Baxo’l lema «Regala n’asturianu», Ñeru Dinamización Social y Cultural asoleyo nos díes últimos el que ye’l primer catálogu de Navidá n’asturianu.
La edición, que cunta cola collaboración d’Acuto Xuegos, Cuinchi y Nenyuri, atropa más de 15 marques con productos asturianos que van dende ropa a lliteratura pasando per xuegos o gastronomía, ente otros.
El catálogu, que cunta con edición física, tien tamién la so versión dixital, que puede lleese calcando equí.
Les obres de la plaza del Continental dexaron al descubiertu los restos arqueolóxicos del antiguu acueductu de La Matriz, que la so construcción data del añu 1660. Tamos énte’l tercer gran acueductu d’Asturies, tres los d’Avilés y Uviéu. Dende la Fundación Municipal de Cultura documentaron l’afayu y fontes municipales señalaron que los restos volverán soterrase pa prosiguir cola remodelación urbanística.
Dende Izquierda Xunida, la conceyala Noelia Ordieres, considera que ‘tamos énte una obra del sieglu XVII con un eleváu valor patrimonial pola so singularidá, y poro, consideramos que se debería facer un esfuerzu pol so caltenimientu’. Ordieres señaló que dende Izquierda Xunida van presentar na comisión de Cultura del próximu vienres un ruegu pa poner en valor y caltener esti afayu arqueolóxicu. La conceyala afirma que, «l’oxetivu de la propuesta ye incluyir un pequeñu cambéu na reforma de la plaza que dexe, a lo menos, el so caltenimientu parcial’» La propuesta d’Izquierda Xunida consiste na instalación d’una placa identificativa cola hestoria del acueductu de La Matriz, el so percorríu y la evolución hestórica de la trayida d’agua a la ciudá.
Nesi sentíu, Ordieres apunta que, «si fuera posible, al pie de esta señalética, sería ideal caltener, de forma visible y didáctica pa la ciudadanía, parte de los restos arqueolóxicos del acueductu, yá que pondríen en valor una parte del patrimoniu y la hestoria de la nuesa ciudá».
La programación del LABshop Iviernu amplía horizontes anguaño. El Mercáu d’Arte y Diseñu de Llaboral Centru d’Arte crez, algamando los 95 puestos —un 58% más que na edición anterior— y aumentando tamién la ufierta de talleres y actividaes esponencialmente. L’eventu va tener llugar el sábadu y domingu, 21 y 22 d’avientu, a partir de les 11:00 hores y l’entrada al recintu va ser gratuita.
Nel mercáu los asistentes van poder adquirir pieces úniques y participar —previa inscripción—, en talleres de cestería, bordáu, escultura o xoyería, ente otros. Va haber tamién charres, proyecciones y presentaciones, amenizaes con música en directu al cargu de los DJs la Viuda de Angelín y Adolfo Sputnik. Va habilitase una zona gastro con food trucks y zona de chigre.
Apurriendo delles cifres concretes, nesta edición van poder atopase 13 llibreríes y editoriales, 14 artistes plásticos, 23 ilustradores y otros puestos de moda y complementos, cerámica, xoyería, talle de madera… hasta algamar los 95 stands totales. Dende los sos entamos n’avientu de 2008, el Mercáu de diseñu LABshop axuntó a un nutríu grupu de creadores, diseñadores y editores independientes. L’oxetivu d’esta actividá ye dar a conocer les actividaes rellacionaes col diseñu y la creación que se desenvuelven en Xixón y Asturies, mesmo qu’otres Comunidaes cercanes.
LABshop nun ye namás un gran escaparate o un mercáu de diseñu, ye un escenariu abiertu a la creatividá que sirve de conexón ente tolos participantes pa fomentar la so unión y fortalecer l’alcuentru colos medios de comunicación, los creadores d’enclinos y l’industria del sector.
El sábadu va tener llugar una visita institucional na qu’autoridaes van realizar un percorríu pelos puestos. Llaboral cuenta nuevamente col patrociniu de Xixón Impulsa, del Conceyu de Xixón. La collaboración ente Xixón Impulsa y Llaboral Centru d’Arte empecipió en 2017 col programa de residencies Llaboral_Impulsa, y estiéndese a otru tipu d’actividaes dinamizadores, como’l Mercadín LABshop, col que dambes organizaciones quieren sofitar a creadores y proyectos locales, promoviendo’l desenvolvimientu creativu, llaboral y empresarial de les nueves xeneraciones.
