Xixón al día

Autor: xixonaldia

  • La mayor ufierta pública d’empléu d’Asturies va ser de 2.063 places

    La mayor ufierta pública d’empléu d’Asturies va ser de 2.063 places

    El Gobiernu d’Asturies aprobó la Ufierta Pública d’Empléu (OPE) de 2024, una de les más importantes na hestoria recién de l’Alministración autonómica, con un total de 2.603 places. Esta OPE, que supón un pasu decisivu na modernización y ordenación de los recursos humanos d’Asturies, da cumplimientu a la Llei 2/2024, de 15 de marzu, d’Empléu Públicu.

    La OPE de 2024 s’estructura en dos grandes exes prioritaries:

    • Procesos de funcionarización por promoción interna horizontal

    Coles mires de afaer les plantiyes a les previsiones de la Llei d’Empléu Públicu, ufiértense 910 places pa tresformar puestos de personal llaboral fixu en places funcionariales, según les funciones desempeñaes. Esti procesu va dexar regularizar puestos históricamente llaborales como los siguientes:

    • Bomberos y otros profesionales del Serviciu d’Emerxencies del Principáu (Sepa).
    • Inxenieros informáticos ya inxenieros técnicos informáticos.
    • Personal que fai funciones de cuerpos xenerales (el grupu más numberosu ye’l d’ordenances).
    • Profesionales de los servicios sociales que faen funciones alministratives: trabayadores sociales, educadores sociales y psicólogos.

    Esti cambéu nun implica una medría de personal, sinón una reordenación, en llínea colos principios establecíos pola normativa d’empléu públicu. La funcionarización articúlase al traviés d’una promoción interna horizontal por concursu oposición.

    • Renovación y modernización de plantiyes, atracción de talentu y nueves polítiques

    En total, ufiértense 1.693 places destinaes a reforzar árees estratéxiques y cubrir necesidaes estructurales. Por ámbitos de xestión de recursos humanos de l’Alministración, los sos organismos y entes públicos, la ufierta pública s’estructura asina:

    Places de personal funcionario y de personal llaboral: 872 places, ente les que destaquen:

    • 120 places de técniques d’educación infantil pa la rede autonómica de Les Escuelines/As Escolías.
    • 125 places de bomberos y coordinadores operadores del 112.
    • 36 places d’inxenieros ya inxenieros técnicos informáticos y otros cuerpos pa la Dirección Xeneral d’Estratexa Dixital ya Intelixencia Artificial.
    • 37 places d’axentes medioambientales y 15 de vixilantes del territoriu pa la custodia del territoriu.
    • 144 places d’alministrativu, 33 por vez llibre y 111 por vez de promoción interna, col fin de dar cumplimientu a lo previsto na disposición adicional decimonovena de la Llei d’Empléu Públicu, que busca consolidar un modelu d’alministración con cuerpos de mayor nivel de competencies, facilitando la promoción interna de los funcionarios del cuerpu auxiliar.
    • 129 places d’auxiliar d’enfermería pa la ERA.
    • 38 places de operariu agroganaderu y d’obres públiques, especialmente pal Serviciu de Caltenimientu de Carreteres.

    Nel ámbitu docente, la ufierta final ye la siguiente:

    • 324 places de maestru.
    • 20 places de profesores especialistes de Formación Profesional (FP).
    • 9 de profesores de les escueles d’idiomes.
    • 8 d’inspectores d’Educación.

    Nel ámbitu del personal estatutario del Serviciu de Salú (Sespa), tamién pa la renovación de plantiyes y cobertoria de perfiles necesarios pal serviciu d’atención, destaquen:

    • 74 places de facultativos de distintes especialidaes
    • 18 places de medicina d’urxencies.
    • 22 places de medicina de familia.
    • 7 places de pediatría.
    • 44 places d’enfermería.
    • 21 places de grupu alministrativu de la función alministrativa.
    • 16 places de técnicu especialista de radiodiagnósticu.
    • 17 places de técnicu especialista de llaboratoriu.
    • 144 places del grupu auxiliar alministrativu de la función alministrativa.
    • 70 places de técnicu/a en cuidos auxiliares d’enfermería (TCAE)
    • 20 places de celador/a.

