El presidente asturianu, Adrián Barbón, anunció güei rebaxar del Impuestu sobre la Renta de les Persones Físiques (IRPF), una midida que se va traducir nun aliviu tributariu pa les clases medies y trabayadores”. El xefe del Executivu realizó esti anunciu mientres la sesión de control de la Xunta Xeneral d’ayeri, na qu’esplicó que l’alcuerdu alcanzáu ente les fuerces polítiques que sofiten el Gobiernu d’Asturies p’aplicar esta reforma va dexar reforzar la vía fiscal asturiana.
«Utilizamos la política tributaria p’ayudar más a quien menos tienen, reforzar la progresividá del sistema y, coles mesmes, garantizar la suficiencia d’ingresos p’ameyorar l’estáu del bienestar y potenciar la inversión granible”, precisó Barbón.
La propuesta de meyora del IRPF contien les siguientes midíes:
• Baxada del tipu autonómicu al primer tramu de renta un puntu porcentual: del 10% al 9%.
• Aumentu del mínimu personal y familiar pa realizar la declaración de la renta un 10%.
• Alzar el cuatro tramu de renta del 18,5 al 19,20%.
• Xubida del tipu pa les rentes más altes, percima de 175.000 euros, del 25,5% al 26%.
Siete de cada diez contribuyentes asturianos van beneficiase coles dos primeres midíes, sobre manera, les rentes más baxes, hasta 35.000 euros. Coles mesmes, cola xubida de tipos y del cuatro tramu “garantízase la progresividá del sistema al contribuyir más quien más ganen y concéntrase tol beneficiu fiscal nes clases media y trabayadora”, destacó Barbón.
Según detalló, esta reforma va repercutir de manera positiva en “casi’l 80%, la gran mayoría social” de les persones contribuyentes. «A esa mayoría social ye a la que tenemos que dar respuesta”, añedió. Con estes midíes, repitió, refuérzase la vía fiscal asturiana y tiéndese a “la xusticia fiscal, imprescindible pa la xusticia social”.
Esta reforma, que se va treslladar a la diputada del Grupu Mistu Cuadonga Tomé, que sofitó los presupuestos d’Asturies p’anguaño, tendrá de cuntar cola aprobación de la Xunta Xeneral, polo que’l presidente encamentó al alcuerdu de la Cámara y, en concretu al sofitu del grupu parlamentariu popular, que refugó les cuentes autonómiques. “Agora van tener una oportunidá pa rectificar. Si de verdá quieren beneficiar a les clases medies y trabayadores tienen agora una fantástica ocasión: sofiten nesta Xunta Xeneral la reforma que vamos plantegar. De lo contrario va quedar claro lo que de verdá pretendíen cola so propuesta: beneficiar más a los que más tienen”, dixo.
