Xixón al día

Autor: xixonaldia

  • El Gobiernu d’Asturies sigue la so fueya de ruta ya impulsa una acción de nulidá pa invalidar la prórroga del peaxe del Güerna

    El Conseyu de Gobiernu avanzó güei un nuevu pasu pa la supresión definitiva del peaxe del Güerna. L’Executivu aprobó l’exerciciu d’una acción de nulidá contra l’Alministración Xeneral del Estáu coles mires de que se declare la nulidá de plenu derechu del real decretu que prorrogó la concesión de l’autopista AP-66 (Llión-Campumanes) hasta 2050, esto ye, 29 años más de los previstos primeramente. L’alcuerdu designa a Alejandro Calvo, conseyeru de Movilidá, Mediu Ambiente y Xestión d’Emerxencies, como representante del gobiernu pa defender esta iniciativa en nome de la comunidá autónoma.

    La decisión forma parte de la fueya de ruta trazada pol Gobiernu d’Asturies y alcordada cola Alianza poles Infraestructures pa llograr la eliminación del peaxe. Cuenta tamién con una notable solidez, sofitada nun estensu analís ellaboráu pola secretaría xeneral técnica de la conseyería y los servicios xurídicos del Gobiernu d’Asturies, que foi ratificáu íntegramente pol Conseyu Consultivu.

    Estos informes conclúin que la prórroga aprobada en 2000 por un gobiernu del Partíu Popular -en concretu, pol Real Decreto 382/2000, de 17 de marzu- incurrió en causes de nulidá de plenu derechu, al:

    • alterar de manera sustancial l’equilibriu económicu y l’estructura del contratu orixinal de 1975;
    • xenerar una nueva concesión tapada, que tuvo de sometese a llicitación pública;
    • incumplir la normativa europea en materia de contratación pública, incluyida la Directiva 93/37/CEE;
    • ser aprobada prescindiendo total y absolutamente del procedimientu ñlegalmente esixíu;
    • otorgar beneficios económicos indebíos al concesionariu;
    • y producir un perxuiciu sosteníu pal interés xeneral d’Asturies.

    El Conseyu Consultivu respondió puntu por puntu les tesis del gobiernu: confirma la esistencia de vicios sustanciales y señala que la vía afayadiza pa restaurar la llegalidá ye la revisión d’oficiu o, nel so casu, l’acción directa de nulidá agora entamada. Esta tien calter d’actu alministrativu y supón un pasu previu necesariu para, nel so casu, allegar a los tribunales.

  • El Sespa algama n’ochobre diez meses consecutivos de descensu interañal de les llistes d’espera

    El Sespa algama n’ochobre diez meses consecutivos de descensu interañal de les llistes d’espera

    El Serviciu de Salú d’Asturies (Sespa) algamó n’ochobre diez meses consecutivos de descensu interañal de les llistes d’espera y la demoranza media. El númberu de pacientes pindios d’una intervención quirúrxica asítiase agora en 22.548, esto ye, 1.238 menos que va un añu.

    Los hospitales realizaron 6.318 operaciones programaes, lo que supón la segunda mayor cifra pa un mes d’ochobre de los postreros ocho años y supera con amplitú los rexistros previos al andanciu.

    El númberu de persones qu’aguarden una intervención ye’l más baxu dende ochobre de 2021. Amás, n’ochobre algamóse la segunda cifra más alta de paciente interveníos de forma programada de los postreros ocho años.

    L’amenorgamientu de la llista d’espera destaca especialmente nel grupu de pacientes qu’aguarden de 91 a 180 díes, mesmo que nel de los que superen los 180 díes. No que cinca a la espera media, baxa en casi seis díes al respective de setiembre.

    L’analís de los seis procesos garantizaos (ciruxía cardiaca valvular y coronaria, tabayones, prótesis de cadril, prótesis de rodía y histerectomías) revela un amenorgamientu de la espera al respective de setiembre, mesmo que la estabilización del númberu de persones pendientes d’intervención. En tolos casos, la demoranza ye inferior a 180 díes.