    L’aprobación d’esta ufierta supunxo una intensa negociación nel marcu de la Mesa Xeneral de l’Alministración, con xuntes celebraes ente payares y avientu de 2024.

  • Felipe VI felicita en catalán, gallegu y vascu, pero escaez de nuevo l’asturianu

    Felipe VI felicita en catalán, gallegu y vascu, pero escaez de nuevo l’asturianu

    L’asturianu volvió, un añu más, a tar ausente nel discursu de Navidá del rei Felipe VI. El xefe del Estáu utilizó, amás del castellán, les diferentes llingües oficiales na so comunicación. Como ye vezu, Iniciativa pol Asturianu reclama la presencia del asturianu dientro d’esti mensaxe nel que sí apaecen el restu de llingües oficiales d’España. Nesi sen, la organización apunta que ‘ye conveniente recordar qu’anque la llingua asturiana entá nun seya oficial si ta reconocida nel Estatutu d’Autonomía del Principáu d’Asturies; la propia Constitución Española, nel so artículu 3, reconoz que la riqueza de les distintes modalidaes llingüístiques d’España ye un patrimoniu cultural que será oxetu d’especial respetu y protección’. Por esti motivu, el colectivu de reivindicación llingüística considera que’l monarca arrequexa al asturianu na so felicitación de les fiestes navidiegues por utilizar esclusivamente les llingües oficiales

     

    L’asociación considera que l’usu del idioma nesti mensaxe tendría un papel visibilizador y normalizador; amás de tar en condiciones d’igualdá col restu de llingües del Estáu.

     

    Iniciativa pol Asturianu solicita al xefe del Estáu qu’amuese respetu por toles llingües d’España, independientemente del so estatus llegal, yá que los y les asturianes tenemos el mesmu drechu a que les nueses llingües apaezan xunto a les demás nes pallabres del cabezaleru del Estáu al que pertenecemos.

    Iniciativa pol Asturianu ye una asociación ensin porgüeyu económicu que nun recibe ayudes nin sovenciones públiques. Llevamos más d’una década trabayando pola normalización social de les nueses llingües y pol reconocimientu de los drechos llingüísticos de los sos falantes. Trabayamos p’algamar espacios de normalidá pa la llingua asturiana, al traviés d’acciones concretes que mos permitan llegar a alcuerdos con entidaes de toa triba que supongan afitar l’usu del asturianu n’ámbitos nuevos. D’igual manera, buscamos consensos y alcuerdos sobre l’usu del asturianu, faciendo usu de campañes reivindicatives nes situaciones nes que ye necesario.

  • Asina van ser los horarios de los autobuses de Xixón en Nuechebona y Navidá

    Asina van ser los horarios de los autobuses de Xixón en Nuechebona y Navidá

    En Nuechebona y la Navidá, y pa facilitar la conciliación familiar de la so plantiya, EMTUSA va acurtiar como vien siendo habitual per estes feches l’horariu de serviciu de les sos llinies. Esti martes 24 d’avientu, la postrera salida dende toles cabeceres va ser a les 20 hores, magar hai delles escepciones:

    Horarios de EMTUSA pa Nuechebona y Navidá

    -Llinia 2 (El Corte Inglés-Hospital de Cabueñes). L’últimu autobús en sentíu escontra l’hospital va empecipiar el so percorríu a les 19.45.

    -Llinia 14 (Sotiello-L’Infanzón). Va salir de Porceyo a les 20.00 va rematar el so percorríu n’Álvarez Garaya.

    -Llinia 24 (San Andrés/Montiana-La Pedrera/Mareo). Van salir de Monteana y La Pedrera a les 19.50 y esti postreru va regulase con otres llinies na plaza d’Europa a les 20.15.

    -Llinia 25 (Tremañes-L’Infanzón). La postrer salida dende Tremañes y dende L’Infanzón va ser a les 19.30, regulándose esta postrera al altor d’Álvarez Garaya a les 20.00.

  • La cueva de La Lluera vuelve abrir dende’l próximu sábadu

    La cueva de La Lluera vuelve abrir dende’l próximu sábadu

    La Conseyería de Cultura, Política Llingüística y Deporte va reabrir al públicu’l próximu sábadu, día 28 d’avientu, la cueva de La Lluera, nel conceyu d’Uviéu. Van ufiertase visites guiaes hasta la primavera.