El Mercáu d’Arte y Diseñu, entamáu per Llaboral Centru d’Arte, va cuntar tamién col patrociniu de la Fundación Caxa Rural de Xixón, Estrella Galicia y Mueyos Asturianos. Pa inscribise nos 19 talleres ye necesariu contactar el organizadores de los mesmos al traviés del Instagram oficial del eventu (labshop_xixon).
El Consorciu de Tresportes d’Asturies (CTA) va conectar Xixón col centru comercial Parque Principáu, en Siero. El serviciu d’autobuses va ser temporal, dende’l próximu sábadu, 14 d’avientu, hasta’l 11 de xineru, y ta destináu a fomentar l’usu del tresporte públicu en desterciu del vehículu priváu. Esta llinia va cuntar con 13 frecuencies diaries d’ida y vuelta, y el serviciu va tar incluyíu na tarifa CONECTA, que dexa movese per toa Asturies en tresporte públicu por un máximu de 30 euros al mes.
El primer serviciu va salir de Xixón a les 10:00 hores y va repitise cada hora hasta les 22:00. Les salíes dende Parque Principáu tamién van ser cada hora, dende les 11:00 hasta les 23:00. En Xixón va haber dos paraes: la estación d’autobuses y Begoña.
La ufierta de places va superar les 1.500 al día. Les cifres revelen que daqué más del 26% de les persones que visiten Parque Principáu mientres les feches navidiegues vienen de Xixón. El nuevu serviciu nun va operar nos díes festivos y van facelo parcialmente (hasta les 15:00 hores) los díes 24 y 31 d’avientu y el 5 de xineru.
Esta llinia respuende al apueste del Gobiernu d’Asturies por asitiar el tresporte públicu como referente prioritariu, tamién a la d’aportar a destinos con una arribación de públicu intensa y alcontrada.
“Les cifres d’usuarios del tresporte públicu tán creciendo a un ritmu bien relevante. CONECTA ye un ésitu incontestable y el vezu d’utilizar el tresporte públicu ye una realidá diaria pa miles de persones. Queremos que la ufierta del CTA dexe dexar el coche en casa y facer planes n’autobús. Tuvimos una mui bona respuesta esti branu coles llanzaderes a sableres y espacios naturales y siguimos ampliando la ufierta”, destacó’l conseyeru de Fomentu, Alejandro Calvo.
Na xornada d’ayeri sábadu Rodrigo Cuevas difundía en redes sociales el videu nel que s’amosaba una agresión verbal ya intentu d’agresión física homófoba a un rapaz en Xixón.
Dos mozos insultaben y amenazaben a la víctima y a la taxista que lu tresportaba, tentando abrir la puerta del taxi a golpes. «Tienes un maricón en el coche» recriminaben a la taxista, que con valentía respondió desafiante anque visiblemente nerviosa, «¿y qué pasa, y qué pasa?». El taxi arranca fuxendo y l’agredíu avísalos abriendo la puerta y visiblemente nerviosu pola situación d’amenaza a la so vida que ta viviendo: «¡Qué os den por culo, gilipollas, os tengo grabaos!».
Gracies al videu grabáu pola víctima y a la collaboración ciudadana nes redes sociales güei fueron identificaos y la víctima anunció que va poner denuncia de forma inmediata.
Un casu más d’ataque homófobu nes cais de Xixón, una ciudá na que la so alcaldesa Carmen Moriyón decidió negase a colgar esti añu la bandera LGBTQ+ coincidiendo col Día del Arguyu. Les posiciones homófobes ya intolerantes nun paren de ganar espacios nun conceyu que se carazterizaba pola so tolerancia y llibertá.
Videu del casu y la denuncia:
Menos de 24 hores dempués de la declaración de la cultura sidrera asturiana como Patrimoniu Inmaterial de la Humanidá per parte de la UNESCO, l’alcaldesa de Xixón, la forista Carmen Moriyón, y la conceyal popular Ángela Pumariega, conviden a un “vino español” nun actu, escaeciendo la presencia de la bebida asturiana y la so promoción.
La convidada qu’unvien dambes representantes polítiques ye pal actu d’entrega de los premios empresariales “Gijón Impulsa”, entamaos pol Conceyu de Xixón y qu’esti añu faen dos décades. “Al finalizar se servirá un vino español”, da anuncia’l tarxetón que robla’l Conceyu de Xixón.
