Xixón al día

Autor: xixonaldia

  • La Bonturné, Héctor Braga, Susana Gudín y Ferla Megía, finalistes del XVI Premiu Camaretá al Meyor Cantar

    La Bonturné, Héctor Braga, Susana Gudín y Ferla Megía, finalistes del XVI Premiu Camaretá al Meyor Cantar

    El Premiu Camaretá al Meyor Cantar, promovíu pola Conseyería de Cultura, Política Llingüística y Deporte, yá tien finalistes pa la so edición 2024: La Bonturné, Héctor Braga, Susana Gudín y Ferla Megía, toos ellos con trabayos difundíos nos meses previos a la convocatoria.

    Tres d’una primer deliberación, el xuráu, axuntáu’l llunes 17 de xunu nes dependencies de la Dirección Xeneral d’Acción Cultural y Normalización Llingüística, fixo la selección de los cuatro candidatos pa la final. El director xeneral Antón García presidió un xuráu compuestu pola cantante Alicia Álvarez, el periodista Xicu Ariza, la técnica de normalización llingüística Penélope Miranda, la filóloga y gaitera Andrea Joglar y la profesora Emma Posada.

    El Premiu Camaretá al Meyor Cantar, dotáu con 6.000 euros, ta convocáu pol Gobiernu del Principáu d’Asturies cola mira d’afianzar, prestixar y arriquecer la creación musical tanto n’asturianu como n’eonaviegu. Al premiu en metálico amiéstase la integración del artista ganador nel circuitu Autores nel Camín, col que se faen actuaciones pelos conceyos d’Asturies.

    El vienres 8 de payares Xixón va volver acoyer la final del Premiu Camaretá al Meyor Cantar nel Teatru de la Llaboral, un gallardón que cumple la decimosesta edición. Nesa gala, el mesmu xuráu va decidir cuál va ser el cantar premiáu y tamién va ufiertar una actuación l’artista ganadora de la edición anterior d’esti premiu, Vero Rubio, col tema Dixo miou padre. Amás d’interpretar esta canción, Vero Rubio va presentar los temes nos que lleva trabayando nel últimu añu.

    Los cuatro temes finalistes d’esta edición son:

    La Bonturné, con Odisea la nui. Con componentes veteranos na escena musical asturiana desde va cuatro décades, esti cuartetu de maestros ufierten un repertoriu baillable nuna llinia bal-folk tradicional.

    Héctor Braga, con Llobatu. Artista y productor multidisciplinar dedicáu a les músiques clásiques y al folk, con siete discos publicaos hasta la fecha, ye ún de los referentes más afianzaos na música del país con dellos premios y reconocimientos.

    Susana Gudín, con Contigo. Sopranu llírica y artista multidisciplinar, vien participando en formaciones corales y orfeones dende 1991, amás de ser solista con grupos de música de toles menes y cola Orquesta Filarmónica d’Asturies.

    Ferla Megía, con Medrana a medrar. Multi-instrumentista, compositor y diseñador, graba y produz la so música dende’l so estudiu en Feleches (Siero). Dende’l so pueblu crea música tradicional, música urbana, electrónica, ritmos sinuosos, con una variedá escomanada de samples y inspiraciones.

  • Una persona mancada grave nun accidente de tráficu en Valdés

    Una persona mancada grave nun accidente de tráficu en Valdés

    Una persona resultó mancada grave nun accidente de tráficu nel que se vieron implicaos trés turismos y un camión na A-8, al altor del puntu kilométricu 455, en sentido Avilés, na salida de la localidá de Querúas, en Valdés.

    Según datos facilitaos pol Serviciu d’Atención Médica Urxente (SAMU), el mancáu, un varón de 60 años, foi treslladáu al Hospital de Coaña pol equipu médicu de la UVI-móvil de Xarrio. Por cuenta de más pruebes y hasta nueva valoración médica presentaba politrauma de pronósticu grave. Hasta’l llugar del accidente tamién se movió l’equipu d’Atención Primaria de Trevías cola ambulancia de soporte vital básicu de la zona.

    El mancáu, conductor d’unu de los turismos implicaos, tuvo que ser escarceláu del interior del coche por efectivos de Bomberos del Serviciu d’Emerxencies del Principáu d’Asturies (SEPA) con base nel parque de Valdés. Los bomberos tuvieron que cortar dambes puertes y la pilastra central pa estrayelu, inmovilizáu con collarín y chalecu espinal, cola tabla de rescate.