    El públicu va poder esplorar esti importante yacimientu arqueolóxicu los sábados y los domingos, con grupos llendaos a un máximu de seis persones por pase. Les visites van realizase n’horariu de mañana y podrán acutar, de miércoles a domingu, nel horariu de 15:00 a 17:00 hores, al traviés del teléfonu 684 800 385.

    Les reserves yá tán disponibles dende esti sábadu, 28 d’avientu, y les primeres visites van celebrase esa mesma xornada y el domingu 29.

    Pa llegar a La Lluera, encamiéntase dexar el coche nel aparcamientu al pie de la ilesia de Priorio, yá que na localidá de San Xuan nun hai espaciu abondu para aparcar. Dende ellí puede empecipiase un paséu d’aprosimao un kilómetru hasta’l caseríu de San Xuan de Priorio. Una vegada nel pueblu, tómase una sienda descendente que pasa per enriba del ríu Nalón y conduz hasta la finca que da accesu a la cueva. Esti percorríu, que se completa nunos 25 minutos, dexa esfrutar de la guapura natural de la zona.

    Encamentar a les persones interesaes en visitar la cueva que lleven calzáu afayadizu, como zapatielles o botes de monte, pa facer más cómoda la caminata hasta’l yacimientu.

  • Xixón tien 7 hermanes pel mundu

    Xixón tien 7 hermanes pel mundu

    Xixón tien hermanes per tol mundu. Son, concretamente, siete les ciudaes que tan hermanaes cola ciudá de mayor población d’Asturies. El conceptu d’hermanamientu de ciudaes’ creóse n’Europa tres la Segunda Guerra Mundial. L’oxetivu yera que ciudaes que nun teníen nada que ver pudieren estrechar llazos y fomentar una bona relación. Pero non solo n’Europa, yá qu’Eisenhower, presidente d’Estaos Xuníos, creó’l movimientu de Ciudaes Hermanes Internacional en 1956, lo qu’ayudó a afitar esta tradición.

    La ciudá cuenta entós con siete ciudaes hermanaes per tol mundu. La primera foi en 1977 y ye Albuquerque, nos Estaos Xuníos. Más tarde, nos años 80, Xixón hermanóse con Niort, en Francia (1983) y con una daqué remota, Novorossiysk, en Rusia (1986). Yá en 1998, los playos diben volver hermanase con otres dos ciudaes. D’una banda, Puerto Vallarta, en México, y d’otra Smara, nel Sahara Occidental. Cola entrada nun sieglu nuevu, aportó un hermanamientu nuevu y nel añu 2006 Xixón hermanóse con Alghero.

    En 2023, llegó la última incorporación a la colección d’hermanes, Yantai, en China. Yantai cunta con una superficie de 13.739 kilómetros cuadraos, na provincia de Shandong, ente Pequín y Xangai, arrodiada de montes y mar, con una mariña de 1.038 kilómetros, una población de 7,2 millones d’habitantes. Ye una de los pilares de la industria moderno de China y foi’l centru nacional de les principales industries metalúrxica, mineral y vinícola.

  • Les Cases barates d’El Coto, una ayalga d’entamos del sieglu XX

    Les Cases barates d’El Coto, una ayalga d’entamos del sieglu XX

    Nuna ciudá enllena d’edificios, ye chocante atopar en metá del barriu d’El Coto delles casines de planta baxa y adosaes. Detras d’elles hai muncha hestoria y calteneles anguaño ye parte del patrimoniu de Xixón.

    Empezaron a construyir estes cases barates en 1927 y termináronse dos años más tarde, resultando ser un conxuntu de cases obreres pa emplegaos municipales, toes dotaes d’un pequenu güertu amiestu. En Xixón funcionaba yá dende la primer década de sieglu una Comisión Municipal pa desaniciar el problema de la vivienda en precariu —el so nome yera Xunta Local pal Fomentu y Meyora de Cases Barates—, y publicó dellos boletinos añales de mui interesante llectura.

    El proyectu de 46 viviendes adosaes foi obra del arquitectu municipal Miguel García de la Cruz. Caúna de la cases cuntaba con agua corriente, cocina hixénica de carbón y bañu, unes condiciones mui avanzaes para la dómina. Por desgracia, nel cuartu de sieglu de construyéronse en tol país 21.000 viviendes d’esi tipu, daqué no que la guerra y les penalidaes y carestía de la posguerra xugaron un papel determinante.

    Estes Cases Barates n’El Coto, según el planu de construcción d’abril de 1928, taben dixebraes per cais con denominaciones lliterales: la F ye l’actual Avelino González Mallada, y paraleles a ella, escontra l’interior, taben les cais P, O, N y M. El Cinco yera l’actual Albéniz y el Seis otra, agora ensin nome, xusto onde ta asitiada la ilesia parroquial.

  • La cai Cabrales, una cai con nome incorrectu dende’l sieglu XIX

    La cai Cabrales, una cai con nome incorrectu dende’l sieglu XIX

    Un 23 d’abril de 1847 alcordóse na casa conceyu de Xixón el nome d’una de les cais más conocíes de la ciudá. Sicasí, esa cai lleva dende entós con un mal nome. Ye la cai Cabrales y esta ye la so hestoria.

    Juan Nepomuceno Cabranes dexó al Conceyu (testamentu del día 19 de febreru de 1836) la metá de los sos bienes, con destín al Hospital de la Caridá, al que la so xunta pertenecía, y que tuvo asitiáu, hasta cien años dempués, nos actuales xardinos del Náuticu. Los bienes donaos por Cabranes fueron 15.000 reales, l’edificiu destináu a hospital y delles cases na cai que depués llevó’l so nome. Esi día de 1847 decidió llamase Cabrales a la cai. Anque, en concencia, l’apellíu de Juan Nepomuceno ye Cabranes y non Cabrales, y asina figura nes sos partíes de nacencia y de fallecimientu.

    L’erru vien yá dende 1847, cuando’l Conceyu llama Cabrales a una cai que se conocía popularmente como Cabranes. La impresión que da ye que nin siquier los descendientes de Juan Nepomuceno trataron d’iguar la equivocación.

    El 17 d’agostu de 1891, el Conceyu impon el nome de Cabrales a la unión de trés antigües cais: Rectoría, Villaviciosa y la que yá se llamaba asina dende 1847. Rectoría por cuenta d’una popular vivienda del párrocu, o rectoral, que se baltó en 1902. La cai Villaviciosa yera perpendicular a la conocida como carretera de Villaviciosa. Yera un tramu de Cabrales que na actualidá asitiaríamos ente la ilesia de San Llorienzo y l’avenida de la Costa, y que perdió’l so nome pa tresformase, xunto a Villamanín, Rectoría y el tramu conocíu como Cabrales, nuna llarga cai: Cabrales.

  • LABShop bate récord d’asistencia con 7500 persones na edición d’iviernu

    LABShop bate récord d’asistencia con 7500 persones na edición d’iviernu

    LABShop zarró les puertes de Llaboral Centru d’Arte y Creación Industrial una vegada más, con una edición esitosa que batió tolos récords posibles: más de 90 puestos d’arte, lliteratura y diseñu y 7500 visitantes.

    El mercáu d’arte y diseñu celebráu en Llaboral Centru d’Arte y Creación Industrial, con una periodicidá de dos vegaes al añu, ye yá un fixu na programación del centru y tamién na de los visitantes y espositores, qu’amosaron una bona acoyida del cambéu d’espaciu.

    Nesta edición d’iviernu, amás de talleres d’acebache, cestería o bordáu sobre fotografía, tamién actuaron los DJs Viuda de Angelín y Adolfo Sputnik, l’artista xixoniegu Pablo und Destruktion y la poeta y artista Sofía Castañón. Tamién hubo tiempu pal séptimu arte, cola proyección de «Territory», del director de Corvera Álex Galán.

  • Kase.O, Carolina Durante y Zebrahead xúnense al Tsunami Xixón 2025

    Kase.O, Carolina Durante y Zebrahead xúnense al Tsunami Xixón 2025

    L’icónicu raperu Kase.O, una de les figures más influyentes del hip-hop n’español, va llegar a Xixón el próximu branu pa ufiertar un conciertu únicu nel Tsunami Xixón. Col so inconfundible estilu y lletres cargaes de fondura, l’artista promete un espectáculu inolvidable nel que va presentar los sos grandes ésitos y va sosprender con nueves interpretaciones. Les entraes yá tán a la venta, y los fans prepárense pa vivir una nueche histórica llena de música, emoción y la maxa inigualable de Kase.O.

    La banda madrilana Carolina Durante, referente del indie rock n’español va ufiertar un conciertu llenu d’enerxía y actitú nel Tsunami Xixón Festival. Col so característicu estilu frescu y lletres cargaes d’ironía y emoción, el grupu va interpretar ésitos como «Cayetano» y «Las Canciones de Juanita», amás de presentar temes del so últimu trabayu, “Elige tu propia aventura”.

    La banda californiana Zebrahead, iconos del punk rock fundíu con rap y ska, va aterrizar en Xixón pa desamarrar el so enérxicu directu. Con un estilu inconfundible y un repertoriu que toma más de dos décades de carrera, los creadores d’ésitos como «Playmate of the Year» y «Anthem» prometen un espectáculu cargáu de ritmu, diversión y una conexón única col so públicu. Amás, tamién traen un trabayu nuevu sol brazu “I”, un EP que da continuidá a la triloxía empezada con “III” y “II”. Los fans del punk rock más irreverente esperen con enganíes una nueche de pura adrenalina. A estes bandes súmense un bon númberu d’artistes de primer nivel tanto nacionales como Internacionales.

    Alcalá Norte, una de les grandes nueves promeses del rock alternativu español, Big Special, el dúo Punk británicu que nos fadrán baillar na escuridá; Slope, quien nos traerán el so hardcore dende Alemaña; Viva Belgrado, los cordobeses qu’ensin dulda tienen unu de los meyores discos de 2024; The Scratch, que dende Irlanda nos brindarán una bona dosis de Folk Irlandés entemecíu con Heavy; Los post-punkers britanicos Heavy Lungs; Tamién vamos tener al tríu de Nottingham GIRLBAND!, con unes influencies dende’l Skatepunk a Elvis; Terrible Jauría, quien nos fadrán baillar a ritmu de cumbiatón; Toma, la banda de Pepo (ex-Desakato) va presentar el so nuevu EP, Segundu Aliendu; Me Fritos and The Gimme Cheetos, vieyos habituales d’esti festival qu’aseguren una bona fiesta punk; Hermana Furia, van presentanos el so nuevu y más roqueru álbum, Rumias; Las Furias, col so garaxe-punk dende Barcelona y los shoegazers madrilanos, Ice Haven.

    Con esti anunciu Tsunami Xixón Festival confía en que la so edición más grande de la so hestoria seya la de 2025 y volver asitiase como una de les cites de la música en directu más importantes del norte d’España. Nes próximes selmanes el festival va anunciar el restu de programación.

  • Asturies va cuntar con trés etapes na Vuelta Ciclista a España 2025

    Asturies va cuntar con trés etapes na Vuelta Ciclista a España 2025

    Asturies volverá ser protagonista na 90ª edición de La Vuelta Ciclista a España, que se va celebrar del 23 d’agostu al 14 de setiembre. Va tener trés etapes, siendo decisivos los finales nel altu de L’Angliru y La Farrapona-Llagos de Somiedo. Les salíes van tener llugar dende Avilés y A Veiga.

    La Vuelta va llegar a Asturies na etapa númberu 13, el 5 de setiembre, dende Cabezón del Sal con final nel altu de L’Angliru, con un percorríu de 202 kilómetros. Na etapa 14, la ronda va salir de la ciudá d’Avilés y, tres 135 kilómetros, va rematar nel altu de La Farrapona-Llagos de Somiedo. Na xornada 15, el pelotón va partir d’A Veiga pa rematar na localidá gallega de Monforte de Lemos tres 167 kilómetros.

    Lara Martínez resaltó “el calter turísticu que tien La Vuelta a España y na qu’Asturies va ser de nuevu protagonista. El públicu volverá esfrutar de los paisaxes de la mariña meyor caltenida d’España y de los colosos del monte central y la somedana. Les trés xornaes de ciclismu n’Asturies van ser el preludiu perfectu a la xornada festiva del Día d’Asturies, el 8 de setiembre”.