    Los hospitales efectuaron 174.816 consultes n’ochobre, un 20% más qu’en septiembre, y bien percima de los rexistros previos a la pandemia. Esta actividá dexa que mientres tou esti añu les demorances caltuviérense per debaxo del exerciciu pasáu. La espera media pa una primer consulta asítiase en 93 díes, diez menos que va un añu.

    Nestos momentos hai 113.040 pacientes pendientes d’una consulta, 1.496 menos que n’ochobre de 2024, y la demoranza media asítiase 4,5 díes per debaxo.

  • Cultura entama en Castropol la cuarta edición del Xuntoiro, alcuentru cultural alredor del eonaviegu

    Cultura entama en Castropol la cuarta edición del Xuntoiro, alcuentru cultural alredor del eonaviegu

    La Consejería de Cultura, Política Llingüística y Deporte convoca’l cuartu añu’l Xuntoiro, un alcuentru que muestra la vitalidá creativa de la llingua eonaviega. A lo llargo de trés xornaes, los díes 21, 22 y 23 de payares, va poder disfrutase d’esta cita que favorece l’intercambéu de los sectores culturales qu’usen la llingua de la parte más occidental d’Asturies.

    Si n’ediciones anteriores el Xuntoiro visitó los conceyos d’A Veiga, El Franco y Santalla d’Ozcos, anguaño ye’l conceyu de Castropol el qu’acueye dafechu esta celebración de la llingua y la cultura, con una trentena d’actividaes que se van desenvolver, sobre manera, nel Teatru Casinu de Castropol y la redolada.

    Toles actividaes son gratuites y tán empobinaes a tol públicu, con protagonismu especial de lo infantil, a quien se dedica específicamente la xornada matinal del día 21, en collaboración col CEIP La Paloma. El programa combina talleres infantiles, actividaes familiares y propuestes de dinamización del eonaviegu con conferencies, conciertos y teatru a lo llargo de trés díes. Incluye iniciatives como ¡El Xuntoiro chega á escola!,
    Pedras nel camín, la conferencia A literatura eonaviega alredor del Castropol y El Aldeano, amás de conciertos de Susana Gudín y Mestura y la pieza teatral A radio de bulito.

    El sábadu axunta la Libreiría eonaviega, talleres como’l de cestería o’l de podcast, el cursu exprés de Falamos Os meus primeiros pasos col eonaviego y actividaes familiares como ¡Cúntame un conto! Súmense presentaciones d’obres —El sabicheiro, Os albióis pequenos y el arracada máxica, El pasado nunca esqueice, Dúas oreyas y úa boca— y un alcuentru lliterariu con títulos como Estaxos, Mentres faga solombra, El asesino de Sargadelos o Viermo Carpinteiro. La nueche incluye teatru con El trasno y el molieiro y conciertos de Clandestías y Amarradizo.

    El domingu ufierta talleres como Alfombra floral del Xuntoiro y un taller lliterariu eonaviegu, la visita guiada Conocendo Castropol y el recital poéticu en barcu Recitando na Ría del Eo. La xornada zárrase cola llectura n’eonaviegu de Na costa de Santiniebla y la sesión audiovisual El cine que fala, con pieces como Frutos d’úa terra, Eu soi quen fun y Os nenos y as nenas de Castropol cuntan. A lo llargo de tol eventu hai propuestes permanentes como’l menú de versos eonaviegos, esposiciones, la biblioteca ambulante y el bookcrossing ¡Ceiba os libros!

  • Universidá d’Uviéu y Ayuntamientu de Llangréu refunden la Casa de La Buelga como exa dinamizadora del Nalón

    Universidá d’Uviéu y Ayuntamientu de Llangréu refunden la Casa de La Buelga como exa dinamizadora del Nalón

    La Universidá d’Uviéu y l’Ayuntamientu de Llangréu van estrechar la so collaboración coles mires de refundar La Casa de la Buelga pa convertila nuna exa fundamental de dinamización del Valle del Nalón. La refundación de La Casa de la Buelga enmárcase dientro de la estratexa UOTerritorio, una iniciativa de la Universidá d’Uviéu que tien por oxetu vertebrar espacios, estructures y programes naquellos conceyos onde la institución académica asturiana nun tien campus universitariu, como en Llangréu.

