al vial de Jove”.

    La edil morada recordó que “dende la oposición llevamos meses denunciando qu’esta idea de ZBE fake nun respeta l’espíritu de la normativa y nun amenorga les emisiones contaminantes”, llamentando que “vamos en dirección contraria a toles ciudaes europees, y esto va costar la salú a toles persones que vivimos en Xixón y n’especial na zona oeste”.

    D’esta miente, Podemos Xixón rexistró una entruga pa la Comisión de Seguridá Ciudadana, Tráficu y Participación del vienres 28, con cuenta de que’l gobiernu local esplique si va implementar un réxime sancionador d’aplicación inmediata y si, de lo contrario, va asumir
    la responsabilidá de que xuba’l preciu del autobús pa la ciudadanía o la sufragará con cargu a les arques municipales.

  • El IV Congresu Mundial d’Asturianía va celebrase en Villaviciosa del 7 al 9 de payares

    El IV Congresu Mundial d’Asturianía va celebrase en Villaviciosa del 7 al 9 de payares

    El Gobiernu d’Asturies va celebrar na seronda la IV edición del Congresu Mundial d’Asturianía, el principal foru d’alcuentru ente la comunidá asturiana nel esterior y les instituciones del Principáu. va desenvolvese los díes 7, 8 y 9 de payares en Villaviciosa sol lema Asturies, lo que nos xune.

    La vicepresidenta Gimena Llamedo presidió la primer xunta del comité organizador, na que se decidió nomar presidente d’honor a Antonio Trevín, en reconocencia a la so dilatada trayectoria venceyada a la emigración y a la so participación na organización de congresos mundiales d’asturianía anteriores.

    Esti foru tien como finalidá reforzar los llazos ente les comunidaes asturianes del esterior, promover l’intercambiu d’esperiencies y definir llínees d’acción conxuntes pa los próximos años.

    L’alcuentru ta llamáu a axuntar n’Asturies a representantes de los centros y comunidaes asturianes de tol mundu -37 con reconocencia oficial d’Asturianía, 19 n’España y 18 nel estranxeru-, mesmo qu’a otres entidaes venceyaes a la emigración asturiana. Amás, van asistir personalidaes ya instituciones rellacionaes cola acción esterior d’Asturies.

    La Dirección Xeneral d’Emigración ye la encargada de coordinar el desenvolvimientu del Congresu, que les sos ponencies y temes van ser propuestos y aldericaos primeramente polos miembros del Conseyu de Comunidaes Asturianes y el comité organizador y científicu.

    La celebración del Congresu supón un finxu na política d’emigración del Gobiernu d’Asturies, al favorecer un espaciu de diálogu intergeneracional, reconocer el papel clave de los centros asturianos na promoción esterior del Principáu y avanzar nel fortalecimientu de los venceyos culturales, sociales y afeutivos ente la comunidá y la ciudadanía asturiana que vive nel esterior. Coles deliberaciones del eventu ellaborará un documentu de conclusiones que se va treslladar a dichu Conseyu como fueya de ruta pa l’acción esterior d’Asturies.

  • Mas de 2300 persones participaron na sesta edición del POEX

    Mas de 2300 persones participaron na sesta edición del POEX

    Un total de 2.346 persones participaron nes 36 actividaes propuestes. El Festival Poesía en Xixón POEX consolídase como’l principal programa lliterariu de la ciudá del primer trimestre del añu.

    El Festival Poesía en Xixón POEX, entamáu pola Fundación Municipal de Cultura, Educación y Universidá Popular de Xixón y que cunta cola Dirección lliteraria de Jaime Priede, zarró la so sesta edición el pasáu sábadu con un total de 2.346 participantes nes sos distintes actividaes. Esta edición presentó una amplia programación con un total de 36 actividaes, que tuvieron llugar mientres diez díes ente’l 13 y el 22 de marzu. El gruesu de les actividaes celebráronse nel Centru de Cultura Antiguu Institutu, l’Antigua Escuela de Comerciu y parte de la programación tamién tuvo llugar nel Toma 3, Llaboral Centru d’Arte y Creación Industrial, Teatro Xovellanos y el CMI El Llano.

    “Vínculos entre poesía y cine: ver más” foi’l lema col que se concibió esta sesta edición de POEX, un festival de poesía que nun se llinda namá al llibru de poemes, sinón a la dimensión poética na so totalidá pa venceyar esta y la so creación colos distintos públicos actuales.