Poques hores enantes de mandar esta tarxeta l’alcadesa de Xixón celebraba en redes sociales la declaración de la cultura sidrera asturiana como Patrimoniu de la Humanidá, “entra nuna dimensión nueva”, afirmaba. “Ye’l trunfu d’Asturies, d’esa cultura popular que llevamos por bandera. Ye’l trunfu de lo colectivo, d’esi sentimientu de pertenencia que nos diferencia d’otres rexones”, siguía’l tuit asoleyáu por Moriyón.
“Xixón celebra lo que ye, ensin dulda dala, un día hestóricu p’Asturies”, remataba l’alcaldesa. Magar del aparente sofitu a esta cultura sidrera, en Xixón, pel momentu, los actos siguen pesllándose con vinu d’otros territorios en cuenta de la sidra d’Asturies, reconocida internacionalmente como patrimoniu de la humanidá.
La cultura sidrera asturiana entra en una nueva dimensión.
El reconocimiento de la @UNESCO_es es tan importante como merecido y supone una alegría absoluta.
Es el triunfo de Asturias, de esa cultura popular que llevamos por bandera. Es el triunfo de lo colectivo, de ese… https://t.co/KQDdSqgkIN
— Carmen Moriyón (@CarmenMoriyon) December 4, 2024
La Comisión d’Ética de la FSA-PSOE proclamó esta mañana a Adrián Barbón secretariu xeneral de la Federación Socialista Asturiana. Faise atendiendo a lo establecío nes bases de convocatoria del 34u Congresu de la FSA-PSOE, que señalen que, esistiendo una única precandidatura, nun ye necesariu recoyer avales y dar en la proclamación del secretariu xeneral.
El 34o Congresu de la FSA-PSOE va tener llugar los próximos díes 17, 18 y 19 de xineru de 2025 nel Centru Niemeyer d’Avilés. Ye una cita que la Federación Socialista Asturiana encara coles mires de modernizar y actualizar el so proyectu políticu, reforzando la so conexón cola ciudadanía, coles mires de dar respuestes a los nuevos retos y desafíos
qu’encara Asturies.
Va ser un congresu nel que la FSA-PSOE va trabayar pa fortalecer un proyectu y un programa políticu centraos nes grandes prioridaes d’Asturies y de los asturianos y asturianes: impulsar l’actividá económica y la creación de más empléu y de más calidá, consolidar y modernizar los servicios públicos y l’estáu de bienestar, siguir avanzando na meyora de la conectividad y les comunicaciones, afondar na vía fiscal asturiana como garantía de que la xusticia fiscal ye clave pa la xusticia social, dar pasos alantre na consecución de nuevos derechos y llibertaes y ufiertar respuestes a les necesidaes y los problemes de los y les moces de la nuesa tierra.
La candidatura ‘Cultura sidrera asturiana’ foi declarada Patrimoniu Cultural Inmaterial de la Humanidá na 19a sesión del Comité Intergubernamental de Salvaguardia del Patrimoniu Cultural Inmaterial de la UNESCO axuntáu esta selmana n’Asunción (Paraguái). Promovida pol Gobiernu del Principáu d’Asturies, la candidatura -qu’alcordó’l Conseyu de Patrimoniu Históricu na xunta celebrada en payares de 2021 en Menorca- refierse a tol conxuntu de práctiques venceyaes a procesos de producción, distribución y consumu de sidra natural.
Estes práctiques desenvuélvensenel territoriu asturianu dende, a lo menos, l’Alta Edá Media y trescienden lo material hasta convertise nun sentimientu d’identidá personal y de pertenencia a la comunidá. La sidra ye un productu de gran riqueza cultural que, amás de los saberes y esperiencies necesarios pa la so ellaboración y consumu, tresmitíos de xeneración en xeneración, reflexa un vocabulariu específicu y orixinal en llingua asturiana. Esti conxuntu de práctiques constitúi un elementu identificador de lo asturiano, unu de los sos principales emblemes, qu’estimula la formación y el refuerzu de venceyos sociales que confieren pertenencia y continuidá a la comunidá asturiana.