    La collaboración ente dambes instituciones pal palaciu barrocu de Ciañu busca los siguientes oxetivos:

    • Establecer nel Valle del Nalón un espaciu universitariu que contribuya a activar la vida cultural, a responder a los retos d’Asturies y a ufiertar soluciones a los sos problemes.
    • Materializar el compromisu de la Universidá d’Uviéu con Asturies, la so cultura y el so patrimoniu cultural, per aciu la instalación de les cátedres de la Sidra d’Asturies y de la Cultura Minera.
    • Establecer en La Casa de la Buelga la sede del programa Universitariu de Mayores de la Universidá d’Uviéu (PUMUO), que va ufiertar un mínimu d’ocho asignatures y d’ocho talleres. Dada la orientación de la entidá, dos de les asignatures y dos de los talleres van tar centraos na cultura sidrera y na minera.
    • Convertir La Casa de la Buelga nel centru d’una actividá qu’estableza sinerxes coles instituciones y la comunidá civil: cursos d’estensión, de branu, aules d’estensión, talleres, ciclos de conferencies…
    • Establecer un espaciu d’alcuentru y cooperación colos axentes del territoriu: conceyos, fundaciones, asociaciones, empreses y ciudadanía.
    • Recuperar la biblioteca y espaciu d’estudiu, tanto al serviciu del estudiantáu universitariu, como de la sociedá del Valle del Nalón y como centru especializáu n’estudios sobre la cultura asturiana, especialmente la rellacionada cola cultura de la sidra y la cultura minera.

    Ignacio Villaverde recordó que la Estensión Universitaria ye una actividá fundamental pa la Universidá d’Uviéu que foi pionera nel so desenvolvimientu n’España. “El nuesu oxetivu ye promover y articular l’espardimientu de la conocencia, la cultura, l’arte y la ciencia na comunidá universitaria y na sociedá, con especial atención a les necesidaes de la so redolada”, destacó.

    La Estensión Universitaria cumple asina una doble función. D’un llau, la interna, espublizando conocencies na comunidá universitaria y promoviendo la interdisciplinariedá, l’alderique académicu y la fluidez na tresmisión de les innovaciones científiques, técniques o culturales. Y, d’otru llau, la función esterna, qu’afigura la concepción de la universidá como una institución dinamizadora del territoriu, arguyosa de la so cultura y el so patrimoniu cultural y comprometíu con Asturies.

    El rector sorrayó que, p’articular esi compromisu con Asturies, la Universidá d’Uviéu diseñó’l proyectu UOterritorio, qu’integra centros estables nos que se cunta con una actividá enriquecedora en materia d’estensión universitaria y proyección cultural, como ye’l casu del CSU (Centru de Servicios Universitarios d’Avilés) d’Avilés, al que se va sumar agora La Casa de la Buelga.

    Pela so parte, Roberto García señaló que “pa nós ye un momentu d’allegría ya ilusión. Tamos asistiendo al reverdecer de La Casa de la Buelga, que recupera l’actividá de la estensión universitario y sumo, per primer vegada, dos cátedres que son auténticos emblemes d’Asturies: la de la sidra y la de la minería. Ye un pasu que, ensin dulda, honra la nuesa identidá”.

    García añedió que’l Programa Universitariu pa Mayores de la Universidá d’Uviéu supón “una reconocencia al compromisu cultural del nuesu conceyu, que nel so día foi conocíu como’l kilómetru más cultu d’Europa. Axallá este seya solo’l primer pasu pa responder a les necesidaes formatives de los nuesos vecinos y pa que Ciañu vuelva ser un foru cultural vivu, abiertu, dinámicu y capaz d’impulsar la conocencia y la participación”.

  • La Xunta Xeneral aprueba la reforma del IRPF con baxada d’impuestos a les clases medies y trabayadores d’Asturies

    La Xunta Xeneral aprueba la reforma del IRPF con baxada d’impuestos a les clases medies y trabayadores d’Asturies

    La Xunta Xeneral d’Asturies aprobó güei la reforma del IRPF plantegada pol Gobiernu d’Asturies, que na práctica supón una rebaxa d’impuestos pa les clases medies y trabayadores. El cambéu salió alantre gracies a los votos de los grupos que sofiten al Executivu (PSOE y IX-Convocatoria por Asturies) y de la diputada Covadonga Tomé.

    La entrada a valir de la norma va dexar que s’aplique yá a partir de la próxima campaña de la declaración de la renta, esto ye, la del exerciciu 2025, que les persones contribuyentes van presentar en 2026.

    Los cambeos beneficien especialmente a les clases medies y trabayadores. Asina, el 80% de les persones declarantes, que tienen rentes inferiores o iguales a 35.000 euros añales, van ser les más favorecíes, yá que se van aforrar polo menos 119 euros al añu. Poro, la midida afonda na vía fiscal asturiana, concebida pa la gran mayoría social.

    Los principales cambeos detállense de siguío:

    • El tipu que s’aplica al primer tramu del impuestu rebaxa un puntu, al pasar del 10% al 9%. Amás, auméntase’l mínimu personal y familiar exentu, que nun se modificaba dende 2015.

    • Neutralízase cualquier beneficiu pa les rentes cimeres a 55.000 euros, que nun van pagar nin más nin menos tres la reforma. D’esta miente, toa rebaxa concéntrase nes clases medies y trabayadores. Pa llogralo, el cuartu tramu pasa del 18,5% al 19,20%.

    • P’avanzar na xusticia fiscal, auméntase’l tipu que s’aplica a les rentes más altes, aquelles que superen los 175.000 euros añales. Nesti casu, el tipu impositivu pasa del 25,5% al 26%.

    La reforma afonda na progresividá de la vía fiscal asturiana y beneficia a la mayoría social. Nesti sentíu, l’impactu de la midida ronda los 38 millones. Si se suma esta cantidá a les deducciones fiscales que yá s’apliquen, la vía fiscal dexa aforrar a les clases medies y trabayadores casi 130 millones.

    La reforma trai tamién dellos cambeos nel impuestu de tresmisiones patrimoniales, coles mires de favorecer el derechu a la vivienda. Una d’elles consiste n’aplicar un gravame del 20% cuando la persona física o xurídica qu’adquiera un nuevu inmueble tenga la considerancia de gran tenedor, esto ye, cuando tenga diez viviendes.

  • Visites guiaes

    Visites guiaes

  • Dos curtiumetraxes ñacíos en LLABoral proyéctense nel FICX

    Dos curtiumetraxes ñacíos en LLABoral proyéctense nel FICX

    Llaboral Centru d’Arte celebra la presencia de dos trabayos creaos mientres procesos de residencia nel centru na programación del Festival Internacional de Cine de Xixón 2025. Dambes pieces, desenvueltes y acompañaes dende Llaboral, van proyectase nel festival, consolidando’l compromisu del centru cola producción artística contemporanea y el sofitu a creadores n’etapes d’investigación y desenvolvimientu.

    El curtiumetraxe Today, I Washed my Eyes in the Riverbed estrénase nel FICX 2025. La pieza audiovisual desenvuélvese mientres la residencia d’investigación de Hannah Mevis en Llaboral Centru d’Arte nel mes de mayu, dientro del programa Laboratorium en collaboración con iMAL (Bruxeles) y cofinanciada por Wallonie-Bruxelles International y l’Embaxada d’España en Bélxica.

    Lo qu’empezó como una entruga sobre los llavaderos comuñales derivó nuna esploración colectiva de la memoria, los xestos y el cuidu. El proyectu cuntó cola participación de muyeres de Les Regueres, que les sos voces y movimientos articulen el corazón de la película. La cineasta asturiana Nadia Penella collaboró con Mevis na construcción audiovisual del relatu.

    La diva, mi abuela y yo ye un curtiumetraxe nel que Inés G. Aparicio trabayó mientres la so residencia en la II Convocatoria de Residencies Artístiques 2022 de Llaboral, y qu’agora llega al FICX 2025. Nesta obra, l’artista esplora la memoria familiar, el cuerpu y la identidá al traviés d’una investigación audiovisual que toma la intimidá como puntu de partida pa construyir un relatu sensible y personal.