    La organización ta mui satisfecha pola buenísima rempuesta del públicu, quién cubrieron la totalidá del aforu en munches de les actividaes del programa, lo que demuestra que POEX ye un festival que s’anueva y fortalez, y que yá ta dafechu asitiáu nel calendariu cultural de la ciudá.

    Esta edición volvieron realizase una serie d’actividaes sol títulu d’AULA POEX, lo que dexó llevar a la comunidá escolar dellos alcuentros con autores baxu distintos formatos como talleres o llectures compartíes.

  • L’usu del tresporte públicu n’Asturies aumenta un 22%

    L’usu del tresporte públicu n’Asturies aumenta un 22%

    El tresporte públicu gana viaxeros n’Asturies a bon ritmu gracies al impulsu de la tarxeta CONECTA. Según los datos del Consorciu de Tresportes d’Asturies (CTA), un total de 6.276.127 persones optaron por esta alternativa pa movese mientres los dos primeros dos meses del añu, un 22% más que nel mesmu periodu de 2024. D’ellos, el 86,6% utilizaron la tarxeta que CONECTA, que dexa movese por tola comunidá en tresporte públicu por un máximu de 30 euros al mes.

    El conseyeru de Movilidá, Cooperación Local y Xestión d’Emerxencies, Alejandro Calvo, facilitó güei estos datos na xunta del conseyu d’alministración del CTA, na qu’informó tamién de la crecedera de CONECTA, con 16.656 tarxetes solicitaes ente xineru y febreru y un total 287.268 operatives.

    “Los datos son apolmonantes y constaten la impresionante respuesta de la ciudadanía énte un apueste firme y bien ambiciosa pola movilidá sostenible como ye CONECTA”, aseguró’l conseyeru. “Fuimos pioneros y referentes nel modelu de billete únicu y les cifres reflexen una evolución espectacular, qu’avera cada vez más el tresporte públicu a la población, que lo valora como un serviciu calidable y crucial nos sos día ente día”, añedió. Calvo reafitó’l compromisu del Gobiernu d’Asturies pa siguir trabayando nesa llinia y ameyorar la ufierta y les prestaciones d’esti serviciu.

    Según los datos d’usuarios del tresporte públicu n’Asturies, el ritmu de crecimientu nel últimu añu cuadruplica la media nacional, que l’Institutu de Nacional d’Estadística (INE) asitió nun 4,5% en xineru pal tresporte urbanu. Febreru, últimu mes zarráu nes estadístiques del CTA, rexistró 3.132.175 viaxeros, de los que 2.734.362 validaron los sos trayectos con CONECTA.

    Amás del so apueste por esti serviciu, l’Executivu autonómicu tien en marcha una inversión global de más de 20,5 millones procedentes de fondos europeos p’ameyorar les infraestructures venceyaes al tresporte.

  • Xixón Sound Festival calienta motores con Biznaga como principal atractivu

    Xixón Sound Festival calienta motores con Biznaga como principal atractivu

    El Xixón Sound Festival 2025 torna a la ciudá con una programación vibrante y ecléctica que promete enllenar de música y cultura les sos cais y escenarios. Del 4 al 6 d’abril, Xixón va convertise nel epicentru d’un eventu que, añu tres d’añu, foi consolidándose como una de les cites ineludibles pa los amantes de la música.

    Esti añu, el festival ufierta un cartelu diversu que toma una amplia gama de xéneros, dende’l ska y el reggae hasta’l post-punk y el rock alternativu. Ente los nomes más destacaos ta Mungo’s Hi Fi feat Eva Lazarus, l’aclamáu sound system escocés que va traer el so enérxicu espectáculu al pie de la potente voz d’Eva Lazarus. La so actuación na Plaza del Conceyu, el vienres 4 d’abril, promete ser una de les más memorables del festival.

    Otra banda que va xenerar grandes mires ye Les Testarudes, una formación barcelonesa compuesta por nueve muyeres que funden ska y reggae con una puesta n’escena enérxica y reivindicativa. La so actuación, tamién na Plaza del Conceyu, va ufiertar un espectáculu cargáu de ritmu y mensaxe social.

    Pero la cita grande d’esti añu va ser pa los amantes del punk rock, que van tener una cita obligada con Biznaga, la banda madrilana que va presentar el so últimu álbum, «¡Ahora!», el sábadu 5 d’abril. La so música, cargada de lletres caltriantes y soníu eléctricu, foi aclamada na escena alternativa nacional ya internacional.