  • La Reserva de la Biosfera de Les Ubiñes-La Mesa va cuntar con un puntu nuevu d’información en Teberga

    La Reserva de la Biosfera de Les Ubiñes-La Mesa va cuntar con un puntu nuevu d’información en Teberga

    La Conseyería de Fomentu, Cooperación Local y Prevención de Quemes va poner en marcha en xunetu un nuevu puntu d’información na Reserva de la Biosfera de Les Ubiñas-La Mesa, nel conceyu de Teberga. El director xeneral de Custodia del Territoriu ya Interior, David Villar, y l’alcalde del conceyu, Adrián Gayo, caltuvieron una xunta de trabayu y visitaron les obres que van dexar qu’esti espaciu protexíu cunte con trés equipamientos d’atención a usuarios y visitantes.

    El nuevu espaciu va integrase na Rede Natural d’Asturies (RENA), integrada por 24 centros y va atender, principalmente, a quien s’averen al espaciu natural al traviés de la Sienda del Osu, unu de los caminos naturales más reconocíos y utilizaos d’Asturies. La reserva de Les Ubiñes-La Mesa cunta hasta’l momentu con un espaciu d’atención en Valdemurio, conceyu de Quirós, y otru en Tuiza, en L.lena. La inversión añal pa los trés va superar los 70.000 euros.

    Mientres l’alcuentru de trabayu, el director xeneral y l’alcalde tamién analizaron les actuaciones que se tán llevando a cabu nel espaciu protexíu, como les que la entidá local desenvuelve nel marcu del so Plan de Sostenibilidá Turística y les que la conseyería va llevar a cabu p’ameyorar l’accesibilidá de la ruta que da accesu a la Braña de Fonfría y la Collada de La Madalena, nes que van invertir 55.000 euros cofinanciaos con fondos del programa Next Generation EU.

  • El 90% de los llectores de Xixonaldia.com camienta que Moriyón habría dimitir tres la condena del Tribunal de Cuentes

    El 90% de los llectores de Xixonaldia.com camienta que Moriyón habría dimitir tres la condena del Tribunal de Cuentes

    Una encuesta realizada en X nes siguientes 24 hores a la noticia de la condena a l’alcaldesa y presidenta de Foro, Carmen Moriyón, por usu indebíu de más de 30.000 euros de dineru públicu, dio como resultáu un 90% de votos na dirección d’apostar pola dimisión de la cabezalera xixonesa.

    Entrugóse a los llectores: Tres conocese la sentencia condenatoria del Tribunal de Cuentes a l’alcaldesa Carmen Moriyón por usu indebíu de más de 30.000 € de fondos públicos otorgaos al grupu municipal de Foro en Xixón. ¿Ha dimitir Moriyón?. Namás 2 de cada 10 votos sofiten la continuidá de l’alcadesa al frente del Conceyu nesta encuesta.

    Esti resultáu coincide col ambiente nel plenu xixonés, onde toles fuercies dende la estrema derecha a la izquierda, sacantes hasta’l momentu’l PP, que sigue dientro del gobiernu xixonés, reclamen a Moriyón la so dimisión inmediata.

  • Consensu en Xixón: PSOE, IX, Podemos y Vox piden la dimisión de Moriyón tres ser condenada pol Tribunal de Cuentes

    Consensu en Xixón: PSOE, IX, Podemos y Vox piden la dimisión de Moriyón tres ser condenada pol Tribunal de Cuentes

    Toles fuercies polítiques fuera del gobiernu xixonés coinciden güei en pidir la dimisión como alcadesa de Carmen Moriyón. Magar que la presidenta de Foro Asturias asoleyó un tuit nel que calificaba les informaciones sobre la sentencia que la condena de «rotundamente falsas», PSOE, Izquierda Xunida, Podemos y VOX, que col PP foi quien sumó votos pa convertila n’alcaldesa, pidieron yá la dimisión de Carmen Moriyón. Pel momentu guarda silenciu l’otru sociu de gobiernu, el Partíu Popular.

    Moriyón allegó nel tuit asoleyáu dempués de cuasi venti hores de silenciu que la condena ye namás un error que «ya ha sido subsanado». L’alcaldesa entra darréu nuna contradicción al dicir que «Ni un euro de dinero público se ha utilizado para fines privados», mientres sostién que «Fueron gastos que tenía que haber asumido el partido y no el grupo municipal».

