Xixón al día

Autor: xixonaldia

  • Un cursu d’estensión de la Escuela d’Asturianía axunta n’Alicante a 54 estudiantes de gaita, tambor, percusión y baille

    Un cursu d’estensión de la Escuela d’Asturianía axunta n’Alicante a 54 estudiantes de gaita, tambor, percusión y baille

    El Centru Asturianu d’Alicante acoyó esta fin de selmana un cursu d’estensión de la Escuela d’Asturianía, nel que participaron 54 persones pertenecientes a les cases autonómiques d’Alicante, Valencia, Castellón, Málaga, Alcobendas y Madrid p’alquirir conocencies sobre  gaita, tambor, percusión y baille.

    La directora xeneral, Olaya Romano, que participó na clausura del eventu, destacó “la importancia d’estos alcuentros que, más allá del perfeccionamientu de los y les futuros monitores de los grupos de baille y música tradicional de los centros asturianos, fomenten la unión y los venceyos de la población asturiana repartida per tol país”.

    Les clases fueron impartíes por profesoráu de la Escuela Municipal de Música Tradicional d’Uviéu y diben dirixíes a toos aquellos y aquelles integrantes de centros asturianos del país que deseyaren siguir cola so formación en baille o instrumentu tradicional.

  • Apaguen una quema nuna casa abandonada d’Avilés

    Apaguen una quema nuna casa abandonada d’Avilés

    Efectivos de Bomberos del Serviciu d’Emerxencies d’Asturies (SEPA) con base nos parques d’Avilés, Pravia y Llamorgal controlaron una quema declarada nuna vivienda abandonada, de trés altores, allugada na cai Río San Martín n’Avilés.

    La quema afectó a la totalidá del inmueble colapsando la estructura. A estes hores siguen nel llugar efectivos del parque d’Avilés realizando xeres de refrigeración dende l’esterior del inmueble con un vehículu d’altor.

    El Centru de Coordinación d’Emerxencies del 112 Asturies recibió l’avisu a les 23.24 hores. Na llamada indicaben que víen fueu nuna casa abandonada y había cases amiestes. La Policía Nacional confirma a les 23.29 hores que dos persones qu’habíen nel interior tán fuera del inmueble.

    La Sala 112 del SEPA activó a efectivos de bomberos del parque avilesín y del parque de Pravia. Darréu activóse a otros dos bomberos dende’l parque central de Llamorgal con una autobomba nodriza. Hasta’l llugar movióse’l xefe de zona centru esti qu’a les 03.15 hores dio la quema por controlada, momentu nel que parte de les dotaciones retiraron del llugar a les sos respectives bases.

  • El Premiu Ana Casanueva 2024 reconoz el “exemplar” llabor de l’Asociación Galbán colos menores diagnosticaos de cáncer y les sos families

    El Premiu Ana Casanueva 2024 reconoz el “exemplar” llabor de l’Asociación Galbán colos menores diagnosticaos de cáncer y les sos families

    L’Asociación Galbán, de families de neños con cáncer d’Asturies, recibió esti xueves el Premiu Ana Casanueva 2024 nuna ceremonia celebrada na Capiya del Edificiu Históricu de la Universidá d’Uviéu. El galardón foi recoyíu pol so presidente, Lennart Koch, nun actu presidíu pol rector de la institución académica asturiana, Ignacio Villaverde, y que cuntó cola presencia del presidente de Interprotección, Carlos Casanueva Vares, el presidente de ASICOM, Carlos Fernández Collada, y l’alcalde d’Uviéu, Alfredo Canteli.

    El xuráu destacó la “exemplar” obra social de l’Asociación Galbán na so atención a les families con menores y nueves diagnosticaos con enfermedaes oncohematolóxiques. “La so actividá tien un altu y positivu impactu n’Asturies y ta abierta a otros potenciales beneficiarios del restu del territoriu nacional ya inclusive internacional”, sorrayaron. Galbán busca sofitar a les families de neños, neñes y adolescentes diagnosticaos de cáncer, promoviendo’l so bienestar emocional y social al traviés de numberosos programes d’atención, acompañamientu y concienciación. Ente los sos oxetivos, ta facilitar la integración y la calidá de vida de los afectaos, ufiertando un espaciu de sofitu y solidaridá que fortalez a les families nel so difícil camín.

    Ignacio Villaverde, rector y xuráu de los Premios Ana Casanueva 2024, celebró nel so discursu que’l galardón supon “un compromisu infrayable coles causes sociales más sensibles”. Nesti sentíu, Villaverde espresó’l so “agradecimientu y almiración” escontra’l trabayu de l’Asociación Galbán en nome de la Universidá d’Uviéu. Amás, confió en qu’esta reconocencia “más que merecíu” sirva d’aliendu pa siguir “con tan ponderatible llabor”.

  • Un mancáu n’Amieva tres salir de la carretera y cayer per un desnivel

    Un mancáu n’Amieva tres salir de la carretera y cayer per un desnivel

    El conductor d’un turismu resultó mancáu ayeri nueche en saliéndose de la vía y cayer por un desnivel cuando circulaba al altor del kilómetru 137 de la N-625, en dirección al pueblu de Ceneya, n’Amieva.

    Según los datos facilitaos pol Serviciu d’Atención Médica Urxente (SAMU) el mancáu, un varón de 73 años, foi sacupáu con policontusiones, pa más pruebes, al Hospital del Oriente. L’afectáu foi atendíu nel llugar del incidente pol equipu d’Atención Primaria de Cangues d’Onís y treslladáu con posterioridá na ambulancia de soporte vital básicu de la zona.

    L’home tuvo que ser escarceláu del interior del turismu por efectivos de Bomberos del Serviciu d’Emerxencies del Principáu d’Asturies (SEPA) con base nel parque de Cangues d’Onís. En averándose a la víctima con una escalera los bomberos retiraron la lluna delantera, cortaron l’aru del volante p’abrir buecu y ayudaron a salir al conductor.

    El Centru de Coordinación d’Emerxencies del 112 Asturies recibió l’avisu a les 22.51 hores d’ayeri miércoles. Na llamada indicaben qu’un coche saliérase de la carretera y taba n’unes carbes cerca del ríu. Taben falando col so conductor que nun podía salir pelos sos propios medios.

     

  • Boombastic escosa les primeres 20.000 entraes en menos de doce hores

    Boombastic escosa les primeres 20.000 entraes en menos de doce hores

    La llocura por Boombastic yá empezó. Menos de doce hores fixeron falta pal primer sold out de la temporada y ye que 20.000 ‘bombis’ consiguieron la so early ticket pa Boombastic Asturies, convirtiendo la preventa de la próxima edición en tou un finxu pal festival.

    Tolos festivaleros que mercaron el so abonu’l domingu, formaron parte del Sortéu de Navidá Boombastic’ que se celebró ayeri en Madrid. Un eventazu, xunto a Vaya Vaina, nel que los más suertudos ganaron unu de los venti premios que se sortearon en directu. Ensin dala dulda, el momentu más máxicu foi cola salida del ‘Gordu’ y ye que Begoña Loredo, xunto con trés amigos, va poder dir al festival en jet priváu, va tener camerín propiu nel backstage, va agospiase nel hotel Boombastic y va movese en transfer VIP mientres l’eventu, amás de conocer en persona a los sos artistes favoritos.

    La selmana de celebraciones sigue y ye que Boombastic foi nomáu a ‘Meyor Eventu del Añu’ pola mayor y más importante fiesta de la industria musical n’España: LOS40 Music Awards Santander 2024. La selmana ta siendo épica pa Boombastic, pero va haber qu’esperar al 8 de payares pa saber si ye’l máximu favoritu y álzase col galardón.

    Dende la dirección del festival apunten que “tán preparando’l que va ser el Boombastic más grande de toos” y la salida a la venta de los early tickets “foi solo l’empiezu d’una temporada llena de sorpreses y novedaes por anunciar”.

  • Asturies abre convocatoria pa llograr l’habilitación de guía de turismu

    Asturies abre convocatoria pa llograr l’habilitación de guía de turismu

    La Conseyería de Presidencia, Retu Demográficu, Igualdá y Turismu abrió una nueva convocatoria de les pruebes pa llograr la habilitación de guía oficial de turismu d’Asturies. El Boletín Oficial del Principáu (Bopa) publica güei tolos detalles de la convocatoria.

    Nesta convocatoria, amás d’autorizar l’exerciciu del oficiu a aquelles persones que superen el procesu, tamién s’actualiza’l llistáu de titulaciones y diplomes que respuenden por la conocencia d’idiomes pa quien yá tán inscritos nel Rexistru d’Empreses y Actividaes Turístiques d’Asturies (REAT) como guíes de turismu. Igualmente, va dexar reconocer a quien tán acreditaos por otres comunidaes autónomes o estaos europeos como guíes d’Asturies.

    El plazu de presentación de solicitúes, que pueden realizase de manera presencial o electrónicu, ye de venti díes naturales dende a otru día al de la so publicación nel Bopa, esto ye, dende les 00:00 hores de mañana, 10 d’ochobre, hasta les 23:59 hores del 29 d’esti mes.

    Formación

    Los aspirantes tendrán de tener, ente otros requisitos, la titulación de Grau Superior de Formación Profesional como Guía, Información y Asistencia Turística (Técnicu Superior n’Información y Comercialización Turística o n’Axencies de Viaxes -FP3-) o de Técnicu n’Empreses y Actividaes Turístiques, Grau Universitariu en Turismu, Diplomáu Universitariu en Turismu o cualesquier diplomatura universitaria o títulu superior universitariu. Tamién se contemplen títulos llograos fuera d’España que fueren homologaos, mesmo qu’inscritos nel REAT o con títulos homologaos d’otres comunidaes.

    Pruebes

    Les pruebes son de calter eliminatoriu, polo que se debe superar l’anterior p’aportar a la siguiente. La primera d’elles consiste nel resolvimientu per escritu de cuarenta entrugues relatives a les temes que se detallen na convocatoria, centraos en cuestiones directamente rellacionaes col exerciciu del oficiu.

    La segunda va ser una entrevista mientres la que’l tribunal va poder solicitar a los aspirantes que desenvuelvan unu de los temes incluyíes nel anexu III de la convocatoria. Esta segunda prueba ye distinta pa quien tengan habilitaciones como Guía de Turismu por otra comunidaes o organismos oficiales, yá que, nesti casu, les temes lléndense a dos módulos del llistáu.

    A lo último, va practicase un exame d’idiomes, del que van tar escluyíes les persones qu’acrediten la so conocencia por aciu titulación. Va consistir na traducción d’un testu en castellán al idioma escoyíu pol candidatu y nuna entrevista de cinco a diez minutos nel mesmu idioma sobre cualquier aspectu referente al trabayu de guía.

  • Carlos Ares, Carlangas y Depedro protagonicen los alcuentros VibraMahou de la seronda

    Carlos Ares, Carlangas y Depedro protagonicen los alcuentros VibraMahou de la seronda

    Vibra Mahou, la plataforma de música de Mahou Cinco Estrelles que promueve los alcuentros al rodiu del directu, volverá traer a Asturies esta seronda la meyor música. Y va facelo, amás, con una de les programaciones musicales preferíes del públicu asturianu, tantu pola propuesta musical como por poder esfrutar de la cercanía colos artistes: Directos Vibra Mahou, que va tener como protagonistes a Carlos Ares, Carlangas y Depedro.

    El primer conciertu va tener llugar na Sala Albéniz de Xixón el vienres 15 de payares y va correr al cargu de Carlos Ares, multi-instrumentista, cantautor y productor que forxó la so identidá artística al traviés de la música convirtiéndola nel mediu que reflexa los sos cambeos personal y vital.

    El sábadu siguiente, 23 de payares, va ser Carlangas quien se xuba al escenariu de la uvieina Sala Tribeca, hasta onde va llevar el so amiestu de música discu, punk y ritmos llatinos que va faer baillar a los asistentes.

    Y el encargáu de cerrar el ciclu n’Asturies va ser Depedro, que va llevar al públicu a un viaxe cultural y emocional cola so fusión de rock, folk ya influencies llatines, el vienres 29 de payares na Sala Estilu d’Uviéu.

    Vibra Mahou impulsa con esta propuesta musical la música en vivu nes sales, llugares esenciales pal desenvolvimientu del talentu emerxente y la música directu al traviés d’esperiencies cinco estrelles.

  • Alerta encarnada por fenómenos metereolóxicos nos Picos d’Europa y naranxa nel restu d’Asturies

    Alerta encarnada por fenómenos metereolóxicos nos Picos d’Europa y naranxa nel restu d’Asturies

    L’Axencia Estatal de Meteoroloxía (AEMET) actualizó los avisos emitíos pa güei n’Asturies con un avisu coloráu por vientos, con raches máximes d’hasta 140 km/h en Picos d’Europa. Caltien el restu d’avisos naranxa por raches de vientos y costeros con galerna na mariña oriental pa les próximes hores.

    Con esta actualización d’avisu nivel coloráu por vientos, según AEMET hasta les 16:59 hores podríen rexistrase raches máximes de vientu d’hasta 140 km/h en Picos d’Europa. Mientres esi periodu tamién caltien l’avisu naranxa con previsión de raches máximes de vientos de 120km/h nel suroccidente y 110 km/h na mariña occidental. Los fenómenos costeros, pa los que l’AEMET tamién emitió un avisu naranxa, con vientu fuerza 8 y 9, van enllargase na mariña occidental hasta les 14.59 hores y na mariña oriental, con avisu agora de galerna tamién, hasta les 17.59 hores.

    Énte esta situación dende’l Serviciu d’Emerxencies del Principáu d’Asturies (SEPA) repiten a la población qu’estremen les precauciones. Nun s’averen a los cantiles, paseos marítimos y zones peligroses onde les fuertes raches de vientu pueden provocar cayíes y na mariña pueden resultar arrastraos por un guelpe de mar. Eviten los desplazamientos per carretera y si ye necesario facelos, empresten especial atención énte la posible presencia de torgues na vía; na so vivienda revise los anclaxes de los elementos fitos nel esterior del edificiu y si tien que salir empreste especial atención énte’l peligru de desprendimientos de cornises o otros materiales que puedan cayer d’altor.

  • El 61,5% de los asturianos sofiten un referéndum sobre la monarquía

    El 61,5% de los asturianos sofiten un referéndum sobre la monarquía

    L’últimu panel d’Electomania.es ufre datos sobre la última encuesta realizada por EM-Analytics.com. El 61,5% de los asturianos y asturianes sofitaríen un referéndum que punxera en manes de la ciudadanía la elección ente una xefatura d’estáu monárquica o d’elección democrática. Namás un 34,4% de los asturianos y asturianes taríen a la escontra.

    Ye un datu unes décimes perbaxo de la media estatal, qu’algama’l 64,6% de persones favoratibles a la realización de la consulta. En tolos territorios del estáu la respuesta positiva ye de más del 50%.

    No que cinca al porcentaxe ente los votantes de los partíos, los datos na izquierda tán en tolos casos penriba del 90%, incluyendo a los votantes del PSOE, con un 92,4%. Na derecha y ultraderecha, los datos baxen hasta alredor del 30%, casu de PP y VOX, cola escepción de los votantes de Se acabó la fiesta. Los votantes de la formación d’estrema derecha sofiten en cuasi un 60% la celebración del referéndum que podría terminar cola monarquía española.

  • El Muséu Etnográficu del Oriente d’Asturies contribúi a la memoria histórica de la contorna presentando «Cumbres en pie de guerra»

    El Muséu Etnográficu del Oriente d’Asturies contribúi a la memoria histórica de la contorna presentando «Cumbres en pie de guerra»

    El próximu sábadu, 5 d’ochobre de 2024, va tener llugar la presentación de «Cumbres de pies de guerra. La batalla d’El Mazucu»: la nueva novela gráfica del historietista Guillermo Menéndez Quirós.

    L’eventu, que foi entamáu conxuntamente pol Conceyu de Llanes, l’Asociación El Mazucu Rebulle y el Muséu Etnográficu del Oriente d’Asturies, va desenvolvese en dos escenarios. Primero, n’El Mazucu (nel Parque), a les 17:00 hores, con un percorríu a pie pelos llugares más emblemáticos de la batalla y una actuación especial del gaiteru Xuacu Amieva.

    Dempués, nel muséu, a les 19:00 hores, onde va tener llugar un coloquiu sobro’l procesu de creación de «Cumbres a pie de guerra». Van acompañar al autor José Luis Villaverde, presidente de la Fundación MEOA, el cineasta Pablo Casanueva, espertos en memoria y guerra civil, mesmo que vecines d’El Mazucu y supervivientes de la batalla.