    Dende’l Reinu Uníu va llegar Deadletter, un grupu de post-punk que captó l’atención pol so soníu visceral y les sos enérxiques presentaciones en vivu. Con una propuesta que combina crítica social y ritmos hipnóticos, la so participación nel festival espérase con gran entusiasmu.

    Pela so parte, Carlangas, el carismáticu artista gallegu, va traer el so nuevu trabayu en solitariu, «Bailódromo, Vol. 1». Conocíu pol so pasu por Novedades Carminha, Carlangas supo reinventase con un estilu frescqu y bailladeru, qu’ensin dulda va poner a baillar al públicu xixonés el vienres 4 d’abril.

  • El llobu asturianu sal del LESPRE

    El llobu asturianu sal del LESPRE

    Nel día d’ayeri, el Congresu de los Diputaos aprobó la Llei contra’l desperdiciu alimentariu,
    incluyendo una disposición final nel sentíu de retirar la protección especial del llobu al norte del ríu Dueru por mediu del cambéu del anexu del Real Decreto 139/2011, de 4 de febreru, pal desenvolvimientu del Llistáu d’Especies Monteses en Réxime de Protección Especial y del Catálogu Español d’Especies Amenaciaes (LESPRE).

    La Conseyería de Mediu Rural y Política Agraria va aconceyar el 10 d’abril al Comité Consultivu del Llobu pa informar sobre’l programa añal d’actuaciones de control de la especie. Tres esi alcuentru, l’Alministración autonómica va publicar nel Boletín Oficial del Principáu (Bopa) el resolvimientu que va abrir la vía pa la estracción d’exemplares en zones conflictives.

    El Gobiernu d’Asturies tomó esta decisión en conociéndose l’alcuerdu adoptáu esta mañana pol Congresu de los Diputaos que da lluz verde a la esclusión del llobu del Llistáu d’Especies Monteses en Réxime de Protección Especial (Lespre). Esta midida va dexar volver aplicar el plan de xestión de la especie en tolos sos términos, incluyíos los controles de población, paralizaos dende 2021.

    La salida del llobu del Lespre foi recibida con prestu pol Executivu autonómicu, que dende’l principiu amosárase contrariu a otorgar un grau de protección tan alzáu a esti cánidu. L’Executivu siempres defendió la mesma postura: l’aplicación del plan de xestión autonómicu, que dexa la coesistencia de la especie cola práctica de la ganadería estensiva.

    El llobu ocupa anguaño’l 83% del territoriu asturianu y ta conectáu col de les autonomíes vecines. El so hábitat, que toma una superficie de 8.300 kilómetros cuadraos, asegura la sostenibilidá de la especie y garantiza el so favorable estáu de caltenimientu.

    Asturies cunta agora con 45 menaes, de les cualos 42 son reproductores, de cuenta que la población envalorada asitiar ente los 360 y los 405 exemplares. Esta cantidá supon una crecedera del 18,4% si comparar colos datos del períodu 2013-2018 y consolida l’enclín d’espansión de la especie.

  • El PSOE alerta de la posible perda definitiva de la fonte d’Isabel II

    El PSOE alerta de la posible perda definitiva de la fonte d’Isabel II

    El PSOE denuncia l’estáu d’abandonu que presenta la fonte d’Isabel II allugada na parroquia de Cabueñes. El conceyal del Grupu Municipal Socialista, Ramón Tuero, visitó esti enclave patrimonial tres solicitar acciones urxentes el pasáu mes d’ochobre en comisión. “La fonte sigue igual. El gobiernu aceptó’l ruegu, pero fixeron casu omisu. Ta dafechu abandonada y vandalizada y, si nun la reparen con urxencia, el so deterioru puede ser irrecuperable”, llamenta’l conceyal.

    Tuero, qu’amuesa la so esmolición pola perda definitiva de la citada muerte hidráulica, volverá treslladar a la Comisión d’Obres Públiques del vienres la necesidá de restaurar la fonte, que construyó l’arquitectu Juan Miguel de la Guardia en 1867. “Poro, ye un conxuntu etnográficu centenariu qu’inclúi tamién bebederu y llavaderu. Magar del so valor históricu, el gobiernu dexó que tea prácticamente en ruina”, añede’l conceyal de la qu’esplica que l’abandonu de la fonte ta contribuyendo a la degradación de la zona, pasáu de ser un llugar comuñal pa tresformase en “un llugar de conflictos y molesties vecinales” colos conocíos botellones y carreres illegales qu’ellí se practiquen.