     

     

  • El PSOE pide la dimisión de Carmen Moriyón por usar dineru públicu en beneficiu propiu

    El PSOE pide la dimisión de Carmen Moriyón por usar dineru públicu en beneficiu propiu

    El PSOE pide la dimisión de Carmen Moriyón por usar dineru público en beneficiu propiu y realizar pagos indebíos al traviés d’una tarxeta de creitu. El voceru del Grupu Municipal Socialista, Luis Manuel Flórez ‘Floro’, ufiertó esta mañana una rueda de prensa en conociendo’l fallu del Tribunal de Cuentes acompañáu de la vocera axunta, Carmen Eva Pérez Ordieres, y la secretaria de Política Municipal de la Federación Socialista Asturiana, Noelia Macías.

    “L’alcaldesa reconoz los fechos y la sentencia señala que son graves, repitíos y calteníos nel tiempu. Nun hai precedentes na hestoria democrática del Conceyu de Xixón y enxamás van poder atopase na intachable trayectoria de los alcaldes socialistes que tuvo’l nuesu conceyu”, sollerta’l voceru.

    El Tribunal de Cuentes apunta que Carmen Moriyón pagó gastos personales y utilizó una tarxeta de creitu del Grupu Municipal de Foro de forma indebida. Coles mesmes, conclúi que se punxo un sobresueldu d’aprosimao 1000 euros al mes. Con too ello, Floro esixe que devuelva’l dineru a les arques municipales y que demuestre que lo fixo, una delda inxustificada nos fondos del Conceyu cuantificada en 31.314’29 euros, y repite la necesidá de dimitir por respetu a Xixón, a la institución y a la ciudadanía. “La ciudadanía esixe que quien teamos en política tengamos un comportamientu exemplar al altor de les xeres que tenemos de desempeñar. Va ser mui difícil que Moriyón esplique que precise ponese un sobresueldu en dietes recibiendo un salariu como alcaldesa cercanu a los 70.000 euros, cobrando por trabayar mentanto nuna empresa privada, teniendo vehículu oficial y xofer. Naide tendría que venir a la política si lo que quier ye esfrutar un altu nivel de vida; el serviciu públicu nun ta pa eso”, añede.

    Nesi sentíu, dende’l PSOE recuerden que los sobresueldos fueron yá una práctica establecida y estendida por Francisco Álvarez Cascos en Foro y nel PP. “L’alcaldesa nun tendría de convertise nunca nuna alumna aventayada de quien foi fundador del so partíu. Ella yá conocía de la gravedá de la so conducta”, añede Floro, “cuando se presentó en mayu del añu pasáu a les elecciones locales, cuando tuvo’l dudosu honor d’asegurase’l sillón introduciendo a la estrema derecha nel gobiernu del conceyu, y cuando’l pasáu 3 de xunu ella taba confesando los fechos y reconociéndolos énte’l Tribunal de Cuentes, mientres el restu de los partíos políticos defendíamos el modelu d’Europa que queremos. Esto confirma lo que llevamos tiempu diciendo: Foro nun tien interés na política, Foro nun tien un modelu pa Xixón. Carmen Moriyón y Foro tienen un únicu interés: el negociu, el business”.

    El voceru concluyó la so intervención apelando precisamente al PP, el sociu de gobiernu de l’alcaldesa, al igual que fixo la secretaria de Política Municipal de la Federación Socialista Asturiana, Noelia Macías. Considera que “como partíu que da sustentu políticu al Gobiernu local y que forma parte activa del mesmu, anque verdaderamente nun papel bien secundariu, nun puede permanecer calláu énte lo que ta asocediendo, como si nada asocediera, ensin dar o esixir les oportunes esplicaciones. Equí nun falamos d’una cuestión puramente política, nin siquier d’una indagación xudicial o una investigación. Falamos d’un fallu del Tribunal de Cuentes qu’obliga a la devolución de 31.000 euros. Ye por tanto momentu d’escuchar qué tien qué dicir el PP sobre esta cuestión. Ye momentu de que’l PP esclarie si comparte’l proceder, si sofita lo asocedío, o si entiende que la situación ye lo suficientemente grave como pa que se adopten decisiones. Esperamos esplicaciones del PP y que nun s’acoveza na so estratexa habitual de ver la paya nel güeyu ayenu y non la viga n’el mesmu”.

    Macías pidió directamente al presidente rexonal d’esti partíu, Álvaro Queipo, que se posicione y marque’l camín de los populares de Xixón.

