Adrián Barbón abrió güei la so ronda de contactos n’Estrasburgu col eurodiputáu asturianu Jonás Fernández. Adrián Barbón viaxó a la ciudá francesa, see del Parlamentu Européu, pa reclamar énte les autoridaes comuñales una política industrial potente, qu’ayude a avanzar nos procesos de descarbonización y a consolidar el futuru de la siderurxa integral asturiana.
“Esti viaxe ye mui importante nun momentu como esti, nun contestu volátil y difícil, marcáu poles amenaces arancelaries del presidente Trump y a escasos díes de que la Unión Europea presente la planificación estratéxica pa una industria llimpio”, esplicó Barbón dende la ciudá francesa. “La mio presencia equí ta más que xustificada en defensa de los intereses d’Asturies”, añedió.
El programa oficial pa mañana inclúi dos xuntes cola vicepresidenta de la Comisión Europea pa la Transición Llimpia, Xusta y Competitiva, Teresa Ribera, y cola presidenta del Parlamentu Européu, Roberta Metsola. Primeramente, Barbón tamién va celebrar un alcuentru cola presidenta del Grupu de l’Alianza Progresista de Socialistes y Demócrates (S&D) nel Parlamentu Européu, Iratxe García. Tamién ta prevista una entrevista col vicepresidente pa la Prosperidá y la Estratexa Industrial, Stéphane Séjourné.
La visita busca, según esplicó’l presidente, afrontar les principales esmoliciones d’Asturies con trés vicepresidencies fundamentales pal futuru de la industria. “Hai que dotar de recursos la reindustrialización d’Europa; redefinir, intensificar y siguir aplicando l’arancel ambiental y falar d’industria y del Fondu de Transición Xusta, ente otres cuestiones vitales”, resumió.
Nos últimos meses, el xefe del Executivu demandó en distintos foros el fortalecimientu de la política industrial europea, de cuenta que consolide la posición de ventaya d’Asturies pa liderar la industria verde y garantice’l caltenimientu de la siderurxa integral. El viaxe a Estrasburgu supón un pasu más nesta estratexa de defensa de la industria, que busca que la Unión Europea reaccione ensin demoranza pa blindar los intereses de los países miembros énte la competencia esterior.
Nel planu institucional, Barbón va aportunar énte la presidenta Metsola na necesidá de que la mayoría proeuropea “cierre files y nun venza al chantaxe de quien quieren acabar col proyectu de la Unión Europea”.