    Los socialistes denuncien qu’esta situación evidencia la falta d’interés del Executivu local por protexer el patrimoniu históricu de Xixón. “El so despreciu pola hestoria y la identidá de los y les xixoneses ye absoluta” -aportuna Tuero-. “Pidimos-yos que dexen de mirar pa otru llau y asuman les sos responsabilidaes

  • El fueu vuelve a Asturies con una decena de quemes

    El fueu vuelve a Asturies con una decena de quemes

    A esta hora contabilícense n’Asturies una decena de quemes forestales nos conceyos de Cangues d’Onís, Cangas del Narcea, L.lena, Llanes, Morcín, Piloña, Valle Altu de Peñamellera, Ribadeva, Tameza, Tinéu y Valdés.

    Efectivos de Bomberos del Serviciu d’Emerxencies del Principáu d’Asturies (SEPA) permanecen trabayando a estes hores nes quemes alcontraes na Sierra del Valledor, en Cangas onde tamién ta movilizaes dos cuadrielles d’empreses forestales y personal de la Guardería del Mediu Natural del Principáu y nel de la localidá de Mones en Valdés xunto a una empresa forestal. Amás, movilizóse una dotación del parque de Tinéu pa otru focu alcontráu na zona de Bustellán nel mesmu conceyu de Tinéu. Nel oriente los bomberos tuvieron hasta les 5.30 de la madrugada movilizaos na quema en Ruenes, Valle Altu de Peñamellera, que xunto al restu de fueos rexistraos na comunidá van ser revisaos a lo llargo de la mañana.

    Visto’l númberu de quemes forestales declaraos na nueche d’ayeri y daes les condiciones meteorolóxiques previstes, con vientos de componente sur y raches d’hasta 110 kilómetros per hora na Cordelera y Picos d’Europa, el conseyeru de Movilidá, Cooperación Local y Xestión d’Emerxencies, Alejandro Calvo, declaró a les 21.40 hores, el pasu a fase d’emerxencia en SITUACIÓN 0, del Plan de Quemes Forestales del Principáu d’Asturies (INFOPA). Esta situación, la más baxa de los cuatro que contempla’l plan, vien provocada pola esistencia d’una o delles quemes forestales simultáneos que pueden ser controlaos colos medios y recursos asignaos al plan.

  • La Comisión Europea informa al Gobiernu d’Asturies de que va primar el consumu d’aceru fabricáu na UE

    La Comisión Europea informa al Gobiernu d’Asturies de que va primar el consumu d’aceru fabricáu na UE

    La Comisión Europea va primar el consumu d’aceru producíu na UE y l’usu de productos y subproductos qu’utilicen aceru comuñal, según treslladó esta mañana’l director responsable d’Industries Electrointensives de la DG Grow, Joaquim Nunes de Almeida, a la conseyera de Transición Ecolóxica, Industria y Comerciu, Belarmina Díaz.

    Na xunta, el responsable de la UE informó a Díaz de que la Comisión Europea tien ente les sos prioridaes al curtiu plazu primar les producciones europees y desenvolver la normativa que la sofite. La conseyera, nesti sentíu, treslladó-y la necesidá de que Bruxeles implemente o visibilice con calter d’urxencia les midíes del Clean Industrial Deal presentáu en febreru, y les incluyíes nel Plan del Aceru y los Metales que se van conocer mañana.

    «Creemos que’l problema ta identificáu pola UE, son sensibles a la problemática y tán trabayando en llevar a cabu midíes al curtiu plazu, pero tresllademos la necesidá de qu’eses midíes desenvuélvanse cuanto antes o tengan visibilidá cuanto antes», esplicó la conseyera.

    «La Comisión Europea esplicónos que les midíes recoyíes nel Pactu Llimpiu Industrial respectu al aceru europeo y los productos fechos con aceru europeo ye una de les sos prioridaes pa desenvolver en 2025 y la lexislación que la acompaña. Ye fundamental qu’Europa consuma preferentemente los productos que provengan d’Europa», precisó Díaz.

    La conseyera tamién caltuvo un alcuentru de trabayu con responsables de la DG Ener, con quien encetó la necesidá de caltener les polítiques de transición xusta y les ferramientes y programes de sofitu a les rexones que como Asturies tán más afectaes pol procesu de descarbonización. Coles mesmes, tamién s’axuntó con Oriol Escalas, responsable d’industria y enerxía de la Representación Permanente d’España énte la UE.