  • La oposición carga escontra Moriyón pol fracasu del Plan Llave

    La oposición carga escontra Moriyón pol fracasu del Plan Llave

    Malestar de la oposición coles decisiones de Carmen Moriyon nel ayuntamientu de Xixón énte los socesos alredor del Plan Llave. El voceru d’Izquierda Xunida en Xixón, Javier Suárez Llana, denunció esta mañana que “Martínez Salvador lleva un añu frenando la construcción de 300 viviendes públiques p’arriendu afayadizu en Xixón. Conocen la disposición de la Conseyería de Vivienda dende payares de 2024. Y la única razón pa nun dexar suelu municipal yera que tenía un negociu en marcha con promotores privaos pa vender viviendes en suelu públicu a más de 200.000 euros. Con eses, el negociu fracasó porque los promotores dexáronlu tiráu; agora ye’l momentu de les polítiques públiques que nun busquen otru beneficiu que garantizar vivienda algamadiza pa los y les xixoneses”.

    Suárez Llana llama al gobiernu municipal a “abandonar la confrontación y l’espolín que caracteriza la so acción política y a collaborar cola Conseyería de Vivienda. El Plan Llave ye la enésima promesa incumplida de Martínez Salvador, un espertu en vender fumu. Agora tien la oportunidá de demostrar a los xixoneses si l’oxetivu ye facilitar l’accesu a la vivienda o yera solo especular con suelu públicu”.

    Pal conceyal, “naide entendería qu’énte una ufierta del gobiernu asturianu pa construyir 300 viviendes públiques en Xixón, el gobiernu municipal diga que non. El compromisu que-y falta a Foro con Xixón tienlo Izquierda Xunida: con collaboración municipal o ensin ella, la Conseyería nun va dexar tiraos a los y les xixoneses nin va dexar que’l nuesu conceyu seya un conceyu de segunda; va haber vivienda pública”.

    Pela so parte, el PSOE encamienta al gobiernu local a abandonar d’una vegada por toes el so fallíu Plan Llave y a nun siguir afondando nos erros que paralicen actuaciones urxentes en materia de vivienda. Los socialistes fixeron esta reivindicación dempués de que’l gobiernu pidiera de forma esplícita la cesión de suelu públicu para construyir 300 viviendes que van salir en réxime d’arriendu afayadizu. “Carmen Moriyón tien que collaborar d’una vegada por toes con otres alministraciones como yá tán faciendo los conceyos que sí vencieron suelu públicu pa construyir vivienda pública. Ye, cuantimenos, sorprendente, qu’al traviés del so voceru llánce-y esixencies al gobiernu y esprésese nos términos nos que lo fixo ayeri. Nun nos estraña que, con esi manexu de les relaciones públiques y esa predisposición a axustar, los resultaos en casi trés años fueren nulos, evidenciando l’aislamientu de Foro, que nun tien capacidá de interlocución con nenguna alministración. Si l’actitú y la predisposición sigue siendo esta, nun va haber nin una sola vivienda pública en
    Xixón a la fin del mandatu pola so culpa,”, señala Tino Vaquero.

  • ‘Tía Miseria’, de Covenant Producciones, gana’l Premiu ‘Nel Amaro’

    ‘Tía Miseria’, de Covenant Producciones, gana’l Premiu ‘Nel Amaro’

    La compañía Covenant Producciones ganó’l IX Premiu Nel Amaro de teatru profesional n’asturianu col espectáculu Tía Miseria. El xuráu d’esti galardón, impulsáu pola Conseyería de Cultura, Política Llingüística y Deporte, reflexa nel acta “la calidá llingüística y el nivel interpretativu d’un espectáculu que, con ritmu axilosu y gran naturalidá, trai a l’actualidá’l corpus cultural de la tradición asturiana, apurriendo una mirada crítica a la sociedá actual”.

    Tía Miseria llegó a la final del Nel Amaro xunto coles producciones 1001 Una odisea nel desiertu (Higiénico Papel Teatro), Vuelu d’andarines (Nun Tris Teatro) y Al rodiu l’horru (É Vero Teatro). Estos espectáculos representáronse a lo llargo del mes pasáu nel Teatru Filarmónica d’Uviéu, mientres el festival de teatru que lleva’l mesmu nome que’l premiu.

    Covenant Producciones creóse coles mires d’entamar y producir espectáculos sobre tradición oral, identidá cultural, memoria y tradición. Unu de los sos trabayos más conocíos ye Animalada xabaz, serie infantil de TPA qu’axunta marionetes, cuentos tradicionales, teatru y música rock.