  • L’actuación n’Ecoxove va redefinise p’adaptala al modelu de ciudá

    L’actuación n’Ecoxove va redefinise p’adaptala al modelu de ciudá

    La Conseyería d’Ordenación de Territoriu, Urbanismu, Vivienda y Derechos Ciudadanos va collaborar col Conceyu de Xixón na definición d’una nueva propuesta pa los tarrenes de Ecoxove que s’integre meyor na contorna y nel modelu de ciudá compacta que dambes alministraciones comparten.

    La conseyería recuerda que’l conveniu expiró n’abril de 2023. El nulu desenvolvimientu del proyectu per parte de la iniciativa privada nestos 15 años, la incertidume al rodiu de la construcción del vial de Xove que daría accesu a esos terrenes y los cambeos lexislativos, motivaron, por tanto, que’l Gobiernu d’Asturies, en coordinación col Conceyu de Xixón, decidiera repensar esta actuación y la so relación colos núcleos rurales colindantes. Esto nun supón arrenunciar a la construcción de vivienda en Xove, sinón replantegase la so intensidá y tipoloxía.

    Dambes alministraciones coinciden en que’l proyectu primixeniu ta obsoletu al recoyer un modelu d’edificación intensiva, en tarrenes pindios y pocu integraos cola contorna proyectábense construcciones de muncho altor nuna zona preminentemente rural con construcciones disperses.

    L’actuación de Jove tien d’entendese siempres nel contestu de la ciudá. La Conseyería d’Ordenación de Territoriu, Urbanismu, Vivienda y Derechos Ciudadanos ta trabayando nun analís pormenorizáu por barrios de la situación de la vivienda en Xixón, les posibilidaes qu’ufierta’l plan xeneral y la so adaptación a la normativa estatal tres la entrada a valir de la Llei de Vivienda y de los cambeos de la Llei del Suelu. Los resultaos que saque esti estudiu van ser clave pa encarar el problema de la vivienda na ciudá, detectar aquelles árees nes que se van deber concentrar los esfuerzos de les alministraciones y va dexar replantegar l’actuación de Xove definiendo’l númberu de viviendes a construyir, mesmo que la so tipoloxía.

  • El Tribunal de Cuentes condena a Carmen Moriyón y oblígala a devolver más de 31.314,29 euros por usu indebíu

    El Tribunal de Cuentes condena a Carmen Moriyón y oblígala a devolver más de 31.314,29 euros por usu indebíu

    La sentencia del Tribunal de Cuentas que difundieron esta tarde los demandantes, condena a l’alcaldesa de Xixón, Carmen Moriyón, a devolver 31.314,29 euros de dineru públicu, colos sos intereses correspondientes, y declara «responsable contable directa» a l’actual alcaldesa xixonesa. La demanda partía d’un grupu de catorce ciudadanos y a ella sumóse la fiscalía.

    La sentencia del Tribunal de Cuentes dexa como fechos probaos «la esistencia d’una serie de pagos irregulares efectuaos con cargu al Grupu Municipal Foro Asturias». Los cargos especifíquense en 13.462,85 euros entregaos a Carmen Moriyón en conceptu de «dietes» y 8.513,20 euros a Leticia García Monroy, actualmente asesora de l’alcaldesa, pol mesmu conceptu. Los gastos fixéronse con cargu a una tarxeta de créitu de la que según s’esplica disponía l’alcaldesa y nun se xustificaron de forma afayadiza.

    Reclámase-y  tamién a Moriyón el pagu fechu con dineru del grupu municipal de Foro a una procuradora, p’asuntos llegales consideraos «d’interés particular» pola sentencia, ente otros gastos que se señalen como fuera del oxetu d’usu del dineru públicu que s’entrega a los grupos municipales pal so funcionamientu y que los demandantes califiquen de «sobresueldos». A la sentencia pue presentase recursu d’apellación per toles partes nos quince díes siguientes al so asoleyamientu.

    L’alcaldesa de Xixón, la forista Carmen Moriyón, y el so equipu, formáu por conceyales del Foro, PP y un trásfuga de Vox, celebraben güei un añu de gobiernu de Xixón con un videu promocional que xeneró polémica por difundise na cuenta oficial del Conceyu. Poques hores hores dempués facíase pública una sentencia que condena a Carmen Moriyón pol usu indebíu de dineru públicu. El pretendíu día de celebración empapizábase-yos a los foristes.

    Fallu de la sentencia.