En redol al so consumu, siempres comunal, desenvolviéronse unos rituales, espacios y ocasiones de sociabilización propios que favorez l’alcuentru y l’integración de la población. Amás, considérase que la sidra ayuda a caltener los paisaxes de la zona, tanto na so dimensión natural como humana, fixa población en territorios rurales, potencia’l desenvolvimientu d’una gastronomía típica, forma parte de fiestes tradicionales y contribúi al caltenimientu y trasmisión del patrimoniu musical y llingüístico.
La Conseyería de Salú va impulsar en 2025 la meyora integral de l’atención primaria, con una dotación de 656 millones, un 4,51% más qu’anguaño. El paquete d’iniciatives previstes inclúi midíes p’aumentar l’accesibilidá, con cambeos nos sistemes de citaciones; el refuerzu de plantiyes y l’ampliación a toles árees sanitaries del circuitu de consulta preferente nel casu de sospecha de cáncer que s’enllantó con ésitu na zona de Xixón (área V). Los fondos pa la rede d’atención primaria atropen el 27,8% del presupuestu de Salú, qu’algama los 2.444 millones, un 5,3% más.
El Serviciu de Salú del Principáu (Sespa) trabaya nel tresformamientu dixital de la rede con un presupuestu global de 6,8 millones. El procesu, que yá ta en marcha, inclúi un sistema de citación automática con ayuda d’un axente virtual (2,4 millones), otru sistema d’información sobro peneraos (454.778 euros), la xestión integral pa la incapacidá temporal (279.598 euros) y l’automatización de procesos (351.868 euros).
Amás, van invertise 2,4 millones nuna plataforma pa monitorizar pacientes compartida ente los centros de primaria y los hospitales, 405.452 euros pa siguir ampliando les prestaciones de l’aplicación MiAstursalud, y 117.370 pa integrar esta plataforma col sistema de vídeoconsultas del Sespa.
Nel planu asistencial, ta prevista l’alquisición de dispositivos tecnolóxicos pa les consultes d’atención primaria (844.685 euros), según la incorporación de ferramientes pa favorecer les consultes de dermatoloxía a distancia (232.320 euros).
L’apueste por esta rede asistencial completar cola estensión del modelu de centros d’altu resolvimientu d’urxencies, según colos proyectos y obres d’equipamientos como los de La Pola (L.lena), con 4,16 millones; Sotrondio (2,94 millones), Nuevu Raspies (874.375 euros) y Vega-La Camocha (2.240.969 euros), dambos en Xixón, Tubongu (693.317 euros), Cangas (401.000 euros), Tapia de Casariego (228.791 euros), Boal (80.000) euros, Piedrasblancas (56.870 euros) y Castropol (25.300 euros).
Na área de la salú bucodental, van ampliase les consultes hasta algamar les 99 en toa Asturies nel primer trimestre de 2025, pa lo que se acutar un millón de presupuestu. Tamién se van adquirir nuevos equipos como unidaes de radiografía intraoral y compresores. Coles mesmes, va estendese’l programa a menores d’ente 6 y 17 años.
La Coordinadora Política d’Izquierda Xunida de Xixón, axuntada ayeri, aprobó por unanimidá un resolvimientu de sofitu a la convocatoria de fuelga de los y les trabayadores del sector minorista d’alimentación, prevista nel víspora de les celebraciones navidiegues, los díes 23, 24, 30 y 31 d’avientu.
El coordinador local, Alejandro Farpón, espresó que “el compromisu d’IX siempres ta al llau de les reivindicaciones de los y les trabayadores, y más nun casu como esti, nel que les condiciones llaborales tán precarizaes y el conveniu quedó obsoletu”. Farpón señaló que la so formación “sofita y fai un llamamientu a secundar la fuelga y convida a la reflexón a la patronal (ASUPA) a amosar un talante más afayadizu a la negociación p’algamar un alcuerdu que dexe ameyorar les condiciones llaborales del sector”.
Per otra parte, la Coordinadora Política d’Izquierda Xunida ratificó’l so allugamientu contrariu al denomináu Plan Llave. Nesti sentíu, Farpón apuntó que “la propuesta de Foro nun ye una política de vivienda sinón un negociu nel que los de siempre se lucren con recursos de toos”. Frente a esto, Izquierda Xunida apuesta por polítiques de vivienda que caltengan la titularidá pública del suelu y la xestión pública de les viviendes destinaes toes elles a arriendu afayadizu.