    En 2003, la compañía empezó a desenvolver ¡Rodando! Esnidien les histories, un proyectu multiplataforma sobre la cultura nel mediu rural, cola obra Tía Miseria como exa central. Esta producción, qu’acaba d’alzase col Premiu Nel Amaro, nació de la tradición oral, al traviés d’una serie d’escenificaciones d’hestories basaes nesta fonte de sabiduría popular. El monologuista Carlos Alba Cellero afai y reformula esti cuentu d’oríxenes milenarios con música, cantares, danza, cosadielles, preseos tradicionales y humor.

    El galardón Nel Amaro, dotáu con 6.000 euros, tien por oxetu consolidar, arriquecer y prestixar l’asturianu y l’eonaviegu nel ámbitu del arte dramáticu.

    El premiu y festival lleva’l nome de Nel Amaro, autor fináu en 2011 al que se dedicó la 42ª Selmana de Les Lletres Asturianes. A postreros de la década de los setenta del sieglu pasáu abrió’l camín pa la vanguardia teatral n’asturianu. Ente les sos obres de teatru destaquen Xénesis o alborá de la concencia (1978); Glayíos nueos, vieya murnia (1979); L’únicu rebalbu (1980) y Antígona, por exemplu, que ganó’l Premiu de Teatru de l’Academia de la Llingua Asturiana en 1991. Les manes en caxón (2003) foi la so última publicación teatral.

  • La UNED ufierta un seminariu de microteatru

    La UNED ufierta un seminariu de microteatru

    La Universidá Nacional d’Educación a Distancia (UNED) programa un seminariu de microteatru pal próximu 17 de payares. El formatu de clas maxistral impartíu por Xavier Frías Conde ta especialmente empobináu pa docentes d’asturianu y docentes y estudiantes d’educación infantil. La lliteratura como ferramienta docente nun ye nenguna novedá, de fechu ye base fundamental de la enseñanza y de la cultura. Sicasí, nestos tiempos de consumu paez que too tien que ser curtio, condensao y al momentu; y ésto perxudica gravemente a les formes d’espresión más posaes.

    Nesti contestu d’hipervelocidá y consumismu, formatos lliterarios d’estensión curtia como’l microrrellatu tán garrando puxu y caldía podemos atopar más concursos, talleres y producción. Otru xéneru que por desgracia paez nun esfrutar d’un momentu tan feliz, yá de va décades, ye’l teatru. Y ye que’l teatru nun ye sólo l’arte que se pon n’escena sinón que, sacantes la improvisación pura, suel llevar detrás un testu lliterariu. Teniendo too ésto en cuenta, ye natural buscar una manera d’adaptar el xéneru teatral a los tiempos que cuerren, n’especial pensando nel so valir pedagóxicu a dellos niveles. Si’l microrrellatu sirve p’averar la escritura a quien la novela o el rellatu nun llega, el microteatru puede ser la ferramienta análoga nel casu del teatru.

    El seminariu de microteatru tien como oxetivu adentrase no que ye un xéneru lliterariu marxinalizáu inxustamente. El teatru, amás de pa representar, sirve pa lleer, como un cuentu, o en voz alta, tornando al antiguu subxéneru del radioteatru. Nesti seminariu, vamos trabayar más que nada col microteatru, un tipu de teatru que nun ye nuevu, pero que malpenes entró nes aules. De fechu, nun hai siquiera testos, máxime en llingua asturiana, polo que xunto cola presentación de la obra El xigante llorón (Cuatro Gotes Ediciones, 2025) veremos cuáles son les característiques d’esti tipu de testos y cómo se-yos pue sacar partíu nes clases de llingua. Propondremos delles actividaes que conduzan a la esplotación del microteatru y mesmo a la creación de testos dramáticos cenciellos. L’obrador sedrá impartíu pol doctor Xavier Frías Conde, autor de Lliteratura Infantil y Xuvenil y docente de la UNED.

    La entrada al seminariu de microteatru ye llibre y de baldre, anque hai posibilidá d’inscripción quien quiera recibir un certificáu acreditativu d’asistencia. La información completa y formulariu d’inscripción pueden atopase equí.