La vicepresidenta y conseyera de Presidencia, Retu Demográficu, Igualdá y Turismu, Gimena Llamedo, destacó güei la importancia de les obres que se van a realizar n’Avilés pa recuperar la muralla medieval, con una inversión averada d’un millón, al amparu del plan de sostenibilidá turística del conceyu, financiáu con fondos europeos Next Generation. «Esti proyectu va dexar sumar un gran reclamu turísticu y cultural a la ciudá y poner en primer llinia de la ufierta cultural y patrimonial d’Asturies”, aseguró.
El plan Avilés, patrimoniu históricu y natural recueye más d’una decena d’actuaciones con una inversión de 2,1 millones, ente les que destaquen la intervención na muralla y l’apertura d’un centru d’interpretación sobre la mesma fortificación y la villa medieval. Tamién inclúi actuaciones de promoción y marketing, mesmo que la creación un ximielgu dixital del cascu históricu. Llamedo visitó les zones nes que se va reponer parte de l’antigua muralla que se consideraba perdida, xuntu cola alcaldesa Mariví Monteserín y la viceconseyera de Turismu, Lara Martínez
Otros proyectos incluyíos nel plan van dexar impulsar la observación d’aves na ría y l’ancón de Llodero, construyir dos aparcamientos disuasorios con 330 places nel Parque Empresarial Principáu d’Asturies (PEPA) y La Grandiella, instalar nueves estaciones de préstamu de bicis eléctriques, recuperar les fontes históriques de los Caños de San Francisco y de Rivero y rehabilitar la oficina de turismu.