  • Fillas de Cassandra: «El mayor desafíu ye dicir que non»

    Fillas de Cassandra: «El mayor desafíu ye dicir que non»

    En pocu más de dos años, esti grupu gallegu conquistó corazones y escenarios per tol mundu cola so música y lletres. Apocayá, «Fillas de Casandra» llograron enllenar la Praza da Quintana en Galicia, un finxu que demuestra la so creciente popularidá. Cuando-yos preguntamos cómo tán remanando l’ésitu de la so xira, respondieron con un amiestu d’allegría y gratitú. «Tamos contentísimas y súper agradecíes. Tol trabayu que tuvimos faciendo finalmente ta atopando los sos pagos nos conciertos. Nun podríamos tar más felices, anque dacuando tamos daqué cansaes porque obviamente’l trabayu implica enforma esfuerzu y tiempu,» compartieron. La so dedicación refléxase en cada actuación, onde la conexón col públicu rescampla. Elles mesmes creen que la clave del so ésitu ye la naturalidá, y como confiesen, “espresalo tou con naturalidá, ensin pensalo demasiao”. Dende’l principiu, la espontaneidá foi’l so sellu distintivu, faciendo les coses de manera instintiva y emocional.

    Cuando se trata de componer les sos lletres, la so mayor fonte d’inspiración son les sos propies vivencies. Dambes tienen que vese reflexaes no qu’escriben y ye por eso que tienen qu’alcordar “de qué manera espresar lo que sentimos falando enforma y aldericando enforma atopando les palabres esactes que dacuando vienen tamién inspiraes pola manera d’escribir d’otres persones”. Tou esi trabayu y hores de reflexón resulten en lletres cargaes de sentimientu.

    Magar de llograr tanto en tan poco tiempu y d’enfrentase a munchos desafíos, coinciden en que’l so mayor retu foi “aprender a dicir que non y danos cuenta de que munches vegaes esos ‘noes’ abríennos más puertes”. Col ésitu vienen más oportunidaes, y aprender a dicir que non en ciertes ocasiones foi crucial pa elles.

    Anguaño, tán en plena xira y el próximu 22 de xunu van actuar nel Festival VESU, onde podrá esfrutase del so poderosu directu. Según elles, la meyor forma de conoceles ye escuchales en vivu y sentir la fuerza y la emoción que tresmiten cola so música. Y eso podremos facer nesti festival nel que ta presente Vibra Mahou, la plataforma de música de Mahou Cinco Estrellas que xenera alcuentros al rodiu del directu.

    Pal so conciertu n’Uviéu, confesáronnos qu’añedieron dalgún cantar bien especial nel so “setlist”. Sabemos que nun ye la primer vegada que faen esto; apocayá cerraron unu de los sos conciertos cola versión gallega de “Maricarmen”, un cantar que mientres la so xira del añu pasáu usaben p’animase cuando taben llegando al llugar. “Munches vegaes yeren llargos viaxes qu’había qu’espertar antes de llegar al recintu.” Y col so públicu llograron el mesmu efectu.

    Anque la xira de «Últimas Dionisiacas» entá nun llega al so fin, elles yá tienen claro que cuando tou termine, quieren tomar un tiempu p’asimilar toles emociones, pero tamién pa volver trabayar ya inspirase pa siguir componiendo.

     

  • Moriyón celebra un añu de gobiernu en Xixón con un videu que xenera indignación

    Moriyón celebra un añu de gobiernu en Xixón con un videu que xenera indignación

    L’equipu de gobiernu de Xixón, qu’algamó l’alcaldía gracies al alcuerdu ente Foro, PP y Vox, celebró güei’l so primer añu na alcaldía con un videu difundíu al traviés de les redes sociales oficiales del Conceyu de Xixón. «Gijón, vamos a por más», ye un videu nel que se fai por vender los llogros de gobiernu, a mou de videu propagandísiticu. Apaecen los conceyales del equipu de gobiernu, toos menos el trasfúga Óliver Suárez, ex VOX, que sigue al frente de Divertia.

    Los comentarios nun tardaron en llegar a la cuenta en X (enantes Twitter), denunciando l’usu electoral y partidista d’una cuenta oficial institucional. «Pero si tais faciendo propaganda electoral cola cuenta pública de Xixón», espresaba un ciudadanu. «¿Esto qué ye la cuenta de Foro Xixón agora?», protestaba otra ciudadana en X.

    Amás de ciudadanos particulares, una de les primeres crítiques llegó dende la oposición, el conceyal y voceru d’Izquierda Xunida-Más País-IAS en Xixón, Javier Suárez Llana, espresaba asina’l descontentu por «un añu utilizando medios institucionales pa facer propaganda del partíu»: